بۇگىن ءماجىلىستىڭ جالپى وتىرىسىندا دەپۋتاتتار بيزنەس جۇرگىزۋ ماسەلەلەرى تۋرالى زاڭ جوباسىن ءبىرىنشى وقىلىمدا ماقۇلداندى.

ءماجىلىس دەپۋتاتى بولاتبەك ناجمەتدينۇلىنىڭ ايتۋىنشا، زاڭ جوباسىنىڭ نەگىزگى مىندەتى – مەملەكەتتىك ورگاندار تاراپىنان بيزنەسكە تەكسەرۋلەر جۇرگىزۋ كەزىندە اشىقتىقتى قامتاماسىز ەتۋ. ەكىنشىدەن، تەكسەرۋ راسىمدەرىن جەتىلدىرۋ ءارى وڭايلاتۋ. ۇشىنشىدەن، قاداعالاۋ سالالارىنداعى جەدەل دەن قويۋ شارالارىن رەگلامەنتتەۋ. ياعني، ەندى زاڭدا جوق تەكسەرۋلەرگە تىيىم سالىناتىن بولادى.

جالپى بۇل تۇزەتۋلەر 2021 جىلعى جەلتوقساندا قابىلدانعان كاسىپكەرلىك قىزمەتتى رەتتەۋ تۋرالى زاڭنىڭ نورمالارىن ءىس جۇزىندە جۇزەگە اسىرۋ. بۇل زاڭ مەملەكەت باسشىسىنىڭ 2020 جىلعى 1 قىركۇيەكتەگى جولداۋىن ىسكە اسىرۋ ماقساتىمەن ازىرلەندى. بۇگىن ءبىز 2021 جىلعى زاڭعا قاتىستى كودەكستەر مەن زاڭدارعا تۇزەتۋلەر ەنگىزىپ جاتىرمىز. مۇنىڭ ءبارى، سايىپ كەلگەندە، بيزنەستى جۇرگىزۋ ءۇشىن قولايلى جاعداي جاساۋدى قامتاماسىز ەتۋگە مۇمكىندىك بەرەدى، –  دەدى دەپۋتات.

وسى زاڭ جوباسى مەملەكەتتىك قىزمەت كورسەتۋ ساپاسى، نورماتيۆتىك قۇقىقتىق اكتىلەردى شىعارۋ، مەملەكەتتىك تىركەۋ جانە جويۋ ماسەلەلەرى بويىنشا زاڭنامانى ساقتاۋ، تىلدەردى دامىتۋ، ءبىلىم بەرۋ جۇيەسى، ازاماتتىق قورعانىس، اقپاراتتىق قاۋىپسىزدىك جانە تاعى باسقا ماسەلەلەردى باقىلاۋدى جۇزەگە اسىراتىن بولادى.

جۇمىس توبى زاڭ جوباسىن ەكىنشى وقىلىمعا دايىنداۋ اياسىندا جۇمىسىن ءارى قاراي جالعاستىراتىن بولادى.

Abai.kz