ەكپە تۋرالى كەڭ كولەمدى اقپاراتتىق-ءتۇسىندىرۋ جۇمىستارىن جۇرگىزۋ كەرەك - ە. بەيسەنباەۆ
«AMANAT» پارتياسى فراكتسياسىنىڭ جەتەكشىسى ە. بەيسەنباەۆ دەنساۋلىق ساقتاۋ ءمينيسترى ا.ع. عينياتقا دەپۋتاتتىق ساۋال جولدادى.
دەنى ساۋ ۇرپاق – ۇلت بولاشاعى. وعان، ەڭ الدىمەن، ءاربىر بالانىڭ
اتا-اناسى، دەنساۋلىق ساقتاۋ مەكەمەلەرى جاۋاپتى. الايدا سوڭعى كەزدەرى بالالار اراسىندا ءتۇرلى اۋرۋلاردىڭ دەندەپ بارا جاتۋى الاڭداتىپ وتىر.
كۇنى كەشە وتكەن ۇكىمەت وتىرىسىندا وسى ماسەلە كوتەرىلگەنىنەن حاباردارمىز. وندا ەلىمىزدە 17 مىڭنان استام قىزىلشامەن اۋىرعان ادام تىركەلگەنى، ولاردىڭ 82%-ءى بالالارعا تيەسىلى ەكەنى تۋرالى مالىمەت كەلتىرىلدى. ال ونىڭ كوپشىلىگى ۆاكتسينا الماعان بالالار ەكەن. بۇلاردىڭ ىشىندە 30-داي بالا جانساقتاۋ بولىمىندە جاتقان كورىنەدى.
بۇل – دابىل قاعارلىق جاعداي. قىزىلشا اسقىنىپ كەتسە، بالانىڭ دەنساۋلىعىنا قاۋىپ توندىرەتىنى بەلگىلى. سوندىقتان مۇنى تەك دەنساۋلىق ساقتاۋ سالاسىنىڭ وكىلدەرىنە عانا ىسىرىپ قويماي، بۇكىل قوعام بولىپ كۇرەسۋ قاجەتتىگى ايقىن.
عاسىرلار بويى بالالاردى ورتتەي جايپاعان نەبىر ىندەتتەردىڭ ۆاكتسينا ويلاپ تابىلىپ، جاپپاي ەگىلگەننەن كەيىن بەتى قايتقانى بەلگىلى. بۇل – بالالاردى جۇقپالى اۋرۋلاردىڭ زاردابىنان قورعاۋدىڭ ءتيىمدى جولى. ءححى عاسىردا ءومىر سۇرە وتىرىپ، بىرقاتار اتا-انالاردىڭ ءوز بالاسىن مىندەتتى ەگۋدەن باس تارتۋىن قالاي تۇسىنۋگە بولادى؟! «باۋىر ەتىڭ بالاڭا» وسىلاي جاۋلىق جاساۋعا بولا ما؟! مامانداردىڭ سوزىنە قۇلاق اسپاي، بالالاردىڭ دەنساۋلىعىمەن ويناۋدى دوعارۋ كەرەك.
دانا حالقىمىزدىڭ «اۋىرىپ ەم ىزدەگەنشە، اۋىرمايتىن جول ىزدە» دەۋى تەگىن ەمەس. سوندىقتان جاۋاپكەرشىلىك تانىتىپ، اۋرۋدىڭ الدىن الۋعا باسا ءمان بەرۋ قاجەت. ءوز كەزەگىندە اتا-انالار ۆاكتسيناتسيالاۋعا قاتىستى ءتۇرلى الىپ-قاشتى سوزدەر مەن نەگىزسىز دەرەكتەرگە سۇيەنبەي، تەك وسىعان جاۋاپتى دارىگەرلەردىڭ عانا كەڭەسىن باسشىلىققا العانى ءجون.
ەكپەلەر تەك جەكە ادامنىڭ دەنساۋلىعى ءۇشىن عانا ەمەس، بۇكىل قوعام ساۋلىعى ءۇشىن دە قاجەت.
وسىعان وراي، حالىق اراسىندا اقپاراتتىق-ءتۇسىندىرۋ جۇمىستارىن كەڭىنەن جۇرگىزۋدىڭ ماڭىزى زور.
قۇرمەتتى اجار عينياتقىزى!
جوعارى ايتىلعانداردى ەسكەرە وتىرىپ، كەلەسى ماسەلەلەردى قولعا الۋدى ۇسىنامىن.
- ەلىمىزدە بالالاردىڭ ۆاكتسيناتسيالانۋى بويىنشا تولىق تۇگەندەمە جۇرگىزىپ، ولاردىڭ اراسىنداعى اۋرۋ تۇرلەرىنە، ۆاكتسيناتسيالاۋمەن كوررەلياتسياسىنا جان-جاقتى ساراپتاما جاساۋ.
- جەرگىلىكتى اتقارۋ ورگاندارىمەن جانە بۇقارالىق اقپارات قۇرالدارىمەن بىرلەسە وتىرىپ، حالىق اراسىندا كەڭ كولەمدى اقپاراتتىق-ءتۇسىندىرۋ جۇمىستارىن جۇرگىزۋ.
- وسى كەزگە ءتۇرلى سەبەپتەرمەن ەگىلمەي قالعان بالالاردى جانە دۇنيەگە كەلىپ جاتقان سابيلەردى ۆاكتسيناتسيالاۋدان وتكىزۋدى قولعا الۋ.
Abai.kz
