قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ پورترەتى الماتى مەتروسىنداعى "المالى" ستانتسياسىنىڭ قابىرعاسىنان الىندى، دەپ جازدى قازاقستاندىق باق. كارتينا ول جەردە 2011 جىلدىڭ جەلتوقسان ايىنان بەرى – مەترو اشىلعان ۋاقىتتان بەرى ءىلىنىپ تۇرعان.

پورترەت سۋرەتشىلەر عازيزا ەشكەنوۆا مەن ايدار جامحاننىڭ ۆيتراجدىق پاننوسىنىڭ بەت جاعىندا تۋىندىلاردى ءىشىنارا جاۋىپ تۇرعان. قازىر پاننو تولىق اشىلعان.

الماتى مەتروسىنىڭ ءباسپاسوز قىزمەتى پورترەتتىڭ جاقتاۋى مەن اينەگى شاعىلعاندىقتان الىنعانىن ايتتى. پورترەتتى قايتا ىلە مە، جوق پا – بەلگىسىز.

وسى ايدىڭ باسىندا استانادا ۇلتتىق قورعانىس ۋنيۆەرسيتەتىنىڭ الدىنان نازارباەۆ ەسكەرتكىشى الىنعان ەدى. قورعانىس مينيسترلىگىنىڭ مالىمەتىنشە، ەسكەرتكىش قورعانىس مينيسترلىگىنىڭ اسكەري-تاريحي مۋزەيىنە كوشىرىلگەن. ۆەدومستۆو وكىلدەرى بىلتىر جەلتوقساندا ۋنيۆەرسيتەت اتاۋىنان "قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى" ءسوزى الىنعانىن العا تارتتى.

ساراپشىلار قازاقستاندى 30 جىلعا جۋىق باسقارعان نۇرسۇلتان نازارباەۆ تۇسىندا ەلدە جەكە باسقا تابىنۋ ورشىگەنىن ايتقان. ەلدىڭ ءتۇرلى ايماقتارىندا نازارباەۆ ەسكەرتكىشتەرى مەن مۇسىندەرى اشىلىپ، ۋنيۆەرسيتەت، قالا، كوشە اتاۋلارىنا سونىڭ ەسىمى بەرىلدى. ەلدە ونى ماداقتايتىن جىرلار، ولەڭدەر، كىتاپتار باسىلدى. كەمىندە 238 ادامنىڭ ءومىرىن قيعان قاندى قاڭتاردان كەيىن ەلدە بۇرىنعى پرەزيدەنت نۇرسۇلتان نازارباەۆتىڭ ىقپالى السىرەگەنى جونىندە پىكىر ايتىلدى.

قاڭتار كەزىندە تالدىقورعاندا ونىڭ ەسكەرتكىشى قيراتىلدى. ونىڭ اينالاسىنداعى ادامداردىڭ كەيبىرى قىزمەتتەن الىنىپ، كەيبىرى قامالدى. ونىڭ ىقپالىن السىرەتەتىن بىرقاتار زاڭنامالىق باستامالار كوتەرىلدى. ەكس-پرەزيدەنت "ەلباسى" مارتەبەسىنەن دە ايىرىلدى. "بىرىنشى پرەزيدەنت — ەلباسى تۋرالى" زاڭ نازارباەۆتىڭ جەكە باسىنا عانا ەمەس، ونىڭ جاقىن تۋىستارىنا دا قۇقىقتىق يممۋنيتەت بەرگەن.

فوتو: 2gis.kz

Abai.kz