ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ ايتۋىنشا، قۇس تۇماۋىنىڭ ادامعا جۇعۋ ىقتيمالدىعى وتە تومەن، دەپ حابارلايدى Ulysmedia.kz.

مينيستر العاش ولگەن اققۋلار 2023 جىلدىڭ جەلتوقسانىندا تابىلعانىن ەسكە الادى. قۇس تۇماۋى شتامىنىڭ بولۋىن كورسەتەتىن سىناقتار جۇرگىزىلگەنىن ايتادى.

– تۇماۋدىڭ بۇل شتاممى ادامعا جۇعۋ ىقتيمالدىعى وتە تومەن. ءبىر قىزىعى، ول ءتىپتى باسقا قۇستارعا بەرىلمەيدى. تەك اققۋلارعا جۇعادى. بۇگىنگى تاڭدا 1040 اققۋ ولەكسەلەرى تابىلدى. كۇن سايىن وبلىستىق ورمان شارۋاشىلىعى جانە جانۋارلار دۇنيەسى ينسپەكتسياسىنىڭ قىزمەتكەرلەرى كەزەكشىلىك ەتەدى. سونىمەن قاتار، 16 قاڭتاردان باستاپ Rixos قوناق ۇيىندە جوسپاردان تىس تەكسەرۋ باستالدى. ناتيجەسىن كۇتەمىز. ازىرگە ولاردىڭ قاشان بولاتىنىن ايتا المايمىن، – دەيدى مينيستر.

ەكولوگيا دەپارتامەنتى Rixos Water World Aktau قوناق ءۇيىن تەكسەرۋ ناتيجەسىندە قاراكولگە توگىلگەن سۋلار ارقىلى لاستاۋشى زاتتاردىڭ اسىپ كەتۋى انىقتالعانىن ەسكە سالدى.

بۇعان دەيىن Rixos Water World Aktau قوناق ۇيىنەن قاراكول كولىنە اعىندى سۋلار اعىزىلاتىنى راستالعان بولاتىن. قوناق ءۇيدىڭ باس مەنەدجەرى ولاردىڭ جەكە كارىز جۇيەسى جانە قورشاعان ورتاعا شىعارۋعا رۇقساتى بار ەكەنىنە سەندىردى.

ولگەن اققۋلاردىڭ سانى تۋرالى اقپارات كۇن سايىن جاڭارىپ جاتىر. 5 قاڭتاردا ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ قىزمەتكەرلەرى 506 اققۋدىڭ ولەكسەسىن تاپقان.

ەستەرىڭىزگە سالا كەتەيىك، بۇعان دەيىن قاراكول كولىنىڭ جاعاسىندا 30 اققۋدىڭ ولەكسەسى تابىلعانى حابارلانعان بولاتىن. بۇل فاكتى بويىنشا ساراپتاما ناتيجەلەرى جاريالاندى.

قاراكول كولىندەگى جاعدايدى ۆيدەوعا تۇسىرگەن اقتاۋ تۇرعىنى ازامات سارسەنباەۆ ولگەن قۇستاردىڭ سانى رەسمي مالىمەتكە قاراعاندا ەداۋىر كوپ ەكەنىن ايتتى.

ماڭعىستاۋ وبلىسىنىڭ اۋىل شارۋاشىلىعى باسقارماسى قاراكول كولىندەگى اققۋلار قورەكتىڭ تاپشىلىعىنان ءولىپ جاتقانىن مالىمدەدى. مامانداردىڭ پىكىرىنشە، اققۋلاردى قۇتقارۋ ءۇشىن قۇستاردى تاماقتاندىرۋدى شۇعىل تۇردە ۇيىمداستىرۋ قاجەت. الايدا بيۋدجەتتە بۇعان قاراجات كوزدەلمەگەن، سوندىقتان باسقارما دەمەۋشىلەر مەن ەرىكتىلەردى قۇستاردى قۇتقارۋعا شاقىرادى.

فوتو: massaget.kz

Abai.kz