قازاقستاندىق عالىم دوس سارباسوۆ قاتەرلى ىسىككە قارسى ءدارى ويلاپ تاپتى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك حابارلادى.

«دوس سارباسوۆ دەگەن اتاقتى بيوتەحنولوگ، عالىم بار. ول تەحاس ۋنيۆەرسيتەتىندەگى اندەرسون ونكولوگيالىق ورتالىعىندا ۇزاق جىلدار بويى جۇمىس ىستەدى. قازىر قازاقستانعا ورالدى. دوس اعامىزعا ۇلكەن العىسىمىزدى ايتامىز»، – دەدى ساياسات نۇربەك ۇكىمەتتىڭ ءباسپاسوز ورتالىعىندا.

ونىڭ ايتۋىنشا، بۇگىندە ءدارىنى 15 ادام قابىلداپ، ءدارى سىناقتان وتۋدە.

«قازىر ول – ۇلتتىق زەرتحانانىڭ باسشىسى. بۇگىندە بيوتەحنولوگ بولعانىنا قاراماستان، ونكولوگيا سالاسىندا جۇمىس ىستەيدى. قولىمدا تۇڭعىش رەت قازاقستاندا شىعارىلعان DVC اتتى ونكولوگيالىق ءدارى-دارمەك تۇر. قازىر وسى دارىمەن 15 كىسى ەمدەلىپ جاتىر. ولار – الماتىداعى ونكولوگيا جانە راديولوگيا ينستيتۋتىندا»، – دەدى مينيستر.

ساياسات نۇربەك پرەپاراتتى كەلەسى جىلى نارىققا شىعارۋ جوسپارلانىپ وتىرعانىن ايتتى.

فوتو: qaz365.kz

Abai.kz