استانادا قازاقستان رەسپۋبليكاسى، قىرعىز رەسپۋبليكاسى جانە وزبەكستان رەسپۋبليكاسى ىشكى ىستەر مينيسترلەرىنىڭ كەزدەسۋى ءوتتى، – دەپ حابارلايدى Abai.kz ءتىلشىسى Polisia.kz سايتىنا سىلتەمە جاساپ.

قوعامدىق قاۋىپسىزدىكتى قامتاماسىز ەتۋ، ترانسۇلتتىق ۇيىمداسقان قىلمىسقا، حالىقارالىق تەرروريزم مەن ەكسترەميزمگە، سونداي-اق زاڭسىز كوشى-قونعا قارسى ءىس-قيمىل ماسەلەلەرى كەزدەسۋدىڭ نەگىزگى تاقىرىبى بولدى.

– جالپى العاندا ءبىزدىڭ ىنتىماقتاستىعىمىز جەدەل قىزمەتتىڭ بارلىق باعىتتارى بويىنشا قارقىندى تۇردە دامىپ كەلەدى. اۋىر، اسا اۋىر قىلمىستاردى بىرلەسىپ اشۋدا، قاۋىپتى قىلمىسكەرلەردى ۇستاۋدا كوپتەگەن وڭ مىسالدار بار. قىلمىستىق ىستەر بويىنشا ءوزارا قۇقىقتىق كومەك كورسەتىپ، تاجىريبە الماسامىز. ىزدەستىرۋ جۇمىستارى دا ناتيجەلى، – دەپ اتاپ ءوتتى ەرجان سادەنوۆ.

قازاقستاننىڭ باس پوليتسەيىنىڭ ايتۋىنشا، 2023 جىلى كورشى مەملەكەتتەردىڭ سۇراۋىمەن ءبىزدىڭ ساقشىلار ەل اۋماعىندا 125 قىلمىسكەردى ۇستاعان. دەلەگاتسيا باسشىلارى قىلمىسقا قارسى كۇرەستىڭ بارلىق باعىتتارى بويىنشا ىشكى ىستەر ورگاندارىنىڭ ءوزارا ءىس-قيمىلىن جانداندىرۋدىڭ ماڭىزدىلىعى مەن قاجەتتىلىگىن اتاپ ءوتتى.

– ءبىر عانا مەملەكەتتىڭ كۇشىمەن قىلمىسقا قارسى ءتيىمدى كۇرەس جۇرگىزۋ مۇمكىن ەمەس. ويتكەنى بۇگىندە قىلمىس تۇرلەرى ترانسۇلتتىق سيپاتقا يە. سوندىقتان بىرلەسكەن ءىس-قيمىلدار مەن كورشى ەلدەر اراسىنداعى ءوزارا سەرىكتەستىك وڭىردەگى تۇراقتىلىق پەن قاۋىپسىزدىكتى قامتاماسىز ەتۋدىڭ باستى كەپىلى بولىپ تابىلادى، – دەدى قىرعىزستان ءمينيسترى ۇلان نيازبەكوۆ.

– قازىرگى زامانعى سىن-قاتەرلەر مەن قاۋىپتەر ءبىزدىڭ مينيسترلىكتەرىمىزدىڭ ورتاق قىزمەتىن، تىكەلەي جانە تىعىز بايلانىستا بولۋىن، سونداي-اق بەيىندى ءبولىنىس باسشىلارىنىڭ پراكتيكالىق تۇرعىدا كەڭەسۋىن تالاپ ەتەدى، – دەپ اتاپ ءوتتى وزبەكستان ءمينيسترى پۋلات بوبوجونوۆ.

كەزدەسۋ قورىتىندىسى بويىنشا قازاقستان، قىرعىزستان جانە وزبەكستان ءىىم ۇيلەستىرۋ توپتارىنىڭ جۇمىسىن ۇيىمداستىرۋ بويىنشا جەدەل، ستاتيستيكالىق جانە وزگە دە اقپاراتپەن، ادىستەمەلىك ۇسىنىمدارمەن الماسۋدى جانداندىرۋعا، قىلمىسقا قارسى كۇرەس سالاسىندا بىرلەسكەن ءوزارا ءىس-قيمىل كورسەتۋگە، سونداي-اق قىلمىسقا قاتىسى بار ادامدار تۋرالى مالىمەتتەرمەن الماسۋعا باعىتتالعان حاتتاماعا قول قويىلدى. ىشكى ىستەر مينيسترلەرىنىڭ كەزدەسۋى ءوزارا تۇسىنىستىك پەن سىندارلى ديالوگ اتموسفەراسىندا ءوتتى.

داريعا ەرجانقىزى

Abai.kz