قارجى ماماندارى قاڭتار ايىنىڭ قورىتىندىسى بويىنشا ينفلياتسيانىڭ تومەندەيتىنىن بولجاپ وتىر. بۇل رەتتە، ەكونوميكالىق زەرتتەۋلەر ينستيتۋتى ۇلتتىق بانكتىڭ بازالىق مولشەرلەمەنى كەزەكتى تومەندەتۋ تۋرالى شەشىمىنە قاتىستى ساراپتامالىق پىكىرىن ۇسىندى، دەپ حابارلادى قازاقپارات.

«ۇلتتىق بانك ءوز شەشىمىندە ەكونوميكالىق تەورياعا سايكەس بازالىق مولشەرلەمەنى ەڭ كوبى 50 بازالىق تارماققا تومەندەتەتىنى تۋرالى ايتقان ەدىك، ياعني بۇل ءبىز كۇتكەن شەشىم بولدى. وتىمدىلىكتى قامتاماسىز ەتۋ ءۇشىن تۇراقتى قول جەتىمدىلىك وپەراتسيالارى بويىنشا مولشەرلەمە 16,25 پايىز، ال وتىمدىلىكتى الۋعا ارنالعان وپەراتسيالار 14,25 پايىز دەڭگەيىندە قالىپتاستى. جىلدىق ينفلياتسيا ءبىزدىڭ بولجامدى كونسەنسۋس شەگىندە قالىپتاسادى. 2023 جىلدىڭ جەلتوقسانىندا بولجانعانداي جىلدىق ينفلياتسيا 9,8 پايىزعا دەيىن تومەندەگەن ەدى»، — دەيدى ساراپشى توقتاسىن باقبەرگەن.

قاڭتار ايىندا ينفلياتسيا 9,7 پايىزعا دەيىن تومەندەيدى دەگەن بولجام بار. نەگىزگى سەبەپتەردىڭ ءبىرى رەتىندە ۇكىمەت پەن ۇلتتىق بانك قابىلدايتىن شارالار اتالادى. ناقتىلاساق، پايىزدىق مولشەرلەمەلەردى كوتەرۋ جانە ينفلياتسيانى باقىلاۋ مەن تومەندەتۋدىڭ كەشەندى جوسپارىن قابىلداۋ ينفلياتسيانىڭ تومەندەۋىنە اسەر ەتپەك.

«ناتيجەسىندە تاۋارلار مەن قىزمەتتەرگە سۇرانىس ازايىپ، نارىقتاعى ۇسىنىس وسەدى. سۇرانىس جانە ۇسىنىس زاڭىنا سايكەس، تاۋارلار مەن قىزمەتتەر باعاسى تومەندەۋى ءتيىس»، — دەدى ت. باقبەرگەن.

ايتپاقشى، ساراپشىلار الەمدىك ەكونوميكانىڭ ءوسۋ قارقىنى مەن ەنەرگيا باعاسىنىڭ تومەندەۋىنە باسا نازار اۋدارۋ كەرەك ەكەنىن العا تارتىپ وتىر. سەبەبى، مۇنىڭ ءبارى 2023 جىلى تاۋارلار مەن قىزمەتتەرگە، سونىڭ ىشىندە شيكىزاتقا دەگەن سۇرانىستىڭ تومەندەۋىنە اسەر ەتكەن بولاتىن.

سۋرەت: fibi.tech

Abai.kz