تاۋەلسىزدىك العاننان كەيىن قازاقستان اسكەرىنىڭ الەۋمەتتىك جاعدايى ناشارلاپ كەتكەن. سوڭعى 3 جىلدا 17 مىڭنان اسا اسكەري قىزمەتكەر جۇمىستان كەتكەن. ونىڭ 4 مىڭنان استامى وفيتسەر. بۇل تۋرالى ماجىلىستە قورعانىس ءمينيسترىنىڭ ورىنباسارى سۇلتان كامالەتدينوۆ ايتتى، دەپ حابارلايدى Qaz365.kz.

ونىڭ ايتۋىنشا، 2012 جىلى زاڭمەن اسكەريلەرگە بەرىلگەن كوپ ارتىقشىلىق، جەڭىلدىك پەن تولەم جويىلعان. بۇل اسكەري قىزمەتشىلەردىڭ وتباسى مۇشەلەرىنە دە اسەر ەتىپ، ولاردىڭ مارتەبەسىن ايتارلىقتاي ناشارلاتقان. اسكەري قىزمەتشىلەردىڭ اسكەردە تۇراقتاماۋى قورعانىس مينيسترلىگىنىڭ ەرەكشە الاڭداۋشىلىعىن تۋعىزىپ وتىر.

مىسالى، بۇعان دەيىن پوليگونداعى جاتتىعۋلارعا، ىسساپارعا كۇندەلىكتى ۇستەمەاقىسىنىڭ 60% مولشەرىندە قوسىمشا قاراجات قاراستىرىلعان. سونىمەن بىرگە ءبىرىنشى كەلىسىمشارتتى جاساۋ كەزىندە بىرجولعى اقشالاي سىياقى دا بولعان. بىراق قازىر ونداي ىنتالاندىرۋ قاراجاتتارى تولەنبەيتىن بولعان. سونىمەن بىرگە زەينەتكە شىعۋ جاسى دا ۇزارىپ كەتكەن.

«تەك 2020-2023 جىلدار ارالىعىندا قارۋلى كۇشتەردەن 17 065 اسكەري قىزمەتشى بوساتىلدى، ونىڭ ىشىندە 4301-ءى وفيتسەر جانە كەلىسىمشارت بويىنشا 12 764 اسكەري قىزمەتشى. سالىستىرۋ ءۇشىن ايتار بولساق، بۇل شامامەن 15 مەحانيكالاندىرىلعان بريگادانىڭ سانى»، - دەيدى سۇلتان كامالەتدينوۆ.

بۇرىن قورعانىس مينيسترلىگى مەن ۇلتتىق قاۋىپسىزدىك كوميتەتىنىڭ بالاما لاۋازىمداعى قىزمەتكەرلەرى بىردەي جالاقى الىپتى. ال قازىر ولاي ەمەس كورىنەدى. مۇنداي جالاقى جاستاردى اسكەري قىزمەت اتقارۋعا ىنتالاندىرمايدى. ءتىپتى سوعىس ۋاقىتىندا دا جاعدايدى قيىنداتۋى مۇمكىن ەكەنىن اتاپ ءوتتى.

قورعانىس مينيسترلىگىندە قاتارداعى اتقىشتىڭ جالاقىسى 89 211 تەڭگە بولسا، ۇلتتىق قاۋىپسىزدىك كوميتەتىندە 185 855 تەڭگە. قورعانىس مينيسترلىگىندە ۆزۆود كومانديرى – 231 159 تەڭگە السا،ۇلتتىق قاۋىپسىزدىك كوميتەتىنە – 335 857 تەڭگە جالاقى الادى. قورعانىس مينيسترلىگىندە روتا كومانديرىنە 275 675 تەڭگە، ۇلتتىق قاۋىپسىزدىك كوميتەتىندەگى شەكارا دەپارتامەنتىنىڭ باستىعىنا 371 637 تەڭگە جالاقى تولەنەدى.

فوتو: egemen.kz

Abai.kz