بۇگىن قازاقستان بوكس فەدەراتسياسىنىڭ پرەزيدەنتى اۋىستى. وسىعان دەيىن باسقارعان كاسىپكەر كەڭەس راقىشەۆتى شاحمۇرات ءمۇتالىپ اۋىستىردى، دەپ حابارلايدى Qaz365.kz.

بۇگىن استانادا قازاقستان بوكس فەدەراتسياسىنىڭ جىلدىق ءداستۇرلى جيىنى ءوتتى. جيىن بارىسىندا فەدەراتسيانىڭ جاڭا پرەزيدەنتى بولىپ شاحمۇرات ءمۇتالىپ سايلاندى.

كونفەرەنتسيانىڭ كەزەكتى وتىرىسىندا وتكەن جىل قورىتىندىلانىپ، ەرلەر جانە ايەلدەر كومانداسى باس باپكەرلەرىنىڭ ەسەبى تىڭدالدى. قبف جاڭا باسشىسىنىڭ سايلاۋ وتىرىستىڭ سوڭعى بولىگىندە ءوتتى.

جاڭا قىزمەتىندە العاش رەت ءسوز العان پرەزيدەنت قبف الدىنداعى مىندەتتەردى بىرلەسىپ ورىنداۋدىڭ ماڭىزدىلىعىن اتاپ ءوتتى. سونداي-اق، ول وزىنە سەنىم ارتقان قاۋىمداستىق مۇشەلەرىنە العىس ءبىلدىرىپ، ورتاق ماقساتقا جەتۋ جولىندا ءوزىنىڭ بار كۇشىن سالاتىنىن  ايتتى.

«ماعان جۇكتەلگەن جاۋاپكەرشىلىكتى سەزىنە وتىرىپ، قازاقستان بوكسىن ءارى قاراي دامىتۋعا، سپورتشىلارىمىزعا جان-جاقتى قولداۋ كورسەتىپ، ولاردىڭ مۇددەسىن قورعاۋعا، قبف ءرولىن ەل ىشىندە جانە حالىقارالىق دەڭگەيدە ارتتىرۋعا بار كۇشىمدى سالامىن. بيىل وتەتىن ماڭىزدى دودالار قارساڭىندا كوماندانىڭ الدىندا ۇلكەن ءبىر ماقسات تۇر. ءوز تاراپىمىزدان دايىندىققا قاجەتتى بارلىق جاعدايدى جاساۋدى جالعاستىرا بەرەمىز. بىرلەسە ەڭبەك ەتۋ ارقىلى وتاندىق بوكستىڭ الەمدىك ارەناداعى بەدەلىن نىعايتا تۇسەمىز»، – دەدى قبف جاڭا باسشىسى.

شاحمۇرات ءمۇتالىپ 1990 جىلى 18 قىركۇيەكتە الماتى وبلىسى كازتسيك اۋىلىندا دۇنيەگە كەلگەن. ەكونوميكا عىلىمدارىنىڭ ماگيسترى، كۋالا-لۋمپۋرداعى (مالايزيا) ازيا-تىنىق مۇحيتى ۋنيۆەرسيتەتىندە (APU) ءبىلىم العان. كاسىپكەر، «Integra Construction KZ» جشس يەگەرى.  ۇيلەنگەن، 3 بالاسى بار.

ايتا كەتەيىك، كەڭەس راقىشەۆ سوڭعى جىلدارى بوكسشىلارعا ءىرى كولەمدە سىياقى بەرۋمەن بەلگىلى. مىسالى، 2021 جانە 2023 جىلعى الەم چەمپيوناتىندا توپ جارعان قازاق بوكسشىلارىنا 100 مىڭ دوللاردان بەرگەن بولاتىن.

Abai.kz