پاۆلودار وبلىسى بويىنشا سىبايلاس جەمقورلىققا قارسى قىزمەت پروكۋراتۋرانىڭ ۇيلەستىرۋىمەن ورمان شارۋاشىلىعىن قورعاۋ سالاسىنداعى جۇيەلى جەمقورلىقتى انىقتاۋ شەڭبەرىندە «ەرتىس ورمانى» مەملەكەتتىك ورمان تابيعي رەزەرۆاتىنىڭ (بۇدان ءارى – رەزەرۆات) باسشىسى تاراپىنان پارا الۋ فاكتىلەرىن انىقتادى.

ول كاسىپكەرلەرگە ىسكەرلىك ورماندى زاڭسىز كەسكەنى جانە ساتقانى ءۇشىن پارا الۋدىڭ قىلمىستىق سحەماسىن ۇيىمداستىرعانى انىقتالدى.

اعىمداعى جىلدىڭ 26 قاڭتارىندا تەرگەۋ سوتىنىڭ سانكتسياسىمەن رەزەرۆات باسشىسى 2 اي مەرزىمگە قاماۋعا الىندى.

سونىمەن قاتار، رەزەرۆاتتىڭ بەس بۋحگالتەرىنە قاتىستى سوتقا دەيىنگى تەرگەۋ جۇرگىزىلۋدە، ولار 2021-2023 جىلدار ارالىعىندا وزدەرىنىڭ كارتوچكالىق شوتتارىنا، سونداي-اق مەكەمەنىڭ جۇمىس ىستەپ تۇرعان جانە بۇرىنعى قىزمەتكەرلەرىنىڭ شوتتارىنا جالاقىنى ەسەپتەۋ جانە اۋدارۋ ارقىلى 25 ملن تەڭگە سوماسىندا اسا ءىرى مولشەردە بيۋدجەت قاراجاتىن جىمقىرعان.

كەلتىرىلگەن ماتەريالدىق زالال ءىشىنارا وتەلدى.

تەرگەۋ جالعاسۋدا.

قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

دەرەككوزى: انتيكور

Abai.kz