بۇگىن پارلامەنتتەگى دومينانت پارتيا – «امانات» پرەزيدەنتكە ۇسىنىس جاسادى. ولار ۇكىمەت باسشىسى قىزمەتىنە ولجاس بەكتەنوۆتى ۇسىندى. ۇسىنىستى امانات باسشىسى ەرلان قوشانوۆ جاساعان.

سۋرەت اقوردا تەلەگرام ارناسىنان الىندى

بۇگىن پرەزيدەنت توقاەۆ ماجىلىسكە بەكتەنوۆتىڭ كانديداتۋراسىن بەكىتۋ ءۇشىن كەلگەن. جالپى جيىن الدىندا، پارلامەنت فراكتسيالارىنىڭ جەتەكشىلەرىمەن جولىعىپ، ولجاس بەكتەنوۆتىڭ كانديداتۋراسىن ۇسىنعان. تالقىلاۋعا «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ, قازاقستان حالىق پارتياسى فراكتسياسىنىڭ جەتەكشىسى ماگەررام ماگەرراموۆ, «اق جول» پارتياسى فراكتسياسىنىڭ جەتەكشىسى ازات پەرۋاشەۆ, جالپىۇلتتىق سوتسيال-دەموكراتيالىق پارتياسى فراكتسياسىنىڭ جەتەكشىسى اسحات راقىمجانوۆ, «اۋىل» پارتياسى فراكتسياسىنىڭ جەتەكشىسى سەرىك ەگىزباەۆ, «Respublica» پارتياسى فراكتسياسىنىڭ جەتەكشىسى ايداربەك حودجانازاروۆ قاتىسقان.

سونان سوڭ ماجىلىستەگى القا-قوتان جيىنعا پرەزيدەنتتىڭ ءوزى بارىپ قاتىسقان. سول جيىندا جاڭا پرەمەردىڭ كانديداتۋراسى بەكىتىلدى. قازاقستان حالىق پارتياسى مەن جسدپ داۋىس بەرۋدەن قالىس قالىپ، قالعان پارتيالار قولداپ داۋىس بەرگەن. ءسويتىپ، قازاقستان ۇكىمەتىن – 44 جاستاعى ولجاس بەكتەنوۆ تىزگىندەدى.

سۋرەت: qaz365.kz سايتىنان الىندى

ولجاس بەكتەنوۆ كىم؟

بەكتەنوۆ بيىل 44-كە تولادى. بىلتىر ساۋىردەن باستاپ قر پرەزيدەنتى اكىمشىلىگىن باسقارىپ كەلگەن. 2018 جىلدان 2023-كە دەيىن قر سىبايلاس جەمقورلىقپەن كۇرەس اگەنتتىگىندە بىرنەشە لاۋازىمدى قىزمەتتەر اتقاردى. اگەنتتىكتىڭ تىزگىنىن ۇستادى.

الماتىنىڭ تۋماسى. قازاق مەملەكەتتىك زاڭ اكادەمياسىن 2001 جىلى تامامداعان. ماماندىعى – زاڭگەر. ءار جىلدارى الماتى، استانا قالالارىندا، اقمولا وبلىسىندا، قر پرەزيدەنت اكىمشىلىگى، پرەمەر-ءمينيستردىڭ كەڭسەسى، ادىلەت مينيسترلىگىندە مەملەكەتتىك قىزمەتتەردە بولعان.

بەكتەنوۆتىڭ ەڭبەك جولى:

2005-2006 جج. – پرەمەر-مينيستر كەڭسەسىندە زاڭ ءبولىمىنىڭ ساراپشىسى، باس ساراپشىسى;

2006-2009 جج. – پرەزيدەنت اكىمشىلىگىندە قىزمەت ىستەدى;

2009-2012 جج. – ادىلەت مينيسترلىگىنىڭ تىركەۋ قىزمەتى جانە قۇقىقتىق كومەك كورسەتۋ كوميتەتى توراعاسىنىڭ ورىنباسارى;

2012-2014 جج. – ەكونوميكالىق قىلمىسقا جəنە سىبايلاس جەمقورلىققا قارسى اگەنتتىگىنىڭ (قارجى پوليتسياسى) ورتالىق اپپاراتىندا دەپارتامەنت باستىعى;

2015-2016 جج. – استانا قالاسى اكىمىنىڭ اپپارات باسشىسى، پرەزيدەنتى اكىمشىلىگىنىڭ باسشىسى حاتشىلىعىنىڭ مەڭگەرۋشىسى;

2016-2017 جج. – سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ (سىبايلاس جەمقورلىققا قارسى قىزمەت) استانا قالاسى بويىنشا دەپارتامەنتىنىڭ باسشىسى;

2017-2018 جج. – اقمولا وبلىسى اكىمىنىڭ ورىنباسارى;

2018-2019 جج. – مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى;

2019-2022 جج. – سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى;

2022-2023 جج. – cىبايلاس جەمقورلىققا قارسى ءىس-قيمىل اگەنتتىگىنىڭ توراعاسى;

2023 جىلدىڭ 3 ساۋىرىندە مەملەكەت باسشىسىنىڭ جارلىعىمەن پرەزيدەنتى اكىمشىلىگىنىڭ باسشىسى بولىپ تاعايىندالدى.

ءىى دارەجەلى "ايبىن" جانە "داڭق" وردەندەرىمەن ناگرادتالعان.

سۋرەت اقوردادان الىندى

توقاەۆ بەكتەنوۆ تۋرالى:

پرەزيدەنت بەكتەنوۆكە سيپاتتاما بەرە وتىرىپ: «ول تاجىريبەلى مەملەكەتتىك قىزمەتشى، ونىڭ قازاقستان ەكونوميكاسى جانە باسقا دا سالالار بويىنشا ءبىلىمى، ۇيىمداستىرۋ قابىلەتى جوعارى. ءوزى ءتارتىپتى، ادال، ەڭبەكقور ازامات»، -  دەدى.

پرەزيدەنت ەكس-پرەمەر مينيستر ءاليحان سمايىلوۆ وتستاۆكاعا كەتۋگە ءوزى ءوتىنىش بەرگەنىن ايتتى.

«ۇكىمەت جاڭا ماڭىزدى ءارى شەشۋشى رولگە يە بولۋى كەرەك. جەدەل شەشىم قابىلداۋى ماڭىزدى. ۇكىمەتتىڭ جۇمىسىنا جاڭا سەرپىن بەرۋى كەرەك. قوعام وسىنى كۇتىپ وتىر. سوندىقتان دا مەن ءاليحان سمايىلوۆتىڭ وتستاۆكاسىن قابىلدادىم»، - دەدى توقاەۆ.

ال جاڭا تاعايىندالعان پرەمەر-مينيستر ولجاس ابايۇلى ءوزىن قولداپ، سەنىم بىلدىرگەن پرەزيدەنت پەن ساياسي پارتيالارعا العىسىن ايتىپ، الداعى جوسپارلارىنىڭ ءبىرسىپىراسىن ءمالىم ەتتى.

Abai.kz