پرەزيدەنت قاسىم-جومارت توقاەۆ قاتارعا مەملەكەتتىك ساپارمەن باردى.

قازاقستان پرەزيدەنتىن دوحاداعى «حاماد» حالىقارالىق اۋەجايىنان قاتار مەملەكەتىنىڭ ءامىرى شەيح ءتاميم بەن حاماد ءال ءتاني قارسى الدى. مەملەكەت باسشىسىن كۇتىپ الۋ كەزىندە قۇرمەت قاراۋىلى ساپ تۇزەپ تۇردى.

ءراسىم اياقتالعاننان كەيىن مەملەكەتتەر باسشىلارى اۋەجايدىڭ مارتەبەلى مەيماندار زالىندا قىسقاشا پىكىر الماستى.

قاسىم-جومارت توقاەۆ ەرتەڭ، 14 اقپان كۇنى قاتار مەملەكەتىنىڭ ءامىرى شەيح ءتاميم بەن حاماد ءال تانيمەن جانە پرەمەر-ءمينيسترى شەيح مۇحاممەد بەن ابدۋلراحمان ءال تانيمەن كەلىسسوزدەر جۇرگىزەدى.

كەلىسسوز قورىتىندىسى بويىنشا بىرقاتار ەكىجاقتى قۇجاتقا قول قويۋ جوسپارلانىپ وتىر.

سونداي-اق پرەزيدەنت قازاق-قاتار ينۆەستيتسيالىق دوڭگەلەك ۇستەلىنە قاتىسادى جانە وسى ەلدىڭ بيزنەس كاپيتاندارىمەن بىرقاتار كەزدەسۋ وتكىزەدى.

Abai.kz