قازاقستاندىق رەجيسسەر كەنجەبەك شايقاقوۆتىڭ «ايقاي» تولىقمەتراجدى كوركەم ءفيلمى فرانتسيانىڭ ۆەزۋل قالاسىندا وتكەن 30-شى حالىقارالىق ازيا فيلمدەرى كينوفەستيۆالىندە حالىقارالىق قازىلار القاسى تاعايىنداعان گران-ءپريدى جەڭىپ الدى.

وعان قوسا، كارتينا ورتا ازيا كينوسىنشىلارىنىڭ «نەتپاك» جۇلدەسىن جانە مارك حااس اتىنداعى ارنايى سىيلىقتى دا يەلەنگەن.

سونداي-اق، فيلمدە باستى رولدەردى سومداعان ورىنبەك شايماعامبەتوۆ پەن ارنۇر اكرامعا قازىلار القاسىنىڭ ارنايى ديپلومى بار.

وسىلايشا ءتورت بىردەي جۇلدەگە يە بولعان «ايقاي» تورەشىلەردى ءتانتى قىلعان تاڭداۋلى فيلمدەردىڭ ءبىرى رەتىندە ۆەزۋل كينوفەستيۆالىنىڭ تاريحىندا قالدى.

ايتا كەتەرلىگى، بۇعان دەيىن وڭتۇستىك كورەيادا 4-13 قازان ارالىعىندا وتكەن ايگىلى پۋسان كينوفەستيۆالىندە اتالعان قازاقستاندىق كارتينا ا Window on Asian Cinema باعدارلاماسىندا كورسەتىلىپ، تۇساۋى كەسىلگەن بولاتىن.

سونىمەن قاتار، «ايقاي» قاراشا ايىندا بىشكەك حالىقارالىق كينوفەستيۆالىنە قاتىسىپ، ءفيلمنىڭ رەجيسسەرى كەنجەبەك شايقاقوۆ قازىلار القاسى ۇسىنعان «ۇزدىك ستسەناري» نوميناتسياسى بويىنشا ارنايى جۇلدەنى يەلەندى.

ەستەرىڭىزگە سالا كەتسەك، كينوكارتينا قر مادەنيەت جانە سپورت مينيسترلىگىنىڭ تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» كەاق قولداۋىمەن تۇسىرىلگەن.

فيلمدە كۇللى قازاقتىڭ قاسىرەتى بولعان «سەمەي پوليگونى» قۇرباندارىنىڭ تاعدىرى يادرولىق جارىلىستان زارداپ شەگىپ، قوس اياقسىز دۇنيەگە كەلگەن ازاماتتىڭ ءومىرى ارقىلى بەينەلەنەدى.

جارىنان ايىرىلعان جالعىزباستى ەر ادام مەن جارىمجان اكەسىنە جاناشىر، قامقور بولا بىلگەن بالانىڭ كۇيبەڭ تىرشىلىگى ارقىلى رەجيسسەر 1980-90 جىلدارداعى حالىقتىڭ جاعدايىن كورسەتەدى.

كوركەم ءفيلمنىڭ ءتۇسىرىلىمى اباي وبلىسى، اياگوز اۋدانى، شىڭعوجا اۋىلىندا وتكەن.

اتاپ وتەرلىگى، كارتينادا باستى رولدەگى مەلىس اتتى كەيىپكەردى كاسىبي اكتەر ەمەس، راسىندا ەكى اياعىنان ايىرىلعان قىزىلوردالىق ازامات – ورىنبەك شايماعانبەتوۆ سومدايدى.

ال مەلىستىڭ مەكتەپ قابىرعاسىندا وقيتىن ۇلى – جالعاستىڭ ءرولىن الماتى وبلىسى قاراساي باتىر اتىنداعى مەكتەپتىڭ 7 سىنىپ وقۋشىسى ارنۇر اكرام وينايدى.

سونداي-اق، قوسالقى رولدەردە بەلگىلى اكتەرلار ەربولات القوجاەۆ، بەينۇر بايمۇحامبەتوۆ، ەرلان مالاەۆ، ايبەك يمانقۇلوۆ، ايعانىم نۇرسۇلتان بوي كورسەتەدى.

ءفيلمنىڭ ءتۇسىرىلىم كەزەڭى 2022 جىلدىڭ قازان ايىندا اياقتالىپ، 2023 جىلدىڭ ناۋرىز ايىندا مونتاج كەزەڭى باستالدى.

ماۋسىم ايىنىڭ سوڭىنا دەيىن سوزىلعان مونتاج كەزەڭىندە ءفيلمنىڭ ءتۇسى وڭدەلىپ، قايتا دىبىس جازۋ، كومپيۋتەرلىك گرافيكا، دىبىس ارلەۋ جۇمىستارى جۇرگىزىلگەن.

ءفيلمنىڭ سوڭعى نۇسقاسى مەملەكەتتىك ۇلتتىق كينونى قولداۋ ورتالىعىنىڭ ەكسپەرتتى كەڭەس وكىلدەرىنە 26-ماۋسىم كۇنى كورسەتىلىپ، بەكىتىلدى.

ايتا كەتەرلىگى، ءفيلمنىڭ رەجيسسەرى جانە ستسەناري اۆتورى – كەنجەبەك شايقاقوۆ 2014 جىلى «امانات كز» پروديۋسەرلىك ورتالىعىنىڭ قارجىلاندىرۋىمەن «دSfilm» كينوستۋدياسىندا دەبيۋتتىك «كۇركو» اتتى ءفيلمىن ءتۇسىردى.

اتالعان كينوكارتينا سول جىلى دۋشانبە قالاسىندا وتكەن حالىقارالىق «ديدور» كينوفەستيۆالىندە جۇلدەلى ورىنعا يە بولدى. 2015 جىلى رەسەيدىڭ چيتا قالاسىندا وتكەن «بايكال ايماعى» حالىقارالىق كينوفەستيۆالىندە «ادىلقازىلاردىڭ ارنايى جۇلدەسى» نوميناتسياسىمەن ماراپاتتالدى.

2015 جىلى ياكۋتسكدە وتكەن حالىقارالىق كينوفەستيۆالدە «ەڭ ۇزدىك رەجيسسەرلىك دەبيۋت» نوميناتسياسىمەن ماراپاتتالدى.

سول جىلى الماتى قالاسىندا وتكەن تۇڭعىش قازاقستاندىق «سىنشىلار تاڭداۋى» كينومارافونىندا «جىلدىڭ ۇزدىك ستسەناريى» جۇلدەسىن الدى.

سونداي-اق، سول جىلى اۆستراليانىڭ بريسبان قالاسىندا ازيا جانە تىنىق مۇحيتى ايماعى كينواكادەمياسىنىڭ «ارSA» كينوفەستيۆالىندە «ۇزدىك ستسەناري» نوميناتسياسى بويىنشا قاتىستى.

دەرەككوزى: kazakhcinema.kz

Abai.kz