مارتين، 2024 جىلعى 6 ناۋرىز – «سلوۆاكيا كىتاپحانالارى اپتاسى» مادەني شاراسى اياسىندا سلوۆاك ۇلتتىق كىتاپحاناسىندا ماعجان جۇمابايدىڭ سلوۆاك تىلىنە اۋدارىلعان ولەڭدەر جيناعىنىڭ تۇساۋكەسەرى ءوتتى. شاراعا سلوۆاكيا جازۋشىلار وداعىنىڭ مۇشەلەرى – اقىن-جازۋشىلار مەن ادەبيەتتانۋشى عالىمدار، «سلوۆاك ۇياقالىبى» (Matica slovenská) مادەني بىرلەستىگىنىڭ، سلوۆاكيا كىتاپحانالار قاۋىمداستىعىنىڭ جانە كىتاپ شىعارۋشىلار قوعامىنىڭ مۇشەلەرى، ستۋدەنتتەر مەن ءباسپاسوز وكىلدەرى قاتىستى.

سۋرەت قازاقستاننىڭ سلوۆاكياداعى ەلشىلىگىنىڭ سايتىنان الىندى

كىتاپتى قالىڭ جۇرتشىلىققا تانىستىرعان قازاقستان ەلشىسى تولەجان بارلىباەۆ ماعجان جۇمابايدىڭ شىعارماشىلىق مۇراسىنىڭ بايلىعىن، ونىڭ قايتالانباس اقىندىق دارىنى مەن قازاق جانە الەم ادەبيەتىنىڭ دامۋىنا قوسقان زور ۇلەسىن ەرەكشە اتاپ ءوتتى. سونىمەن قاتار، ەلشى كىتاپتىڭ تۇساۋكەسەرى قازاقتىڭ «الاش» ۇلت-ازاتتىق قوزعالىسىنىڭ تەڭدەسى «سلوۆاك ۇياقالىبى»  (Matica slovenská) مادەني-اعارتۋ قوعامى 1865-1926 جىلدارى ورنالاسقان ۇلتتىق كىتاپحانانىڭ تاريحي عيماراتىندا ءوتۋىنىڭ سميۆولدىق ءمانىن اتاپ ءوتتى. ديپلومات مادەني شارانى ۇيىمداستىرۋعا كومەكتەسكەن ۇلتتىق كىتاپحانا ۇجىمىنا العىسىن ءبىلدىرىپ، كىتاپحانا قورىنا قازاق اقىنىنىڭ كىتاپتارىن سىيعا تارتتى.

سۋرەت قازاقستاننىڭ سلوۆاكياداعى ەلشىلىگىنىڭ سايتىنان الىندى

سلوۆاكيا جازۋشىلار وداعىنىڭ مۇشەسى، ادەبي ينستيتۋتتىڭ ديرەكتورى، اقىن يۋليۋس لومەنچيك ماعجاننىڭ سان قىرلى شىعارماشىلىعىن، جازۋشىڭىڭ رۋحاني ىزدەنىسى مەن ادامگەرشىلىك مۇراتىن كورسەتەتىن شىعارمالارىنىڭ تەرەڭ سيمۆوليزمى مەن ءليريزمىن جوعارى باعالادى. ول قازاق اقىنىنىڭ قايعىلى تاعدىرى سلوۆاك ۇلتتىق مادەنيەتتىڭ دامۋىنا ولشەۋسىز ۇلەس قوسقان كلاسسيك قالامگەرلەرىنىڭ تاعدىرىمەن ۇندەسەتىنىن اتاپ ءوتتى.

سۋرەت قازاقستاننىڭ سلوۆاكياداعى ەلشىلىگىنىڭ سايتىنان الىندى

سلوۆاكيا ۇلتتىق كىتاپحاناسىنىڭ باس ديرەكتورى كاتارينا كريشتوفوۆا سلوۆاك وقىرمان قاۋىمىنا قازاق حالقىنىڭ ادەبي جانە ونەرلىك ءداستۇرىن تانىپ-بىلۋگە ​​مۇمكىندىك بەرەتىن ماعجان جۇماباي ولەڭ كىتابىنىڭ سلوۆاك تىلىندەگى العاشقى باسىلىمىنا قۇپتاۋ ءبىلدىردى. سونداي-اق ول جاستار اراسىندا كىتاپ وقۋدى ناسيحاتتاۋ ماقساتىندا بىرلەسكەن مادەني جوبالاردى قولداۋدىڭ ماڭىزدىلىعىنا توقتالدى.

ولەڭ جيناعىنىڭ اۋدارماشىسى فيلولوگيا پروفەسسورى ۆيكتوريا لياشۋك بەلگىلى اقىن، ادەبيەتتانۋشى يان گاۆۋرانىڭ جاردەمىمەن سەگىز ايدان استام ۋاقىتقا سوزىلعان ماعجان جۇماباي شىعارمالارىن كوركەم-ادەبي اۋدارماسىنىڭ كۇردەلى پروتسەسى تۋرالى ايتتى. ول قازاق پوەتيكالىق ءتىلىنىڭ بايلىعى مەن ءار الۋاندىلىعىن ەسكەرە وتىرىپ، اۋدارمانى ىسكە اسىرۋ وتە قىزىق شىعارماشىلىق پروتسەسس بولعانىن اتاپ ءوتتى.

سۋرەت قازاقستاننىڭ سلوۆاكياداعى ەلشىلىگىنىڭ سايتىنان الىندى

تۇساۋكەسەر اياسىندا ۇيىمداستىرىلعان «قازاقستان – ەۋرازيا جۇرەگى» اتتى فوتوكورمە دە سلوۆاكيا جۇرتشىلىعىنىڭ ۇلكەن قىزىعۋشىلىعىن تۋدىردى.

«سلوۆاكيا كىتاپحانالارى اپتاسى» جالپىۇلتتىق مادەني ءىس-شارانى سلوۆاكيا كىتاپحانالارى قاۋىمداستىعى (SAK) جانە سلوۆاكيا كىتاپحاناشىلارى مەن كىتاپحانالارى قوعامى (SSKK) ۇيىمداستىرادى. شارا جىل سايىن سلوۆاكيادا كىتاپ وقۋدى ناسيحاتتاۋ جانە جاڭا كىتاپ ونىمدەرىن تانىستىرۋ ماقساتىندا وتكىزىلەدى. ونىڭ اياسىندا سلوۆاك ەلىنىڭ تۇكپىر-تۇكپىرىندە كىتاپ كورمەلەرى، ادەبي وقۋلار، شىعارماشىلىق كەشتەر مەن جىر سايىستارى وتەدى.

Abai.kz