قر پارلامەنتى
سەناتىنىڭ توراعاسى ق.ك.توقاەۆقا،
قر پارلامەنتى ءماجىلىسىنىڭ
توراعاسى ن.ز.نىعماتۋلينگە،
پارلامەنتتىڭ بارلىق دەپۋتاتتارىنىڭ
نازارىنا!

تاۋەلسىز قازاقستان مەملەكەتىنىڭ باستى ماقسات-مۇراتى – قازاقستان حالقىنىڭ ەگەمەندىگى مەن تۇتاستىعى. بۇل باستى ستراتەگيالىق ساياساتتىڭ ايىرىلماس نەگىزدەرىنىڭ ءبىرى – شەت ەلدەگى قازاقتاردىڭ قازاقستانعا ورالىپ، ءوز ەلىنە قوسىلۋى. بۇنى مەملەكەتىمىز العاش تاۋەلسىزدىك العان ساتتە، پرەزيدەنت نۇرسۇلتان نازارباەۆ ايقىن ءتۇسىنىپ، 1991 جىلى 31 جەلتوقساندا «قازاق راديوسى» ارقىلى شەتەلدەگى بارشا قازاقتى قازاقستانعا كوشىپ كەلۋگە شاقىرعان بولاتىن.
ەلباسى ن.نازارباەۆتىڭ بۇل يگى ساياساتىن ۇكىمەت تە قولدادى. شەتتەگى قازاقتاردىڭ ەلگە ورالۋىنا ىڭعايلى شارت-جاعدايلار جاسادى. سونىڭ ارقاسىندا بۇگىنگە دەيىن ەلىمىزگە 900 مىڭنان استام قانداستارىمىز كوشىپ كەلدى.

قر پارلامەنتى
سەناتىنىڭ توراعاسى ق.ك.توقاەۆقا،
قر پارلامەنتى ءماجىلىسىنىڭ
توراعاسى ن.ز.نىعماتۋلينگە،
پارلامەنتتىڭ بارلىق دەپۋتاتتارىنىڭ
نازارىنا!

تاۋەلسىز قازاقستان مەملەكەتىنىڭ باستى ماقسات-مۇراتى – قازاقستان حالقىنىڭ ەگەمەندىگى مەن تۇتاستىعى. بۇل باستى ستراتەگيالىق ساياساتتىڭ ايىرىلماس نەگىزدەرىنىڭ ءبىرى – شەت ەلدەگى قازاقتاردىڭ قازاقستانعا ورالىپ، ءوز ەلىنە قوسىلۋى. بۇنى مەملەكەتىمىز العاش تاۋەلسىزدىك العان ساتتە، پرەزيدەنت نۇرسۇلتان نازارباەۆ ايقىن ءتۇسىنىپ، 1991 جىلى 31 جەلتوقساندا «قازاق راديوسى» ارقىلى شەتەلدەگى بارشا قازاقتى قازاقستانعا كوشىپ كەلۋگە شاقىرعان بولاتىن.
ەلباسى ن.نازارباەۆتىڭ بۇل يگى ساياساتىن ۇكىمەت تە قولدادى. شەتتەگى قازاقتاردىڭ ەلگە ورالۋىنا ىڭعايلى شارت-جاعدايلار جاسادى. سونىڭ ارقاسىندا بۇگىنگە دەيىن ەلىمىزگە 900 مىڭنان استام قانداستارىمىز كوشىپ كەلدى.
شەتتەن ورالعان قانداستارىمىز قازاقستان ازاماتتارىنىڭ قاتارىن تولتىرىپ، مەملەكەتىمىزدىڭ ۇلتتىق نەگىزىن بەكەمدەي ءتۇستى. ولار ەلىمىزدىڭ دەموگرافيا، ەكونوميكا، مادەنيەت، رۋحانيات، ءتىل، ءدىن، سالت-ءداستۇرىن نىعايتۋدا ءوز ۇلەستەرىن قوسۋدا. ولاردىڭ اراسىندا مايرا مۇحامەدقىزى، شۇعىلا ساپارعاليقىزى، وتانبەك ەڭسەحانۇلى، باقىت سارسەكباەۆ، قانات يسلام سەكىلدى ونەر، سپورت جۇلدىزدارى قازاقستاننىڭ اتىن الەمگە تانىتسا، قارجاۋباي سارتقوجاۇلى، باقىت بەجەنحانۇلى، تۇرسىنحان زاكەنۇلى، زاردىحان قيناياتۇلى، ءنابيجان مۇحامەتجان، دۇكەن ءماسىمحانۇلى سەكىلدى تاريحشى، شىعىستانۋشى عالىمدار عىلىم سالاسىندا قاجىرلى ەڭبەك ەتۋدە. رۋحانيات سالاسىندا جاقسىلىق ءساميتۇلى، الماس احمەتبەك، ءجادي شاكەنۇلى سىندى اقىن-جازۋشىلار بار. ودان وزگە دە مەديتسينا، ءبىلىم، جوعارى تەحنولوگيا سالاسىندا كوپتەگەن تالانتتى ماماندار قىزمەت ەتۋدە.
2013 جىلدىڭ 7 قاراشا كۇنى سەنات دەپۋتاتتارى «ەڭبەك كوشى-قونى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قاراپ، ماجىلىسكە كەرى قايتاردى. ءبىز بۇل ءۇشىن سەنات توراعاسى قاسىم-جومارت توقاەۆ پەن سەناتورلارعا ۇلكەن ريزاشىلىعىمىزدى بىلدىرەمىز. وسىعان دەيىن زاڭ جوباسىن ءۇن-ءتۇنسىز بەكىتىپ، سەناتقا جىبەرگەن ءماجىلىس دەپۋتاتتارىنىڭ تۇسىنىكسىز ارەكەتىنە قاتتى الاڭداعان ەدىك. سەبەبى، اتالعان زاڭ جوباسىندا ەلگە كەلگەن قانداستارىمىزعا 5 جىل بويى ازاماتتىق بەرىلمەۋ قاراستىرىلعان. ەگەر زاڭداعى بۇل بەلگىلەمەلەر كۇشىنە ەنەتىن بولسا، شەتتەگى قانداستارىمىزدىڭ ەلگە قوسىلۋى ۇلكەن تراگەديالىق جاعدايعا ۇشىرايتىنى انىق ەدى. ال، پرەزيدەنت ن.نازارابەۆ العا قويعان قازاق ۇلتىنىڭ تۇتاستىعىنا اۋىر نۇقسان كەلەدى دەپ ەسەپتەيمىز. سوندىقتان ءماجىلىس الداعى وتىرىستارىندا اتالعان زاڭدى مۇقيات قاراپ، شەتەلدەگى جانە ەلىمىزدەگى ميلليونداعان قازاقتاردىڭ تاعدىرىنا سەلقوس قاراماۋىن سۇرايمىز.
زاڭ جوباسىنداعى بۇل وزگەرىستەر حالىقارالىق زاڭ تالاپتارىنا دا قايشى. ماسەلەن بۇۇ-نىڭ «ازاماتتاردىڭ بىرىڭعاي قۇقىق دەكلاراتسياسىندا» كەز-كەلگەن وتباسى مۇشەلەرىن ءبىر-بىرىنەن ءماجبۇرلى ايىرۋعا جول بەرىلمەيدى دەلىنگەن. قازىرگى كۇنى ەلىمىزگە ورالىپ، ازاماتتىق العان قانداستارىمىزدىڭ جاقىن تۋىستارى، اكە-شەشەسى، بالاسى، بىرگە تۋعان باۋىرلارى ءالى شەتەلدە. ولار دا الداعى ۋاقىتتا قازاقستانعا تۇپكىلىكتى قونىستانۋعا كوشىپ كەلمەكشى. ەگەر وسى ادامدارعا 5 جىل بويى ازاماتتىق بەرىلمەسە، ولار قازاقستاندا تۇرىپ جاتقان وتباسى مۇشەلەرىنەن اجىراپ قالادى.
بۇگىنگى تاڭدا قازاقستانمەن قاتار رەسەي، گەرمانيا، يزرايل، گرەكيا، پولشا سىندى ءوز قانداستارىن ەلىنە شاقىرىپ جاتقان ەلدەردىڭ تاجىريبەلەرى كوڭىل اۋدارۋعا تۇرارلىق. ماسەلەن، رەسەي پرەزيدەنتى ۆ.پۋتين بۇكىل الەمدەگى ورىستاردى ەلىنە شاقىرىپ، ماتەريالدىق جاقتان كولەمدى كومەك بەرۋدە. گەرمانيا نەمىس قاندى ازاماتتاردىڭ ءبارىن ەش كەدەرگىسىز قابىلداۋدا. ال، يزرايل ەلى ءوز مەملەكەتتەرىنە كەلگەن ازاماتتاردىڭ اكەسى باسقا ۇلت بولعانىمەن، شەشەسى نە اجەسى ەۆرەي ۇلتىنىڭ وكىلى ەكەنى راستايتىن قۇجاتى بولعان قانداستارىنىڭ بارىنە سول كۇنى ازاماتتىق بەرىپ جاتىر. سونىڭ ارقاسىندا بۇگىنگى كۇنى يزرايل مەملەكەتى دۇنيە جۇزىنەن ورالعان 1 ميلليون قانداسىن وزدەرىنە قوسىپ الدى. دەرەك ءۇشىن ايتا كەتسەك، بۇگىندە يزرايل ەلىنىڭ 25 پايىز حالقى بۇرىنعى كەڭەس وداعى قۇرامىنداعى رەسپۋبليكالاردان بارعان قانداستارى ەكەن.

قۇرمەتتى قاسىم-جومارت كەمەلۇلى!
قۇرمەتتى نۇرلان زايروللاۇلى!
قۇرمەتتى دەپۋتاتتار!

سىزدەردەن اتالعان زاڭ جوباسىنداعى ورالماندارعا قاتىستى باپتاردىڭ ءبارىن الىپ تاستاۋدى وتىنەمىز. ورالمانداردىڭ ازاماتتىق الۋىنا قاتىستى قانداي دا ءبىر ۋاقىت شەكتەمەسىن قويۋدىڭ قاجەتى جوق. ءوز قانداستارىمىزدى قازاقستانعا شەتەلدەن ۋاقىتشا جۇمىس ىزدەپ كەلۋشى كەلىمسەك باسقا ۇلت وكىلدەرىمەن (تاجىك، وزبەك، گرۋزين، تۇرىك، قىتاي ت.ب) قاتار قويۋ ۇلكەن قاتەلىك دەپ سانايمىز. ويتكەنى، مەملەكەتتى قۇراۋشى قازاق ۇلتىنىڭ قاتارى كوبەيگەندە عانا قازاقستان مەملەكەتى الەمدىك قاۋىمداستىقتا ىرىقتى ورىنعا يە بولادى.
قۇرمەتتى پارلامەنت مۇشەلەرى!
سونىمەن قاتار، سىزدەردەن ورالماندارعا كۆوتا بەرۋ ماسەلەسىن دە قالپىنا كەلتىرۋدى سۇرايمىز. جانە قازاقستان مەملەكەتىنىڭ تاۋەلسىزدىگىن نىعايتۋدا، ءارى قورعاۋدا شىن جاناشىر بولا بىلەتىن شەتتەگى قانداستارىمىزدىڭ ەلىمىزگە كوپتەپ كەلۋىنە جول اشادى دەپ سەنەمىز!

استانا قالالىق «مەملەكەتتىك ءتىل»
قوعامدىق قوزعالىسى» قوعامدىق بىرلەستىگىنىڭ توراعاسى س.باتىرشاۇلى
Abai.kz