الماتىدا جەر سىلكىنىسى سالدارىنان ۇيىنە جارىقشاقتار پايدا بولعان قالا تۇرعىندارىنا مەملەكەتتەن وتەماقى بەرىلەدى. بۇل تۋرالى ونەركاسىپ جانە قۇرىلىس مينيسترلىگىنىڭ وكىلدەرى مالىمدەدى، دەپ حابارلايدى Abai.kz اقپاراتتىق سايتى.

قاڭتار جانە ناۋرىز ايلارىنداعى جەر سىلكىنىسى سالدارىنان الماتىداعى كەيبىر ۇيلەردىڭ قابىرعاسى سوگىلىپ، جارىقشاقتار پايدا بولعان. ادام ومىرىنە قاۋىپ ءتوندىرۋى مۇمكىن دەپ بولجاممەن بۇگىنگى كۇنگە دەيىن 188-گە جۋىق قالا تۇرعىنى ءوتىنىش بىلدىرگەن. ولارعا مەملەكەتتەن كومەك كورسەتىلۋى مۇمكىن.

ول ءۇشىن الدىمەن قالا تۇرعىندارى باسپانالارىنىڭ زاقىمدانعانىن دالەلدەپ، اكىمدىككە ءوتىنىش بەرەدى. سودان كەيىن ارنايى قۇرىلعان كوميسسيا مۇشەلەرى عيماراتتاردى جان-جاقتى ساراپتامادان وتكىزىپ، تىرەك قۇرىلىمدارىنىڭ بۇزىلۋى نەمەسە توبە، سىلاق، قاسبەتتى ارلەۋ سياقتى جۇمىستارعا نازار اۋدارىپ، زەرتتەيدى.

قالپىنا كەلتىرۋ جۇمىسىن قارجىلاندىرۋعا كەلەر بولساق، الەۋمەتتىك نىساندار بۇلىنگەن جاعدايدا جوندەۋ جۇمىستارى بيۋدجەت قاراجاتى ەسەبىنەن جۇرگىزىلمەك. ال، تۇرعىن ۇيلەرگە قاۋىپ توندىرەتىن زاقىم بولسا، وندا مەملەكەتتىك ورگانداردىڭ بيۋدجەتىنەن قارجى بولىنەدى. ازىرگە ءتىزىم جيناقتالىپ جاتىر.

"تابيعي جانە تەحنوگەندىك سيپاتتاعى توتەنشە جاعدايلاردىڭ سالدارىنان قيراعان تۇرعىن ءۇي قۇرىلىسىنا قازاقستان رەسپۋبليكاسى ۇكىمەتىنىڭ جانە جەرگىلىكتى اتقارۋشى ورگانداردىڭ رەزەرۆتەرىنەن قاراجات بولىنگەن جاعدايدا وبلىستىڭ جەرگىلىكتى اتقارۋشى ورگاندارى راستاۋشى قۇجاتتاردىڭ نەگىزىندە تۇرعىن ءۇيى اۆاريالىق دەپ تانىلعان زارداپ شەككەن ازاماتتاردىڭ ءتىزىمىن ۇسىنادى. عيماراتتار مەن قۇرىلىستاردىڭ تيىمدىلىگىن جانە ورنىقتىلىعىن تەحنيكالىق زەرتتەپ-قاراۋدان كەيىن عانا انىقتالادى", – دەدى قر ونەركاسىپ جانە قۇرىلىس مينيسترلىگى تۇرعىن ءۇي قۇرىلىسى باسقارماسىنىڭ باسشىسى امانتاي تەلقوجا.

Abai.kz