1,5 ملن قازاقستاندىق نەسيەسىن 90 كۇننەن بەرى تولەي الماي ءجۇر. وسى جانە باسقا دا سەبەپتەرمەن ەلىمىزدە ميكروقارجىلىق ۇيىمداردىڭ نەسيە ۇستەمەاقىسى تومەندەيتىن بولدى. بۇل تۋرالى قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ولجاس قيزاتوۆ ايتتى، دەپ حابارلايدى Abai.kz.

ول مۇنداي جاڭاشىلدىق جاڭا زاڭدا كورسەتىلگەنىن اتاپ ءوتتى. سونداي-اق زاڭداعى باستى وزگەرىستەردىڭ ءبىرى ميكروقارجىلىق ۇيىمداردىڭ نەسيە پايىزىنا قاتىستى ەكەنىن ايتتى.

- زاڭ جوباسىنداعى باستى وزگەرىستەردىڭ ءبىرى - قازاقستان تەرريتورياسىندا بەرىلەتىن نەسيەلەر ونى بانك، ميكروقارجىلىق ۇيىم نەمەسە ونلاين نەسيەلەۋدىڭ قايسىسى بەرسە دە، جىلدىق پايىزدىق مولشەرلەمەمەن ەسەپتەلەتىن بولادى. بۇعان ونلاين نەسيە بەرەتىن ۇيىمداردىڭ ەرەكشە ستاتۋسى بولعان ەدى. 50 اەك-گە دەيىن قارىز بەرەتىن ونلاين نەسيە ۇيىمدارى نومينالدى پايىزدىق مولشەرلەمە قويۋىنا بولاتىن ەدى. نومينالدى مولشەرلەمە جىلدىق پايىزدىق مولشەرلەمەمەن ەسەپتەگەننەن قاراعاندا جوعارى پروتسەنت قوسىلاتىن ەدى. ەندى ءبىز ونلاين نەسيەلەندىرۋدەن وسى ستاتۋسىن جويدىق.

2024 جىلدىڭ 1 ساۋىرىندەگى جاعداي بويىنشا تۇتىنۋشىلىق قارىزداردىڭ جالپى سوماسى 14,2 ترلن تەڭگەنى قۇرايدى. ونىڭ ىشىندە 90 كۇننەن كەشىكتىرىلگەن نەسيەلەردىڭ سانى 1,6 ترلن تەڭگە، بۇل 12 پايىز. تۇتىنۋشىلىق نەسيە العان قارىز الۋشىلاردىڭ سانى 8,4 ملن ادام. 1,5 ملن ادام نەسيە تولەمىن 90 كۇننەن كەشىكتىرگەن، - دەدى قيزاتوۆ.

Abai.kz