بولجام بويىنشا بيىل جاز وتە ىستىق بولادى. بۇل تۋرالى Abai.kz حابارلايدى.

وسىعان سايكەس قازاقستاندا بارلىق قىزمەتتەردىڭ ءورت ءسوندىرۋ ماۋسىمىنا دايىندىعى قاداعالاناتىن بولادى. مۇنداي تاپسىرمانى باس پروكۋرور بەرىك اسىلوۆ بەردى.

دۇنيەجۇزىلىك مەتەورولوگيالىق ۇيىمنىڭ جاز وتە ىستىق بولادى دەگەن بولجامىنا قاتىستى اسىلوۆ ءوزىنىڭ پاراقشاسىندا حابارلامامەن ءبولىستى.

"ورمان ورتتەرىنىڭ شىعۋ ىقتيمالدىعى جوعارى. مەنىڭ تاپسىرمام بويىنشا ىقتيمال تاۋەكەلدەردى ازايتۋ ماقساتىندا وبلىس پروكۋرورلارى بارلىق قىزمەتتەردىڭ ءورت قاۋپى ماۋسىمىنا دايىندىعىن ساراپتايدى", – دەدى اسىلوۆ.

بۇدان بۇرىن حابارلانعانداي، ۇكىمەت 2023-2027 جىلدارى ورمان شارۋاشىلىعى كاسىپورىندارىن ماتەريالدىق-تەحنيكالىق جاراقتاندىرۋدى نىعايتۋعا رەكوردتىق 68 ملرد تەڭگە بولگەن. قازاقستاننىڭ ورمان شارۋاشىلىعىنىڭ بالانسىنداعى، ونىڭ ىشىندە ءورت سوندىرۋگە ارنالعان تەحنيكانىڭ ابدەن توزىعى جەتكەن.

Abai.kz