بايان-ولگەي قازاقتارىنىڭ انا تىلىندە سويلەۋى موڭعوليا ۇكىمەتىن الاڭداتا باستادى. وعان موڭعوليانىڭ  ءبىلىم جانە عىلىم ءمينيسترى  ل.گانتومەردىڭ  ەلدىڭ پارلامەنتىندە ايتقان ءسوزى كۋا.

بايان-ولگەي قازاقتارىنىڭ انا تىلىندە سويلەۋى موڭعوليا ۇكىمەتىن الاڭداتا باستادى. وعان موڭعوليانىڭ  ءبىلىم جانە عىلىم ءمينيسترى  ل.گانتومەردىڭ  ەلدىڭ پارلامەنتىندە ايتقان ءسوزى كۋا.

بەيسەنبى كۇنى  موڭعوليا پارلامەنتىندە ءبىلىم جانە عىلىم ءمينيسترى  ل.گانتومور  دەپۋتاتتاردىڭ ساۋالدارىنا جاۋاپ بەردى. ءبىزدىڭ ۇعىمداعى  «ۇكىمەت ساعاتى» ءوتتى. سول وتىرىستا  دەپۋتات د.لۇندەەجانتساننىڭ «بايان-ولگەي ايماعىندا موڭعول ءتىلىن وقىتۋ دەڭگەيى قانداي؟ سول ايماقتا جۇمىس ىستەپ جۇرگەنىمدە جاستار موڭعولشا تۇسىنبەي، اۋدارماشى پايدالاناتىن. قازىر قالاي؟» دەگەن سۇراعىنا مينيستر ل.گانتومور: «بايان-ولگەيدە موڭعول ءتىلىن وقىتۋ وتە  جامان. ايماق باسشىلارى  موڭعول  ءتىلىن وقىتۋ   ماسەلەسىنە  وتە  نەمقۇرايلى  قارايدى. موڭعول ءتىلىن جوعارى وقۋ ورنىنا تۇسكەندە  ۇيرەنىپ الادى دەگەن  پىكىردە. ماسەلەنى شەشۋ ءۇشىن ءپارلامانتتىڭ (ۋلسىن يح حۋرال) جالپى وتىرىسىندا، كوميتەت وتىرىستارىندا ايتىپ، كوتەرۋ كەرەك. مينيسترلىك تاراپىنان  بىرقاتار تالپىنىستار جاسالعانىمەن،  ناتيجەسىز بولدى»  دەپ جاۋاپ بەردى. ءسويتىپ،  موڭعولدار التايدىڭ قوبدا بەتىن جايلاعان  قازاقتاردىڭ انا تىلدەرىن ساقتاپ قالۋىنا كەدەرگى جاساماق نيەتتە. ءتىپتى، ينتەرنەت فورۋمداردا  «موڭعوليا قازاقتارىن اسسيملياتسياعا ۇشىراتىپ، حالقاعا  ءسىڭىرۋ كەرەك»، «قازاق قىزدارىن الداپ قولعا تۇسىرىڭدەر دە  ۇيلەنىپ الىڭدار»، «قازاقتار بايان-ولگەيدى قازاقستانعا قوسپاقشى»   دەپ ۇرانداتىپ جاتقاندار دا بار.

جالپى، سوڭعى كەزدەرى  موڭعولياداعى  قازاقتارعا  قارسى كەيبىر ساياسي كۇشتەردىڭ   ارانداتۋ ارەكەتتەرى بايقالىپ ءجۇر. بيىل كوكتەمدە  اقپارات  قۇرالدارى موڭعوليا قازاقتارىنىڭ ىشىنەن  شىققان ديپلومات سايران قاجى قادىرۇلىن «قازاقستاننىڭ پايداسىنا   شپيوندىق  جاسادى» دەپ ايىپتاعان بولاتىن. (http://www.zhebe.com/index.php/lem/item/521-mo-oldar-sajran-kadyr-lyn-shpion-dep-zhatyr.htmlء) تىپتى، موڭعوليانىڭ بارلاۋ باس باسقارماسى  مامىر ايىندا سايران قادىرۇلىنان جاۋاپ الۋ ءۇشىن شاقىرتقان ەدى. ەندى مىنە، بايان-ولگەيلىك  قازاقتاردىڭ تىلىنە دە قىسىم تۇسەتىن سياقتى. موڭعوليا  ءبىلىم جانە عىلىم  مينيسترلىگى  بايان-ولگەيدە موڭعول ءتىلىنىڭ كەڭ قانات جايۋى ءۇشىن  دەپۋتاتتاردىڭ قولداۋىن  سۇراپ  وتىر. ءسويتىپ، موڭعولياداعى قازاق دياسپوراسىنىڭ  انا تىلىنە قىسىم جاساي باستادى. كۇنى ەرتەڭ پارلامەنت قولدايتىن بولسا، بايان-ولگەيدە  قازاق تىلىندە ءبىلىم بەرۋگە  شەكتەۋ دە قويىلۋى مۇمكىن. وسىلايشا اتاجۇرتقا كەلگەنىمەن 4 جىلسىز ازاماتتىق الا المايتىن كۇيگە تۇسكەن شەتەلدەگى اعايىننىڭ  تاعى ءبىر توبىنىنىڭ باسىنا بۇلت ءۇيىرىلدى. سول قازاقتاردى قازاق ەتىپ وتىرعان تىلگە قىسىم كورسەتۋ باستالدى.  «مۇنداعى حالىق موڭعول ءتىلىن  بىلمەيدى، باستاۋىش مەكتەپتى دە  موڭعولشا قىلۋ كەرەك!» دەيتىن ۇسىنىستار شىقپاسىنا، ونى موڭعول  ۇكىمەتى جۇزەگە اسىرماسىنا  كىم كەپىل؟!  قىسقاسى، اتاجۇرتىنا بارسا دا الدارىنان «التىن زاڭ» كۇتىپ تۇرعانىن ءبىلدى مە، ايتەۋىر ات توبەلىندەي  موڭعولدىڭ ءوزى  قوبدا بەتىندەگى قازاققا ازۋىن كورسەتە باستادى.
 

P.S.

وزگە جۇرت  مەملەكەتتىك تىلىدەرىن بارىنشا قاستارلەپ، قورعاپ-قولپاشتاپ جاتىر. سول جولدا  وزگەگە اشىق قىسىم جاساۋعا دا بار. موڭعولدى دا تۇسىنۋگە بولار بالكىم، انا تىلدەرى ءۇشىن جانتالاسىپ جاتقان شىعار. ال ءبىز شە؟

Abai.kz