31 مامىر - ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى.

الماتىلىقتار  قۋعىن-سۇرگىنگە ۇشىراعانداردى ءبىر مينۋت ۇنسىزدىكپەن ەسكە الىپ، ەسكەرتكىشكە گۇل شوقتارىن قويدى.

بۇل كۇن حح عاسىردىڭ تاريحي شەجىرەسىنىڭ ەڭ اۋىر كەزەڭدەرىنىڭ ءبىرى – جاپپاي ساياسي قۋعىن-سۇرگىن جانە اشارشىلىق قۇرباندارىن ەسكە الۋعا، رۋحىنا تاعزىم ەتۋگە ارنالعان.

گۇل قويۋ راسىمىنە قۋعىن-سۇرگىنگە ۇشىراعان جانداردىڭ ۇرپاقتارى، قالا حالقى، 1986 جىلى جەلتوقسان وقيعاسىنا قاتىسۋشىلار مەن جاستار ۇيىمدارىنىڭ وكىلدەرى دە قاتىستى.

"قاراعايلى" سكۆەرىندە وتكەن ءىس-شارادا "ادىلەت" تاريحي-اعارتۋشىلىق قوعامىنىڭ باسشىلارى مەن 1938 جىلى قۋعىن-سۇرگىنگە ۇشىراعان قازاق تەاتر ونەرىنىڭ نەگىزىن قالاۋشىلاردىڭ ءبىرى جۇمات ءشانيننىڭ نەمەرەسى رايحان شانينا ءسوز سويلەدى.

قۋعىنعا ۇشىراعان 100 مىڭنان استام ادامدى ەسكە الۋ كۇنى 1997 جىلدان بەرى اتالىپ كەلەدى.

بۇل كۇنى قالادا كونفەرەنتسيا، دوڭگەلەك ۇستەل، تاريحي-اعارتۋشىلىق ءدارىس، تەاترلاندىرىلعان قويىلىم، كىتاپحانالارداعى فوتو جانە كىتاپ كورمەسى، جاستاردىڭ زيالى قاۋىم وكىلدەرىمەن كەزدەسۋى سىندى ءتۇرلى ەسكە الۋعا ارنالعان ءىس-شارالار وتەدى.

Abai.kz