توتەنشە جاعدايلار مينيسترلىگى 3-4 ماۋسىمدا ەلىمىزدىڭ سەيسميكالىق قاۋىپتى وڭىرلەرىندە "جەر-2024" رەسپۋبليكالىق كوماندالىق-شتابتىق وقۋ-جاتتىعۋى وتەتىنىن حابارلادى. اتالمىش وقۋ-جاتتىعۋ الماتى، شىمكەنت قالالارى مەن اباي، جەتىسۋ، الماتى، شىعىس قازاقستان، جامبىل، قىزىلوردا جانە تۇركىستان وبلىستارىندا وتەدى.

"3 ماۋسىم ساعات 10:00-دە جويقىن جەر سىلكىنىسىنە ۇشىراۋ مۇمكىندىگى بار اتالعان وڭىرلەردە «بارشانىڭ نازارىنا!» سيرەنا-سويلەۋ قۇرىلعىلارىن ىسكە قوسىلادى. سونداي-اق، ادام كوپ جينالاتىن وبەكتىلەردە سەيسميكالىق جاتتىعۋلار وتكىزىلەدى", – دەپ جازىلعان حابارلامادا.                 

وقۋ-جاتتىعۋدىڭ ماقساتى ازاماتتىق قورعاۋدىڭ مەملەكەتتىك جۇيەسىنىڭ جويقىن جەر سىلكىنىسى ناتيجەسىندە تۋىنداعان توتەنشە جاعدايدى جويۋعا دايىندىق دەڭگەيىن ارتتىرۋ ماقساتىندا جۇرگىزىلەدى.

اتالمىش ءىس-شارا رەسپۋبليكالىق جانە وڭىرلىك ازاماتتىق قورعاۋ قىزمەتتەرىنىڭ، جەرگىلىكتى اتقارۋشى ورگانداردىڭ قاتىسۋىمەن، شارتتى تۇردە جويقىن  سىلكىنىس كەزىندەگى ءىس-ارەكەتتەردى پىسىقتاۋ ارقىلى وتكىزىلەدى.   

ونىڭ بارىسىندا اۆاريالىق-قۇتقارۋ جۇمىستارى، زارداپ شەككەن تۇرعىنداردى شۇعىل قابىلداۋ پۋنكتتەرى، ولاردى قابىلداۋ مەن كومەك كورسەتۋگە ارنالعان پالاتكالىق لاگەرلەر مەن دالالىق مەديتسينالىق اۋرۋحانالار كورسەتىلەتىن بولادى.

Abai.kz