مادەنيەت جانە اقپارات ۆيتسە-ءمينيسترى قانات ىسقاقوۆ يمامداردىڭ جەلىدە ۋاعىز ايتۋى جايلى سۇراققا جاۋاپ بەردى، دەپ حابارلايدى Abai.kz.

بۇگىن  جۋرناليستەر ىسقاقوۆتان قازاقستاندا وزبەكستانداعىداي يمامدارعا جەلىدە ۋاعىز ايتۋعا تىيىم سالىنا ما دەپ سۇراعان.

– ءسوزسىز، بۇل ماسەلەدەن حاباردارمىز. الايدا الەۋمەتتىك جەلى دە ءوز ازاماتتارىمەن تىلدەسۋدىڭ ءبىر جولى. سول سەبەپتى باسقا نۇسقالاردى قاراستىرىپ جاتىرمىز، بىراق ولارعا (يمامدارعا) الەۋمەتتىك جەلى تۇرلەرىنە تىيىم سالۋ ماسەلەسى كۇن تارتىبىندە جوق، – دەپ جاۋاپ بەردى ىسقاقوۆ.

ۆيتسە-ءمينيستردىڭ ايتۋىنشا، يمامدار جاماعاتىمەن ونلاين دا، وفلاين دا، ستريم ارقىلى دا سويلەسە الادى.

ەسكە سالا كەتەيىك، 27 مامىردا وزبەكستان مەشىتتەرىنىڭ بارلىق يمامدارى الەۋمەتتىك جەلىلەرگە كىرمەۋ جانە الەۋمەتتىك جەلىلەردەگى جازبالارعا "لايك" قالدىرماۋ تۋرالى ەسكەرتۋ العان.

Abai.kz