قۇرمەتتى اسەكە!
پارلامەنت مىنبەرىندە سويلەپ تۇرعان جوقپىن، «پالەنشە تۇگەنشەەۆيچ» دەپ سىزىلاتىنداي، قازاقى قالپىمىزبەن ءوزىمسىنىپ، جاقىن تارتىپ جاتقانىما  ايىپ ەتپەسسىز. دەسە دە، ءدال سول پارلامەنت مىنبەرىندە ءسىز سوزدەن وڭباي ءسۇرىندىڭىز. ونى ادەتتە سوزگە ساق سپيكەر دە بايقاماي قالعان سەكىلدى. (الدە بايقادى ما ەكەن). قالجىڭداپ ايتتىڭىز با، شىن ءسوزىڭىز سول ما، ايتەۋىر «مينيستر بولعانىمنىڭ ءبىر پايداسى ءتيىپ، بالامدى مەملەكەتتىك بالاباقشاعا ورنالاستىردىم» دەدىڭىز. بالكىم سىزگە ۇساق-تۇيەك شارۋا كورىنۋى مۇمكىن، ءبىز ءۇشىن، نەشە جىلدان بەرى مەملەكەتتىك بالاباقشا كەزەگىن سارىلا، سارعايا توسىپ جۇرگەن مىڭداعان اتا-انا ءۇشىن الگى سوزدەرىڭىز كەلەكە-مازاق بولىپ ەستىلدى. قازىر استانا قالاسى بويىنشا عانا 70 مىڭعا جۋىق ءبۇلدىرشىن مەملەكەتتىك بالاباقشا كەزەگىندە تۇر ەكەن. مىنا تۇرىمەن ولار ەس ءبىلىپ، ەسەيگەنشە سول كەزەگىنە جەتە المايدى. وسىنى بىلە تۇرا، ءسىز «مينيستر بولعانىمنىڭ ارقاسىندا، بالامدى مەمباقشاعا ورنالاستىردىم» دەپ ماقتاناسىز، بۇل ماقتانىڭىز الگى 70 مىڭ بۇلدىرشىنگە، ولاردىڭ اتا-اناسىنا مازاق بولىپ ەستىلمەگەندە قايتسىن؟!
مەن دە ءسىز سياقتى اتا-انامىن. ءدال ءسىز سەكىلدى وسىدان 3 جارىم جىل بۇرىن بالامدى مەملەكەتتىك بالاباقشا كەزەگىنە قويعان ەدىم. ەكىنشى بالامدى دۇنيەگە كەلە سالىسىمەن تىركەتكەم، كەزەككە. مىنە ءتورتىنشى جىلعا اياق باسقالى وتىرمىز، كەزەكتىڭ قوزعالار ءتۇرى كورىنبەيدى. قازىر ەكەۋى دە جەكە مەنشىك بالاباقشاعا بارادى. اي سايىن تاپقان-تايانعانىمىزدىڭ جارتىسىن ساناپ بەرەمىز. ءۇيىمىزدىڭ جانىندا ەكى قاباتتى ءزاۋلىم ءارى جاڭا مەملەكەتتىك بالاباقشا بار. جانىنان ارى-بەرى وتكەندە بالام سۇرايدى: «اكە، انا بالاباقشا نەگە ۇلكەن دە، بىزدىكى ودان نەگە كىشكەنتاي؟ مەن دە سول ۇلكەن باقشاعا بارسام بولا ما؟» دەپ. ءسابي عوي، قايدان ءبىلسىن، ءبىزدىڭ ەلدە مەملەكەتتىك يگىلىكتەردى قاراپايىم حالىقتان بۇرىن، قۇرىعى ۇزىنداردىڭ، شەندى-شەكپەندىلەردىڭ يەلەنىپ تۇرعانىن. ءيا، ءدال سولاي، مەملەكەتتىك باعدارلاما بويىنشا باستىقتار ءۇي الادى، بالالارى مەملەكەتتىك بالاباقشاعا بارادى. وعان قىمسىنىپ جاتقان ەشكىم جوق. قىمسىنۋىڭىز نە، ەلگە ماقتانىپ جار سالادى. لاۋازىمىن اسىرا پايدالانۋ بىلە بىلسەڭىز، قىلمىس، مينيستر مىرزا! باسقا ەلدە بولسا،  وسى ءىسىڭىز ءۇشىن سوتتالىپ كەتۋىڭىز دە بەك مۇمكىن ەدى. ال ءبىزدىڭ ەلدە بۇل قالىپتى جاعدايعا اينالدى. پرەزيدەنتتىڭ ءوزى سىنعا الماسا، ەشكىم دە «قاراپايىم حالىققا زيانىم ءتيىپ جاتىر عوي» دەمەيدى. «قولجەتىمدى باسپاناعا» قول جەتكىزە الماي زار يلەپ جۇرگەن قانشاما جاس وتباسىنا، مەملەكەتتىك بالاباقشانىڭ كەزەگىن زارىعا كۇتىپ، ۇمىتتەنىپ جۇرگەن اتا-انالارعا وبالىم تيەدى-اۋ» دەپ تە الاڭدامايدى ەشكىم. قولدان كەلىپ تۇرعاندا قونىشتان باسادى ءسىز سياقتى. الىسقا بارىپ قايتەمىز، ءوزىڭىز باسقارىپ وتىرعان مەكەمەدە جەمقورلىققا قاتىستى بىرنەشە ءىس تىركەلدى سوڭعى كەزدە. ميلليوندار قولدى بولدى. باسقاسى باسقا، ءبىلىم، دەنساۋلىق سەكىلدى سالالاردان اقشا جىمقىرۋ دەگەنىڭىز بارىپ تۇرعان باسسىزدىق دەمەسكە لاجىمىز جوق. ەلىمىزدىڭ ءبىلىم سالاسىن وسىنداي اشكوز، توعىشار ادامدار باسقارعانىن ويلاعاندا، بولاشاعىڭا الاڭداپ، باز كەشەدى ەكەنسىڭ.
اسەكە، «باسقا پالە تىلدەن» دەگەن قازاق. ءوزىڭىز ءجيى جۇگىنەتىن ورىس تىلىندە دە وسى تاقىلەتتەس ناقىل سوزدەر از ەمەس-اۋ. باسقا-باسقا، سوزدەن سۇرىنگەن قانداي بولاتىنىن «باس مۇعالىم» ءسىز ءبىلۋىڭىز كەرەك ەدى. نە دە بولسا، استانا قالاسى بويىنشا بالاباقشا كەزەگىندە تۇرعان 70 مىڭداي ءبۇلدىرشىننىڭ ءۇمىتىن سوندىرگەندەي بولدىڭىز، ءبارىنىڭ اكەسى مينيستر ەمەس قوي ويتكەنى. ءجا، ء«بىر سوزىمە بولا سونشا، جەردەن الىپ، جەرگە سالعانى نەسى؟» دەمەڭىز، ارتىق كەتسەم عافۋ ەتەرسىز. قىزمەتكە جاڭادان تاعايىندالدىڭىز عوي، ونى دا ەسكەرەيىك، مەيلى. تەك الدىڭىزداعى ارىپتەستەرىڭىز سەكىلدى، تاعى دا رەفورما جاسايمىن دەپ تىراشتانباي، بۇرىننان قوردالانىپ قالعان ماسەلەلەردى شەشۋگە تىرىسساڭىز يگى ەدى. ماسەلەنكي، ءوز بالاڭىزدى مەملەكەتتىك بالاباقشاعا ورنالاستىرىپ قانا قويماي، مىڭداعان ءبۇلدىرشىننىڭ دە كۇرمەۋلى ماسەلەسىنىڭ شەشىلۋىنە ۇلەس قوسساڭىز، حالىقتىڭ العىسىنا بولەنەر ەدىڭىز!