قازاقستاندىقتار زەينەت جاسىنا كەلىسپەي، ءوزارا پەتيتسيا جاريالاپ جاتىر. ونلاين-پەتيتسيا بەرۋگە ارنالعان پلاتفورمادا جاڭا باستاما كوتەرىپ، زەينەت جاسىن قايتا قاراۋعا ۇسىنىس بەرۋدە.

ePetition سايتى قازاقستاندىقتارعا بەلگىلى ءبىر ماڭىزدى ماسەلەلەر بويىنشا ۇجىمدىق ۇندەۋ قۇرۋ مۇمكىندىگىن بەرۋ ماقساتىندا ازىرلەنگەن.

اتالمىش سايتتىڭ باسىندا وزگەلەردەن وق بويى وزىق تۇرعان زەينەت جاسىن تومەندەتۋ تۋرالى پەتيتسيا تۇر. ول قازىردىڭ وزىندە 1900-گە جۋىق قول جيناپ ۇلگەردى.

پەتيتسيانىڭ سيپاتتاماسىندا اۆتورلار ايەلدەردىڭ زەينەت جاسىن 55 جاسقا، ال ەرلەردىڭ زەينەت جاسىن 58 جاسقا دەيىن تومەندەتۋدى تالاپ ەتەتىنى اتاپ وتىلگەن.

جوعارىدا اتالعان زەينەت جاسى كورشىلەس ەلدەردىڭ: قازاقستان توڭىرەگىندە ورنالاسقان موڭعوليا، قىتاي، وزبەكستان، قىرعىزستان جانە رەسەيدىڭ زەينەت جاسىمەن سالىستىرا وتىرىپ، نەگىزدەلگەن. بىردەي كليماتتىق جاعدايدا، بىردەي ءومىر ءسۇرۋ ۇزاقتىعىمەن قازاقستاندا ەرلەردىڭ زەينەتكە شىعۋى 63 جاستان بەلگىلەندى، 2028 جىلدان كەيىن ايەلدەر دە 63 جاستان زەينەتكە شىعادى، بۇل ءبىزدى قورلاۋ.

قازاقستان رەسپۋبليكاسىنىڭ بارلىق تۇرعىنىنىڭ لايىقتى جانە ساپالى ءومىر ءسۇرۋى ءۇشىن قازاقستاندا بارلىق رەسۋرس بار: مۇناي، گاز، التىن، ۋران جانە باسقا دا پايدالى قازبالار. بارلىق قولدا بار رەسۋرستى دۇرىس باسقارعان جاعدايدا، قازاقستان الەمدەگى ەڭ باي ەلدەردىڭ بىرىنە اينالا الادى. جوعارىدا ايتىلعانداردى نەگىزگە الا وتىرىپ، قازاقستان رەسپۋبليكاسى كونستيتۋتسياسىنىڭ 33-بابىندا بەكىتىلگەن كونستيتۋتسيالىق قۇقىقتارىمىزدى پايدالانىپ، ايەلدەردىڭ زەينەت جاسىن 55 جاسقا، ال ەرلەردىڭ زەينەت جاسىن 58 جاسقا دەيىن تومەندەتۋدى تالاپ ەتەمىز، - دەيدى پەتيتسيا اۆتورلارى.

Abai.kz