ۇكىمەت سۋ تاسقىنى سالدارىن جويۋ جانە زارداپ شەككەن ازاماتتارعا جان-جاقتى كومەك كورسەتۋ بويىنشا جۇمىستى جالعاستىرىپ وتىر.

زەرتتەۋ قورىتىندىلارى بويىنشا، 9 306 باسپانا قالپىنا كەلەتىن ساناتقا جاتادى. سۋ تاسقىنىنان زارداپ شەككەن ۇيلەردى جوندەۋگە 257 ميلليارد تەڭگە قاجەت.

"شامامەن 67 مىڭ ادام ءوز ۇيلەرىنە ورالدى، ەۆاكۋاتسيالىق پۋنكتتەردەگى 3 664 تۇرعىنعا بارلىق قاجەت كومەك كورسەتىلىپ جاتىر. سۋ تاسقىنى باستالعاننان بەرى بارلىعى 12 086 تۇرعىن ءۇي مەن 7 380 جالعىز باسپانا ساياجاي قۇرىلىستارى سۋ استىندا قالدى. جالپى زارداپ شەككەن وڭىرلەردە 18 228 تۇرعىن ءۇي زەرتتەلدى. بۇل — 94 پايىز. 15 651 نىسان بويىنشا باعالاۋ اياقتالدى. بۇل — 81 پايىز. 8 190 باسپانا قالپىنا كەلتىرىلمەيتىن ساناتقا جاتقىزىلىپ، ولار بويىنشا قايتالاما نارىقتان 5 714 باسپانا ساتىپ الۋ جانە 2576 تيپتىك جوبادا باسپانا قۇرىلىستارى جوسپارلانعان. جالپى، تۇرعىن ءۇيدى قالپىنا كەلتىرۋگە شامامەن 257 ميلليارد تەڭگە قاجەت. قازىرگى ۋاقىتتا 6 176 وتباسى جالپى سوماسى 40 ملرد تەڭگەگە باسپانا جوندەۋگە جانە قالپىنا كەلتىرۋگە وتەماقى الدى. زارداپ شەككەن ايماقتاردا بۇگىندە 3 414 وتباسىنا قيراعان تۇرعىن ءۇيدىڭ ورنىنا جاڭا ۇيلەر مەن پاتەرلەر ساتىپ الىندى نەمەسە وتەماقى تولەندى", – دەدى ۇكىمەت باسشىسىنىڭ ورىنباسارى قانات بوزىمباەۆ.

Abai.kz