سۋ تاسقىنىنان زارداپ شەككەن باتىس قازاقستان وبلىسىنىڭ تۇرعىندارى ءۇشىن 775 ءۇي سالىنادى، مەملەكەت ەسەبىنەن قوسىمشا 1500 پاتەر ساتىپ الىنادى. بۇل تۋرالى ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى نارتاي سارسەنعاليەۆ تەرەكتى اۋدانى پودستەپنوە اۋىلىنىڭ تۇرعىندارىمەن كەزدەسۋ بارىسىندا ايتتى.

ەلدى مەكەن ورال قالاسىنان 10 شاقىرىم قاشىقتىقتا ورنالاسقان. سۋ تاسقىنى كەزىندە اتالعان اۋىل وزگە ەلدى مەكەندەرگە قاراعاندا كوبىرەك زارداپ شەكتى – 481 وتباسى باسپاناسىنان ايىرىلدى.

– بارلىق دۇنيە-مۇلىك، ءتورت تۇلىك سۋ استىندا قالدى. ءۇيدى سۋ باستى. ءبىز كوپبالالى وتباسىمىز. العاشىندا بىزگە مەكتەپتەگى ەۆاكۋاتسيالىق پۋنكتە توسەك-ورىن بەرىلدى. قازىر باسپانا جالداپ جاتىرمىز. مەملەكەتتەن ماتەريالدىق كومەك الدىق. ەندى تەزدەتىپ تۇرعىن ءۇي العىمىز كەلەدى، – دەدى جەرگىلىكتى تۇرعىن ماريام قايراتقىزى.

بۇگىندە تەرەكتى اۋدانىندا ءبىر قاباتتى 131 ءۇيدىڭ قۇرىلىسى جۇرگىزىلۋدە. ءار ءۇيدىڭ جالپى اۋدانى – 80 شارشى مەتر. پودستەپنوە اۋىلىندا 106 ءۇي سالىنادى. بۇل جۇمىسقا 10 مەردىگەر كومپانيا جۇمىلدىرىلعان. 670 ءۇي يەسى 100 اەك (369 200 تەڭگە) مولشەرىندە بىرجولعى ماتەريالدىق كومەك الدى. 506 ءۇي يەسىنىڭ ماتەريالدىق شىعىنىنىڭ ورنىن تولتىرىلدى. اۋىلدا مەكتەپتى جوندەۋ جۇمىسى باستالدى. جول جوندەۋگە جانە بوگەتتەردى قالپىنا كەلتىرۋگە بيۋدجەتكە ءوتىنىم بەرىلدى.

– دەپۋتاتتار العاشقى كۇننەن-اق وقيعا ورنىنان تابىلدى. ءوز باسىم، زارداپ شەككەن وتباسىلارمەن بىرنەشە رەت كەزدەستىم، سۋ تاسقىنىنا قارسى ءىس-قيمىل بويىنشا اكىمدىكتەرمەن بىرگە جۇمىس ىستەدىم، باعالاۋ كوميسسيالارىنىڭ جۇمىسىنا اتسالىستىم. بارلىق ماسەلە پرەزيدەنت باقىلاۋىندا بولدى. قازىر ءبىزدىڭ باستى ماقساتىمىز – زارداپ شەككەن جانداردىڭ بارىنشا تەزىرەك بايىرعى ومىرگە ورالۋىنا جاعداي جاساۋ، ۇيلەردى، جەكە قوسالقى شارۋاشىلىقتاردى، الەۋمەتتىك ينفراقۇرىلىمدى، بالاباقشالار مەن اۋرۋحانالاردى قالپىنا كەلتىرۋ، – دەدى نارتاي سارسەنعاليەۆ.

ەسكە سالا كەتەيىك، بۇعان دەيىن ءماجىلىس دەپۋتاتتارى سۋ تاسقىنىنا قارسى ءىس-قيمىل جۇمىسىنا بارىنشا اتسالىسۋ ماقساتىمەن زارداپ شەككەن وڭىرلەرگە بارعان بولاتىن. حالىق قالاۋلىلارى تۇرعىنداردىڭ ءوتىنىش-تىلەگىن قۇزىرلى ورگاندارعا جەتكىزىپ، قاجەتتى رەسۋرستاردى جەدەل جۇمىلدىرۋ جۇمىسىن ۇيىمداستىردى.

ءماجىلىستىڭ ءباسپاسوز قىزمەتى،

(«AMANAT» پارتياسىنىڭ ماتەريالدارى بويىنشا)

Abai.kz