پاريجدە ءوتىپ جاتقان وليمپيادا ويىندارىنا بارا المايتىنىن ايتقان ەلەنا رىباكينا قازاقستاندىقتاردان كەشىرىم سۇرادى، - دەپ حابارلايدى Dalanews.kz. 

"قۇرمەتتى قازاقستاندىقتار، پاريجدەگى وليمپيادا ويىندارىنا قازاقستان قۇراماسىمەن قاتىسا المايتىنىما وكىنەتىنىمدى ايتۋدىڭ ءساتى ەندى ءتۇستى. مەن كوماندامەن دايىندالىپ، جارىس باستالاردىڭ الدىندا اۋىرىپ قالدىم. دەنە قىزۋىم كوتەرىلىپ، دەم الۋىم قيىنداپ، دارىگەرلەر ماعان كورتتا ونەر كورسەتۋىمە تىيىم سالدى. سونشا ۇمىتتەنگەن قازاقستاندىق جانكۇيەرلەرگەن كەشىرىم سۇراعىم كەلەدى. ءوزىم دە قاتتى وكىنىپ وتىرمىن، سەبەبى كوماندامەن كوپ جۇمىس ىستەپ، مەدال يەلەنگىم كەلدى. توكيوداعى وليمپيادادا جۇلدەلى ورىن الۋىما از قالعان ەدى. جاقىن ارادا كورتقا ورالامىن دەپ ۇمىتتەنەمىن جانە وتانداستارىما العىس ايتقىم كەلەدى. سەبەبى قاي ەلدە ونەر كورسەتسەم دە قولداۋدى سەزىپ، ەلىمىزدىڭ تۋىن كورگەندە قۋانامىن", - دەيدى ەلەنا.

ەسكە سالايىق، بۇعان دەيىن بيلىككە جاقىن ساراپشىلار تەننيسشى رىباكينا مەن پۋتينتسەۆا نە ءۇشىن وليمپياداعا قاتىسۋدان باس تارتۋى مۇمكىن ەكەنىن ايتتى.

"چەمودان گوسسەكرەتوۆ" تەلەگرام ارناسىنىڭ مالىمەتىنشە، رىباكينا مەن پۋتينتسەۆانىڭ وليمپياداعا قاتىسۋدان باس تارتۋى فەدەراتسيانىڭ قاساقانا سابوتاجى بولۋى مۇمكىن. ساراپشىلار مۇنداي بولجامدى دەرەككوزدەرىنە سۇيەنىپ ايتىپ وتىر.

"سپورتشىلار، اسىرەسە قولاستىنا الىنعاندار (ەكىنشى ءبىر ەلدىڭ ادامىنا ازاماتتىق قۇقىق بەرۋ), قالاماقى (گونورار) سوماسىنا قارايدى جانە ولار تەننيس فەدەراتسياسىنىڭ باسشىلىعىنان ءتيىستى موتيۆاتسيا الماعان بولۋى مۇمكىن. ولار قازاقستاننىڭ اتىنان شىقسا مىندەتتى تۇردە مەدال الۋى مۇمكىن ەدى. دەرەككوزدەر بۇل ماسەلە بويىنشا ءتۇسىندىرۋ جۇمىستارى جۇرگىزىلەتىنىن حابارلادى", - دەلىنگەن جازبادا.

ەسكە سالايىق، بۇعان دەيىن WTA رەيتينگىندە 4-ورىندا تۇرعان قازاقستاندىق تەننيسشى ەلەنا رىباكينا 2024 جىلى پاريجدە وتەتىن وليمپيادا ويىندارىنا قاتىسۋدان باس تارتۋ تۋرالى شەشىم قابىلداعانى بەلگىلى بولعان ەدى.

"قۇرمەتتى قازاقستاندىقتار! ماعان بۇل تۋرالى ايتۋ وڭايعا سوقپادى. وكىنىشكە قاراي، پاريج وليمپياداسىنا قاتىسا المايمىن. ۋيمبلدون تۋرنيرىنەن كەيىن مەن جەدەل برونحيتپەن اۋىرىپ قالدىم، جاتتىعۋعا قايتا ورالۋعا تىرىسقانىممەن، دەنەم ءالى قالپىنا كەلگەن جوق. دارىگەرلەر كورتقا شىعۋىما ءۇزىلدى-كەسىلدى تىيىم سالدى", - دەدى ول.

وسى تۇستا ول وليمپياداعا قاتىساتىن قازاقستاندىق سپورتشىلاردى قولدايتىنىن جەتكىزدى.

ارتىنشا تەننيسشى يۋليا پۋتينتسەۆا دا پاريج وليمپياداسىنا قاتىسپايتىنى بەلگىلى بولدى. 

قازاقستان تەننيس فەدەراتسيانىڭ مالىمەتىنشە، پۋتينتسەۆا پاريجگە ۇشىپ كەلىپ، بەلسەندى تۇردە جاتتىعا باستاعان. الايدا ۋكراينالىق مارتا كوستيۋكپەن بولاتىن ماتچ الدىنداعى دايىندىقتى قازاقستاندىق سپورتشى تىزەسىن اۋىرتىپ العان. مەديتسينالىق تەكسەرۋدەن وتكەن سوڭ تۋرنيردەن باس تارتۋ تۋرالى شەشىم قابىلداندى.

ايتا كەتەلىك، بۇعان دەيىن دە يۋليا تىزەسىندەگى جاراقاتىن ايتىپ، شاعىمدانعان بولاتىن.

قازاقستان تەننيس فەدەراتسياسىنىڭ ۆيتسە-پرەزيدەنتى دياس دوسقاراەۆ اتالعان جاعدايعا قاتىستى پىكىر ءبىلدىردى.

“پاريج وليمپياداسى ءبىز ءۇشىن سىناقپەن باستالۋدا. الدىمەن ەلەنا رىباكينا سىرقاتىنا بايلانىستى باس تارتسا، بۇگىن  يۋليا پۋتينتسەۆا جارقاتىنا بايلانىستى جارىستى توقتاتتى. ەكى سپورتشىعا دا ۇلكەن ءۇمىت ارتقان ەدىك، وكىنىشتى", - دەدى دوسقاراەۆ.

Abai.kz