وزبەكستاننىڭ تەمىر جول كومپانياسىنىڭ ءباسپاسوز قىزمەتى 22 تامىزدان باستاپ نوكىس قالاسىنان ماڭعىستاۋ وبلىسىنا تەمىرجول تاسىمالى ىسكە قوسىلاتىنىن حابارلادى. 

كومپانيا حابارلاماسىنا سايكەس، پويىز نوكىس قالاسىنان بەيسەنبى، سەنبى، سەيسەنبى كۇندەرى ساعات 20:16-دا شىعىپ، ماڭعىستاۋعا 17:14-تە كەلەدى. جول ۇزاقتىعى شامامەن 21 ساعات. 

ال ماڭعىستاۋدان نوكىسكە پويىز جۇما، جەكسەنبى جانە سارسەنبى كۇندەرى ساعات 18:54-تە جولعا شىعادى. نوكىسكە جەتۋ ۋاقىتى: 15:22. العاشقى رەيس 23 تامىز كۇنى قاتىنايدى. 

"جولاۋشىلار نوكىستەن تىكەلەي قازاقستاننىڭ ماڭعىستاۋ وبلىسىنا قاتىناي الادى. ماڭعىستاۋ وبلىسى ءوزىنىڭ ەرەكشە تابيعاتىمەن، باي تاريحىمەن جانە مادەني مۇراسىمەن تۋريستەردى قىزىقتىرۋدا. ول جەردە تۋريستىك ينفراقۇرىلىم دامىعان. جايلى قوناق ۇيلەردەن باستاپ، ەكوتۋريزمگە دەيىن ءارتۇرلى اتتراكتسيوندار بار", – دەلىنگەن وزبەكستاننىڭ تەمىر جول كومپانياسىنىڭ حابارلاماسىندا.

Abai.kz