ۇلتتىق قۇرامانىڭ ۇكىلەگەن ءۇمىتى ماحمۇد سابىرحان دا اسلانبەك شىمبەرگەنوۆ، قامشىبەك قوڭقاباەۆ باستاعان "ۇلى كوشكە" قوسىلدى.

شىنى كەرەك، ماحمۇد قازاق بوكسىنا قۇبىلىس بولىپ كەلگەن جالىندى جاستاردىڭ ءبىرى. تەك، وزىنە ساي سالماقتى تابا الماي، سەندەلىپ ءجۇر. انىعىندا، قۇرامانىڭ تىزگىنىن ۇستاعاندار سەندەلتىپ، سەرگەلدەڭگە سالىپ قويدى. ول اۋەسقوي بوكستاعى جەتىستىكتەرىنىڭ بارىنە 54 كەلىدە قول جەتكىزگەن. ال 57-گە اۋىسقالى وڭعان ناتيجە كورسەتكەن جوق. مۇنى ءتۇسىنۋ باس باپكەرگە دە، باسقاعا دا اسا كوپ اقىلدى قاجەت ەتپەسە كەرەك. بۇعان دەيىن كۇرەڭبايكوز سىنشىلار "ماحمۇد 51 كەلى سالماقتىڭ بوكسشىسى، 57 كەلى وعان ۇلكەن، بويى دا، ءبىتىمى دە كەلمەيدى", – دەپ تالاي رەت شىرىلدادى. بىراق، نە فەدەراتسيا، نە باپكەرلىك قۇرام وعان قۇلاق اسقان دا جوق. ويتكەنى، مەملەكەتتىڭ بوكستاعى ابىرويى ايتجانوۆتىڭ ء"وز شاكىرتتەرىمنىڭ ىشىنەن وليمپيادا چەمپيونىن شىعارامىن" دەگەن اسقاق امبيتسياسىنان اسا الماي تۇر. ءبىر كەزدەرى تاعى ءبىر ءتول شاكىرتى ءبىرجان جاقىپوۆ ءۇشىن تەمىرتاستى دا تالاي جىل تۇساۋلاپ كەلگەنى ءوز الدىنا بولەك اڭگىمە. دەگەنمەن، تەمىرتاس تەمىردەي ءتوزىمىنىڭ ارقاسىندا سوڭىنا دەيىن شىداپ، بەلگرادتاعى الەم چەمپيوناتىندا التىننان القا تاقتى. وسى رەتتە سپورتشىنىڭ ءبارى تەمىرتاستاي بەرىك ەمەس ەكەنىن دە ۇمىتپاعانىمىز ءجون.

ايتجانوۆتىڭ ءوزىنىڭ 3-ءشى وليمپياداسىنا قۇرامانى باستاپ بارۋىنا دا قارسى بولعان ادامدار از ەمەس. ءيا، بىرەۋلەر "ايتجانوۆتىڭ كەزىندە لوندون مەن ريودا قوس-قوستان فينالعا شىعىپ، مەدالعا قارىق بولدىق" دەگەندى العا تارتادى. بىراق، ونىڭ ءبارى تەك مىرزەكەڭنىڭ عانا ەڭبەگى ەمەس ەكەنىن ەسكەرمەيدى. راس، بۇل قۇرامادا دا ايتجانوۆ بار، بىراق مۇندا ساپيەۆ پەن ەلەۋسىنوۆ، نيازىمبەتوۆ پەن لەۆيت جانە ولاردىڭ بويىنداعى جەڭىسكە دەگەن قۇلشىنىس پەن كوزدەرىندەگى جالىن جوق.

بارلىعىنا ايتجانوۆتى عانا ايىپتاۋ بەرۋگە دە بولمايتىن شىعار. سەبەبى، قۇرامادا سول سەكىلدى قانشاما "مىرزاعالي" ءجۇر. ءبارى وزدەرىنىڭ شاكىرتتەرىنەن عانا چەمپيون شىعارىپ، سول جولدا كەز كەلگەننىڭ تامىرىنا بالتا شابۋعا دايار. ونىڭ ۇستىنە جەرشىلدىك، رۋشىلدىق، دارىنىنا ەمەس، تانىسىنا قاراي الالاۋ اسقىنىپ، قازاق بوكسىنىڭ سورىن قايناتۋدا. سپورت ءجۋرناليسى ايدوس رىمقۇل "ۇلتتىق قۇرامادا شاكىرتى بار باپكەر - باس باپكەر قىزمەتىندە بولماۋى كەرەك. سول كەزدە بارىنە نەيترال قارايدى، ءوز شاكىرتى ءۇشىن باسقالاردىڭ باعىن بايلامايدى! ايتپەسە ترايباليزم، شاكىرتىن سۇيرەۋ، ءوز جەرلەسىن سۇيرەۋ بولعان، بولا بەرەدى" دەگەندى ءجيى ايتادى. ءوز باسىم بۇعان تولىعىمەن كەلىسەمىن. ونسىز وسى بوكستىڭ قۇلدىراعانى قۇلدىراعان. كەشەگى اسلانبەك پەن قامشىبەكتىڭ دە جەڭىلىسى وسى "جارىمجان" جۇيەنىڭ سالدارى. (اسلانبەك تۋرالى پىكىردى بىلىكتى باپكەر تۇرسىنعالي ەدىلوۆ ناقتى ءبىلدىرىپتى)

بۇرىن، انىعىندا ريو وليمپياداسىنا دەيىن كلاسسيكالىق مانەردەگى بوكس بىزدە ەدى. سونىڭ ارقاسىندا كۋبا، ۋكراينا سەكىلدى بوكس دەرجاۆالارىمەن سان رەت يىق تىرەستىردىك. ال قازىر اۆستراليالىق تا، يسپاندىق تا، ءتىپتى يوردانيالىق تا ءبىزدىڭ جىگىتتەردى الىپ تا، شالىپ تا جىعىپ جاتىر. وليمپيادا تۇگىلى، ازيانىڭ وزىندە التىن الۋ مۇڭعا اينالدى. التىن تۇرماق، جولداماعا قول جەتكىزسە، سوعان شۇكىر ەتەتىن كۇنگە جەتتىك. مۇندايدا بوكسقا جاۋاپتى ماماندار "بوكس بارلىق ەلدە دامىپ جاتىر" دەگەندى ءجيى ايتادى. الايدا، ولاردىڭ ەشقايسىسى "بوكس بارلىق ەلدە دامىپ جاتىر، تەك بىزدە ەمەس" دەگەندى مۇلدە مويىنداعىسى كەلمەيدى. بۇگىندە وزگەلەر ورگە ۇمتىلىپ جاتقاندا ءبىز تومەن قاراي قۇلديلاپ كەلەمىز. ال قۇلديلاۋ سوڭى – قۇردىم مەن كۇيرەۋ. ونىڭ ۇستىنە قازىرگى بوكس تا باسقاشا سيپات الا باستادى. بۇرىنعىداي جارقىن جەكپە-جەكتەر جوقتىڭ قاسى. ەكى قولىن كوتەرىپ، ورشەلەنە العا ۇمتىلعاننىڭ ءبارى جوعارى باعا الىپ، جەڭىسكە جەتىپ جاتىر. سوندىقتان بىزگە دە قۇرامانى زامان اعىمىنا قاراي بەيىمدەپ، جاڭاشا باعىتتا جاتتىقتىراتىن جاڭاشىل جاتتىقتىرۋشى كەرەك. سەبەبى، سوۆەتتەن قالعان سۇرلەۋ ەش ناتيجە بەرمەيتىنىنە ءار جارىس سايىن كوزىمىز جەتىپ كەلەدى. بۇل تۇرعىدا مىرزاعالي ايتجانوۆ بوكسقا بەرەرىن بەرىپ، ابدەن سارقىلعان باپكەر.

قىسقاسى، توكيودا توڭقالاڭ اسقان قازاق بوكسى پاريجدە اقتىق دەمىن الۋدا. ءبىزدىڭ التىن ءداۋىرىمىز سوناۋ ريونىڭ شارشى الاڭىندا قالىپ كەتىپتى. ارينە، بوكستىڭ "اسحاناسىن" عانا كورگەنىم بولماسا، وسى سالانىڭ جىلىگىن شاعىپ، مايىن ىشكەن مامان ەمەسپىن. ايتسە دە، الدەقاشان قازاقتىڭ ۇلتتىق سپورتىنا اينالىپ كەتكەن بوكستىڭ كەلەشەگىنە الاڭداپ، وي ايتۋعا قۇقىلىمىن. ويتكەنى، مەن انگليادا تۋىپ، كۋبادا وركەندەگەن بوكستىڭ "جانازاسى" قازاقستاندا شىققانىن قالامايمىن!

P.S. جەڭىلگەن جىگىتتەرگە ايتارىم، وبالدارىڭ دا، كوز جاستارىڭ دا ءار سپورتشىنىڭ الەۋەتىن باعامداي الماي، وزدەرى جاساعان قالىپقا سالىپ قويعان بوكس "قۇدايلارىنىڭ" موينىندا. جاسىماڭدار، بالكىم، اقش وليمپياداسىنا دەيىن باقتارىڭدى اشاتىن بىلىكتى باپكەر كەلىپ، التىننان القا تاعۋلارىڭا سەپ بولار.

قۇربانالى امانگەلدىۇلىنىڭ جەلىدەگى جازباسى

Abai.kz