قىرعىزستاندا شۋ-تالاس سۋ شارۋاشىلىعى كوميسسياسىنىڭ 34-ءشى وتىرىسى ءوتتى. قازاقستاندىق دەلەگاتسيانى سۋ رەسۋرستارى جانە يرريگاتسيا ۆيتسە-ءمينيسترى نۇرلان الدامجاروۆ باسقاردى.

ۆيتسە-مينيستر قىرعىز رەسپۋبليكاسى سۋ رەسۋرستارى، اۋىل شارۋاشىلىعى جانە قايتا وڭدەۋ ونەركاسىبى مينيسترلىگىنىڭ سۋ رەسۋرستارى قىزمەتىنىڭ ديرەكتورى جانە ءمينيستردىڭ ورىنباسارى المازبەك سوكەەۆپەن كەزدەستى.

وتىرىسقا ەلىمىزدەن قر سىرتقى ىستەر مينيسترلىگىنىڭ، جامبىل وبلىسى اكىمدىگىنىڭ، قر ۇقك شەكارا قىزمەتىنىڭ، سۋ شارۋاشىلىعى مەكەمەلەرى مەن ۇيىمدارىنىڭ وكىلدەرى قاتىستى. تاراپتار بيىلعى سۋ شارۋاشىلىعى جاعدايىن جانە وسىعان دەيىن بەكىتىلگەن سۋ بەرۋ كەستەسىن ساقتاۋ ماسەلەسىن تالقىلادى. سونداي-اق، سۋ شارۋاشىلىعى نىساندارىنداعى جوندەۋ-قالپىنا كەلتىرۋ جۇمىستارى تۋرالى ەسەپپەن تانىستى.

بۇدان بولەك، سۋ ءبولۋ قوندىرعىلارىن اۆتوماتتاندىرۋ جانە اسپارا وزەنى مەن چۋمىش گيدروتورابىندا بىرلەسكەن ولشەۋ جۇمىستارىن جۇرگىزۋ، تالاس وزەنىندەگى «جاسوركەن» گيدروبەكەتىندە گيدرولوگيالىق باقىلاۋلاردى قالپىنا كەلتىرۋ جانە باسقا دا سۋ شارۋاشىلىعى ماسەلەلەرى قارالدى.

«ءساۋىر ايىنان بۇگىنگى كۇنگە دەيىن قىرعىزستاننان بەكىتىلگەن كەستەگە سايكەس سۋ كەلىپ جاتىر. قىرعىز ارىپتەستەرىمەن بىرلەسىپ، اسپارا ترانسشەكارالىق وزەنى مەن چۋمىش سۋ تورابىندا سۋ ءبولۋدى باقىلاۋدى كۇشەيتۋ جۇمىسى جالعاسادى»،
- دەدى قر سۋ رەسۋرستارى جانە يرريگاتسيا ۆيتسە-ءمينيسترى نۇرلان الدامجاروۆ.

كوميسسيانىڭ كەلەسى وتىرىسى 2024 جىلدىڭ 4-توقسانىندا استانادا وتەدى.

Abai.kz