تاڭات نوسەرباەۆ: جەڭىلىسكە جىگەرسىزدىك تانىتۋ جىگىتتىڭ ءىسى ەمەس
قازاق فۋتبولىنىڭ قارقىنى قانشا تومەن دەسەك تە، الا دوپتى اياعىندا ويناتاتىن جاستار جوق ەمەس. كەزەكتى جەڭىلىسكە كۋا بولىپ، ستاديوننان كوڭىلسىز قايتقان كۇننىڭ وزىندە كەلەشەككە يەك ارتىپ، ەڭسەمىزدى تىك ۇستايتىن كەزدى ەرتەڭنەن كۇتەمىز. الەمدىك فۋتبولداعى مارتەبەسى اسقاق اعىلشىن، يسپان چەمپيوناتتارىن قوسپاعاندا، ءبىزدىڭ پرەمەرادان ءباسى جوعارى بىرىنشىلىكتەردە باق سىناۋعا ءتيىس ءبىر فۋتبولشى بار. بەرند شتورك باپكەر بولعالى ساپتان شىعىپ كورمەگەن ول جانكۇيەرلەر اراسىندا دا اسا قۇرمەتتى. تاڭات نوسەرباەۆ. ءبىزدىڭ بۇگىنگى سۇحباتتىڭ باستى كەيىپكەرى - شىمكەنتتىك «ورداباسى» مەن قازاقستان قۇراماسىنىڭ بەلدى ويىنشىسى.
- تاڭات، سەنىڭ شۆەيتساريالىق «يانگ بويز» كلۋبىنىڭ جاتتىعۋ جيىنىنا قاتىسقانىڭدى بىلەمىز. ايتۋلى سىن قالاي ءوتتى؟ باپكەرلەر كوڭىلىنەن شىقتىڭ با؟
- مەن ول جاقتان جاقىندا ورالدىم. «يانگ بويز» كلۋبى سول ەلدىڭ ايگىلى «بازەلىن» تىزە بۇكتىرىپ، الدىڭعى ورىندا كەلەدى. ەكى كوماندا اراسىنداعى ۇپاي سانى دا العاشقىسىنىڭ پايداسىنا قاراي ۇلعايىپ بارادى. جاتتىعۋ جيىندارى ويداعىداي ءوتتى، قانشا دەگەنمەن ەۋروپانىڭ اتى - ەۋروپا عوي. شەبەرلىگىڭدى شىڭداپ، مىقتىلار قاتارىنا قوسىلۋعا مۇمكىندىك بار. دەگەنمەن، سوڭعى ءسوز وزىمدە بولاتىن. مەن ايتقان ۇسىنىسقا ولاردىڭ كەلىسىڭكىرەمەيتىنىن ءبىلىپ، ەلگە قايتىپ كەتتىم. ونىڭ ۇستىنە، كلۋبتىڭ ەڭ ۇزدىك شابۋىلشىلارىنىڭ ءبىرى دۋمبيانىڭ ترانسفەرى جۇزەگە اسپاي قالدى. جوسپار بويىنشا، مەن ونى الماستىرۋىم كەرەك ەدى.
قازاق فۋتبولىنىڭ قارقىنى قانشا تومەن دەسەك تە، الا دوپتى اياعىندا ويناتاتىن جاستار جوق ەمەس. كەزەكتى جەڭىلىسكە كۋا بولىپ، ستاديوننان كوڭىلسىز قايتقان كۇننىڭ وزىندە كەلەشەككە يەك ارتىپ، ەڭسەمىزدى تىك ۇستايتىن كەزدى ەرتەڭنەن كۇتەمىز. الەمدىك فۋتبولداعى مارتەبەسى اسقاق اعىلشىن، يسپان چەمپيوناتتارىن قوسپاعاندا، ءبىزدىڭ پرەمەرادان ءباسى جوعارى بىرىنشىلىكتەردە باق سىناۋعا ءتيىس ءبىر فۋتبولشى بار. بەرند شتورك باپكەر بولعالى ساپتان شىعىپ كورمەگەن ول جانكۇيەرلەر اراسىندا دا اسا قۇرمەتتى. تاڭات نوسەرباەۆ. ءبىزدىڭ بۇگىنگى سۇحباتتىڭ باستى كەيىپكەرى - شىمكەنتتىك «ورداباسى» مەن قازاقستان قۇراماسىنىڭ بەلدى ويىنشىسى.
- تاڭات، سەنىڭ شۆەيتساريالىق «يانگ بويز» كلۋبىنىڭ جاتتىعۋ جيىنىنا قاتىسقانىڭدى بىلەمىز. ايتۋلى سىن قالاي ءوتتى؟ باپكەرلەر كوڭىلىنەن شىقتىڭ با؟
- مەن ول جاقتان جاقىندا ورالدىم. «يانگ بويز» كلۋبى سول ەلدىڭ ايگىلى «بازەلىن» تىزە بۇكتىرىپ، الدىڭعى ورىندا كەلەدى. ەكى كوماندا اراسىنداعى ۇپاي سانى دا العاشقىسىنىڭ پايداسىنا قاراي ۇلعايىپ بارادى. جاتتىعۋ جيىندارى ويداعىداي ءوتتى، قانشا دەگەنمەن ەۋروپانىڭ اتى - ەۋروپا عوي. شەبەرلىگىڭدى شىڭداپ، مىقتىلار قاتارىنا قوسىلۋعا مۇمكىندىك بار. دەگەنمەن، سوڭعى ءسوز وزىمدە بولاتىن. مەن ايتقان ۇسىنىسقا ولاردىڭ كەلىسىڭكىرەمەيتىنىن ءبىلىپ، ەلگە قايتىپ كەتتىم. ونىڭ ۇستىنە، كلۋبتىڭ ەڭ ۇزدىك شابۋىلشىلارىنىڭ ءبىرى دۋمبيانىڭ ترانسفەرى جۇزەگە اسپاي قالدى. جوسپار بويىنشا، مەن ونى الماستىرۋىم كەرەك ەدى.
- «ورداباسى» باسشىلىعىنىڭ سەنى تەك شەتەلدىك كلۋبقا قانا ساتامىز دەگەن ءسوزى شىندىققا اينالۋى مۇمكىن عوي... قازاقستاندىق فۋتبول ۇجىمدارىندا دوپ تەپكىڭ كەلمەي مە؟
- ارينە، مۇمكىن! ءبارى اللانىڭ قولىندا. ەلىمىزدىڭ كوشباسشى كوماندالارىندا ويناپ، ەۋروكۋبوك جولىنداعى جارىستارعا قاتىسقىم كەلەدى. بۇل تاجىريبە جيناۋدا دا ۇلكەن رول اتقارادى.
- سەنىڭ ويىڭشا، فۋتبولدا ءبىزدىڭ ەلدىڭ زور تابىسقا جەتە الماۋىنا باستى سەبەپتەر نە؟ فۋتبولشىلار دارىنسىز با، باپكەرلەر بىلىكسىز بە، الدە دۇرىس مەكتەپتەر جوق پا؟
- بۇل جەردە بارلىعى دا قارجىعا بايلانىستى. بولە-جارىپ بىرەۋلەرگە كىنا ارتۋدان اۋلاقپىن، بىراق ءبىزدىڭ فۋتبول دۇرىس دامۋى ءۇشىن بالالاردىڭ وسى سپورتپەن جۇيەلى تۇردە شۇعىلدانۋىنا جاعداي جاساۋ كەرەك. جاس كەزىندە جاقسى دايىندالعان بالادان بىلىكتى فۋتبولشى شىعادى. سونىمەن قاتار، ويىن الاڭدارىنىڭ ساپاسىن ارتتىرۋ دا كۇن تارتىبىندەگى باستى ماسەلەلەردىڭ ءبىرى.
- شەتەلدەن فۋتبولشىلار مەن باپكەر شاقىرۋ بارلىق ەلدە بار ءۇردىس. بىراق، ءبىزدىڭ بىرىنشىلىككە وزگە ەلگە كەرەك بولماي قالعان ويىنشىلار كەلەدى دەگەن پىكىرگە قالاي قارايسىڭ؟
- مەن بارلىق لەگيونەرلەرگە توپىراق شاشپايمىن. اراسىندا اياقدوپتى جوعارى دارەجەدە مەڭگەرگەندەرى دە بار. ەگەر كلۋبىڭدا بىلىكتى لەگيونەر بولسا سەن وعاپ قاراپ بوي تۇزەيسىڭ، ءبىراز نارسە ۇيرەنەسىڭ. سەنىڭ كاسىبي فۋتبولشى رەتىندە دامۋىڭا كوپ سەپتىگىن تيگىزەدى. ال پايداسى جوق كەلىمسەكتەر تۋرالى ەشتەڭە ايتا المايمىن.
- تاڭات، سەنىڭ ۇلتتىق قۇراماداعى العاشقى ويىنىڭ اناۋ-مىناۋ ەمەس، ايگىلى انگليامەن ءوتتى. ەڭ ءبىرىنشى ەستىگەندە قانداي ويدا بولدىڭ؟
- باسىندا ءبىراز قوبالجىعانىم راس. قانشا ايتقانمەن، فۋتبولدى ويلاپ تاپقان حالىقتىڭ وكىلدەرىمەن دوپ تەبەسىڭ. بىراق، جاسىل الاڭعا شىققاندا بارلىعىن ۇمىتىپ كەتتىم. ولار دا ءوزىمىز سياقتى ادام عوي، ەكى قول، ەكى اياعى بار. ايىرماشىلىعى، اتاق-داڭقتارى جەر جارىپ تۇر. دۇنيەنىڭ كەز-كەلگەن بۇرىشىندا ولاردىڭ ەسىمدەرى جاتقا ايتىلادى.
- قازاقستان قۇراماسىن قولعا العالى بەرى بەرند شتورككە قاتىستى تەك جاعىمسىز پىكىرلەر ايتىلۋدا. باپكەر رەتىندە ول ساعان ۇناي ما؟ نەمىس مامانىنىڭ جۇرگىزىپ جاتقان تەستتەرى قانداي ناتيجە بەرۋدە؟
- بەرند شتوركتىڭ جاتتىقتىرۋى كوڭىلىمنەن شىعادى. ول جۇرگىزىپ جاتقان تەستتەردىڭ پايداسى بولماسا، زيانى جوق. ءبىز فۋتبولدا ەۋروپادان، ءتىپتى ازيا ەلدەرىنەن دە ارتتا كەلەمىز. سول ولقىلىقتاردىڭ ورنىن تولتىرۋ ءۇشىن بارىمىزدى سالۋدامىز.
- سوڭعى كەزدە ءبىزدىڭ قۇراما ءىرى ەسەپپەن جەڭىلۋىن توقتاتار ەمەس. تابلوداعى جىبەرگەن گولدار سانىن كورىپ، بارىنە قولىڭدى ءبىر سىلتەپ، كەتكىڭ كەلەتىن كەزىڭ بولدى ما؟
- جوق، ونداي بولعان ەمەس! مۇنداي جىگەرسىزدىك تانىتۋ ەر جىگىتتىڭ ءىسى دەپ بىلمەيمىن. قيىندىققا توزە الماساڭ، اۋەل باستان فۋتبولعا كەلمەۋ كەرەك. ال، ۇلكەن ويىننىڭ مۇشەسى بولعاننان كەيىن نامىسىڭ قولدى ءبىر سىلتەۋگە ەش مۇمكىندىك بەرمەيدى. مەنىڭ ويىمشا، فۋتبولدا بيىكتى باعىندىرۋ ءۇشىن تەك ەڭبەكتەنۋ قاجەت.
- ساتىپ الىنعان ماتچتاردا ويناپ كوردىڭىز بە؟
- جوق، قۇداي ساقتاسىن! مۇنداي ومىرىمدە كەزدەسكەن ەمەس. مۇلدە كەزدەسپەيدى دەپ ويلايمىن.
- ەل بىرىنشىلىگى مارەگە جەتىپ، ءوزىڭ سەكىلدى ويناعان فۋتبولشىلار جەڭىس تويىن تويلاپ، چەمپيون اتانعاندا نە ويدا بولاسىڭ؟ سەنىڭ كومانداڭ دا 30 تۋر بويىنا تەر توكتى عوي...
- ارينە، چەمپيون كوماندا ءۇشىن تەك قۋانامىن. فۋتبولداعى مىقتىلىعىڭدى تەك الاڭدا عانا دالەلدەيسىڭ. بار قايراتىڭدى جاسىل الاڭدا كورسەتىپ قال، بولدى. ال ويىن بىتكەسىن اڭگىمە ايتىپ، الاڭ سىرتىندا قارسىلاستىڭ ارتىنان ءسوز ەرگىزۋ نەمەسە قىزعانۋ - مەن جاسايتىن جۇمىس ەمەس. ورىستاردا، «توبەلەستەن سوڭ، قول جۇمسامايدى» دەيدى.
- بولاشاقتا باپكەر بولعىڭ كەلمەي مە؟
- جوق، جاقسى فۋتبولشى بولىپ، ەۋروپا الاڭىندا ويناسام دەيمىن.
- قازاق فۋتبولىنداعى كىمدەردى وزىڭە ۇلگى سانايسىڭ؟
- قازىرگى ءبىزدىڭ فۋتبولدىڭ بەتكەۇستارلارى - نۇربول جۇماسقاليەۆ، سىمات سىماقوۆ، رۋسلان بالتيەۆتاردى سىيلايمىن. جاسىل الاڭدا دا، ومىردە دە ادامگەرشىلىگى مول، جاقسى ازاماتتار.
- ءوزىڭنىڭ وتباسىڭ تۋرالى نە ايتاسىڭ؟
- مەنىڭ فۋتبولعا تۇبەگەيلى بەت بۇرۋىما باستى سەبەپكەر - اكەم. اۋلادا دوپ تەبۋدەن باستالعان قىزىعۋشىلىعىمدى جاسىل الاڭدا جالعاستىرۋىما كوپ كومەگىن تيگىزدى. وتباسىمدا اتا-انام مەن ەكى قارىنداسىم بار.
سۇحباتتاسقان اقىرىس سەيتقازى.
