«عىلىم-ءبىلىم سالاسىنداعى ىنتىماقتاستىققا جەكە توقتالدىق. جاستاردى جاقىنداتا تۇسەتىن ماڭىزدى باستامالاردى تالقىلادىق. جىل سايىن ەكى ەل جاستارىنىڭ كونگرەسىن وتكىزۋ داستۇرگە اينالعان. قازىر قازاقستاندا وزبەكستاننان كەلگەن 6 مىڭعا جۋىق ستۋدەنت وقىپ جاتىر. قازاق جاستارى دا وزبەكستاننىڭ جوعارى وقۋ ورىندارىندا ءبىلىم الىپ ءجۇر. بۇگىن وزبەكستاننىڭ شىرشىق قالاسىندا م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ فيليالى اشىلدى. الماتىدا تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتىنىڭ فيليالى ءوز جۇمىسىن باستادى. جاڭا ءبىز وسى وقۋ ورىندارىن سالتاناتتى تۇردە اشتىق. مۇنىڭ ءبارى باۋىرلاس ەكى حالىقتىڭ ورتاق مۇددەسى ءۇشىن جاسالىپ جاتىر»، - دەدى پرەزيدەنت.

سونداي-اق، مەملەكەت باسشىسى ايماقتاعى قاۋىپسىزدىكتى جانە تۇراقتىلىقتى قامتاماسىز ەتۋ جونىندە پىكىر الماسقاندىقتارىن باسا ايتتى.

«قازىر وزەكتى بولىپ تۇرعان حالىقارالىق ماسەلەلەر بويىنشا ۇستانىمدارىمىز ۇقساس. ايماقتاعى ىقپالداستىقتى كۇشەيتۋگە ەكى تاراپ تا مۇددەلى. ءبىز ەرتەڭ ورتالىق ازيا مەملەكەتتەرى باسشىلارىنىڭ كەزەكتى 6-شى كونسۋلتاتيۆتىك كەزدەسۋىنە قاتىسامىز. حالىقارالىق كۇن تارتىبىندەگى وزەكتى ماسەلەلەرگە قاتىستى ۇستانىمدارىمىزدى ۇيلەستىرۋ ءۇشىن ءبىز بۇگىن سىرتقى ىستەر مينيسترلەرى كەڭەسىن قۇردىق. بۇل قادام ەكى ەلدى جاقىنداستىرا تۇسەرى ءسوزسىز»، - دەدى قاسىم-جومارت توقاەۆ.

Abai.kz