3 كۇننەن-بەرى رەسەيدىڭ كۋرسك وبلىسىنداعى جاعداي جاھاندىق جاڭالىقتاردىڭ باستى نازاردا قالىپ وتىر.

كۋرسك وبلىسىنداعى ۇرىس

ءبىر تاۋلىك بويى مۇندا ۇرىس ءجۇرىپ، ۋكراينا اسكەرىنىڭ جەكەلەگەن بولىمدەرى ءتۇرلى دەرەكتەر بويىنشا 15-25 شاقىرىمعا دەيىن العا جىلجىدى. رەسەيلىك دەرەكتەر بويىنشا، سۋدجا اۋدانىندا قارۋلى كۇشتەر ونداعان رەسەيلىك اسكەريلەردى تۇتقىنعا العان. سونداي-اق، ۋكراينا اسكەرى سۋدجاداعى ەۋروپا ەلدەرىنە جانە بىرقاتار ەلدىمەكەندەرگە گاز ترانزيتىمەن بەرىلەتىن گاز تاراتۋ ستانتسياسىن باسىپ الدى.

كۋرسك وبلىسىنداعى وقيعالاردى ۆاشينگتوندا دا مۇقيات باقىلاۋدا. اق ءۇيدىڭ ءباسپاسوز حاتشىسى كارين جان-پەر اقش اكىمشىلىگىنىڭ كۋرسك وبلىسىنداعى ۋكراينالىق اسكەري وپەراتسيا تۋرالى بىلمەگەنىن مالىمدەدى. اق ءۇي مەن مەملەكەتتىك دەپارتامەنت اقش ۋكراينانىڭ رەسەي اۋماعىنداعى نىسانالاردى جويۋ ءۇشىن امەريكاندىق قارۋدى پايدالانۋىنا قاتىستى ءوز ساياساتىن وزگەرتپەگەنىن راستادى.

سۋرەت Google كارتا سكرينى

سۋدجاداعى جاعداي تۋرالى:

كەشە سۋدجاعا ۋكراينانىڭ تاعى 2 بريگاداسى كىردى دەگەن اقپارات شىقتى. وعان دەيىن ۋكراينانىڭ 4 بريگاداسى كىرگەنى ايتىلعان. جالپى ۋكراينا كۋرسكى وبلىسىنداعى شايقاستارعا رەزەرۆ رەتىندە شەكارا ماڭىندا 8 بريگادا دايىنداعان بولۋى كەرەك;

سۋدجادا شايقاستار جالعاسۋدا. ونداعى احۋال ناقتى قالاي ەكەنى ازىرگە بەلگىسىز. ۋكراينانىڭ جانە رەسەيدىڭ اقپاراتتارى تولىقتاي شىنايى جاعدايدان حابار بەرمەيدى. سەبەبى، سۋدجادا ينتەرنەت جوق. اقپارات كەشەۋىلدەۋدە. ال «درگ-لاردىڭ» سانى كوپ. ناقتىسى جانە بەلگىسىز;

* ۋكراينا قك سۋدجاعا قاراي لوگيستيكا مەن رەزەرۆ تۇزۋدە;

* ۋكراينا قك اسپاندى باقىلاۋعا الۋ ءۇشىن كۋرسكى وبلىسىنىڭ شەكاراسىنا قوسىمشا پۆو اكەلۋدە;

* ۋكراينا قك سۋدجادا بەلسەندى مانەۆرلەر جاساۋدا. جاۋدىڭ تىلىنان سوققىلار ۇيىمداستىرۋدا;

* رف اسكەرىنىڭ بۇل باعىتتا اۋە بومبالارى جوق;

* رەسەي كۋرسكى وبلىسىن باقىلاۋدا ۇستاۋ ءۇشىن قوسىمشا اسكەر جىبەرگەن.

سۋرەت Google كارتا سكرينى

كۋرسكى شايقاستارىنان:

كەشە قيانكەسكى ۇرىس كرومسكي بىكي اۋىلىندا ءجۇرىپ جاتىر. بۇل اۋىل لگوۆادان 20 شاقىرىمدا عانا ورنالاسقان. ودان ءارى ەكى اتتام جەردە كۋرچاتوۆ اەس-ءى ورنالاسقان.

كۋرسكىدەگى مايدان شەبى 430 شارشى شاقىرىمعا جەتكەن.

Z جۋرناليستەر: «ۋكراينا سۋدجانى تۇگەلگە جۋىق باقىلاۋعا الدى»،- دەپ ويبايلاۋدا. ولار تاراتقان اقپاراتقا سۇيەنسەك، ۋكراينا ميرنىي اۋىلىنا كىرگەن. كازاچيا لوكنيا، بوگدانوۆكا، كنياجي، 1-ءشى كنياجي جانە 2-ءشى كنياجي اۋىلدارىنا باقىلاۋ جۇرگىزۋدە. سونداي-اق، سنياگوست جانە كورەنەۆو اۋىلدارىندا دا ۇرىس ءجۇرىپ جاتىر.

سۋرەت: فوربەس سايتى

رەسەيلىك وليگارح: سوعىستى توقتاتۋ كەرەك!

رەسەيلىك وليگارح ولەگ دەريپاسكا جاپوندىق Nikkei Asia باسىلىمىنا بەرگەن سۇحباتىندا ۋكرايناداعى سوعىستى توقتاتۋدى جاقتادى.

باسىلىم دەريپاسكا ۋكرايناداعى سوعىستى «اقىلسىز» دەپ اتاپ، سونداي-اق رەسەيدىڭ اسكەري شىعىندارىن سىنعا العانىن ايتادى.

«ەگەر ءسىز سوعىستى توقتاتقىڭىز كەلسە، الدىمەن وق اتۋدى توقتاتۋ كەرەك»، - دەگەن بيزنەسمەن ول ءۇشىن «دەرەۋ سوزگە كەلمەي وق اتۋدى توقتاتۋعا» شاقىردى.

Nikkei Asia دەريپاسكانى «پۋتينگە جاقىن وليگارح» دەپ اتايدى. قازىر رەسەي پرەزيدەنتىمەن قارىم-قاتىناسى قانداي دەگەن ساۋالعا بيزنەسمەن: «ەشقانداي وزگەرىس جوق»، - دەدى. «ولار [كرەمل] ماعان تيىسپەيدى، ال ءبىز [بيزنەسمەندەر] ساياساتقا قاتىسى جوق»، - دەپ بيزنەسمەندىڭ ءسوزىن كەلتىرەدى باسىلىم.

ولەگ دەريپاسكا ۋكرايناداعى سوعىس تۋرالى بىرنەشە رەت ايتقان. 2022 جىلدىڭ 2 ساۋىرىندە ول ءوزىنىڭ تەلەگرام-ارناسىندا «مەنىڭ ويىمشا، بۇل اقىلسىزدىقتى قازىر اياقتاۋ كەرەك» دەپ جازدى.

Financial Times ءوز دەرەككوزدەرىنە سىلتەمە جاساپ، سول جىلى كرەمل بيزنەسمەندەن ۋكرايناداعى سوعىستى سىناۋدى توقتاتۋدى وتىنگەن سوڭ رەسەيلىك سوتتار دەريپاسكانىڭ ميلليارد دوللارلىق اكتيۆتەرىنە تىيىم سالعانىن جازدى. كەيىنىرەك دەريپاسكا: «ۋكراينانى جويىپ جىبەرۋ ۇلكەن قاتەلىك بولادى»، - دەپ مالىمدەدى.

Abai.kz