كەزىندە ۇكىمەتكە وتىز جاستاعى مەنى اكەجان قاجىگەلدين ەمەس، پرەمەر-مينيستر سەرگەي تەرەششەنكو شاقىرعان ەدى. بىراق جۇرتشىلىق مەنى وسى كۇنگە دەيىن «اكەجاننىڭ ادامى» دەپ سانايدى. سول ءۇشىن ءبىر جاعى سىيلايدى، ەكىنشى جاعى ۇناتپايدى دا.

ءيا، اكەجان ماعجانۇلىن سىيلايمىن، قۇرمەتتەيمىن، 90-جىلدارى قازاقستان ەكونوميكاسىن اياققا تۇرعىزعان مىقتى رەفورماتور دەپ سانايمىن. رنپك سەكىلدى وپپوزيتسيالىق پارتيا قۇرىپ، قارجىلاندىرىپ، ەلىمىزدىڭ دەموكراتيالىق دامۋىنا وراسان زور ۇلەس قوسقان قايراتكەر دەپ باعالايمىن.

ارينە، 2019 جىلى مەن پرەزيدەنت سايلاۋىنا تۇسكەندە ول كىسى مەنى قولداۋعا جارامادى، پاريجگە بەلسەندىلەردى جيناپ، مەنى تالقىلادى دەگەندەي. سول توپتىڭ بارىپ، كەلۋىنە جۇمسالعان قوماقتى قارجىنى مەنىڭ شتابىما بەرسە دە بولار ەدى عوي. بالكىم، ونىڭ ءوز سەبەپتەرى بولعان شىعار... ءبارىمىز دە پەندەمىز عوي. قايتەم، كەشەگى، قول استىنداعى ۇكىمەت ءباسپاسوز حاتشىسى، رنپك-داعى ورىنباسارى كوزگە تۇسكەنىن كورە الماعان قىزعانىش تا بولعان شىعار، كىم بىلەدى... سول كەزدە ءوزىن وپپوزيتسيا دەپ جاريالاعان ول، ءابليازوۆ، تۇرسىمباەۆ، سارسەنباەۆ، ەرعاليەۆا، باپي جانە باسقالار ماعان قارسى جۇمىس ىستەدى ەمەس پە؟ ولاردىڭ دا ءوز اۋديتورياسى بار، داۋىستىڭ ءبىرازى سول جاققا كەتتى دەپ ويلايمىن.

ءجا، بۇگىنگى اڭگىمەمنىڭ ءمانىسى مىنادا. كەي كەزدە مەنەن «كاجىگەلدين نەگە قازاقستانعا كەلمەيدى؟» دەپ سۇراپ جاتادى. كەشەگى كۇنى ءبىر قۇدالىقتا دا ۇلكەن ازامات وسىنداي سۇراق قويدى، مەن «فەيسبۋكتە جاۋاپ بەرەيىن» دەپ ايتقانمىن، سول ۋادەمدى ورىنداپ جاتىرمىن.

مەنىڭشە، قاجىگەلديننىڭ ەلگە ورالۋىنا كەدەرگى بوپ جاتقان ءۇش سەبەپ بار.

بىرىنشىدەن، ول كىسى فورمالدى تۇردە سوتتالعان، سول سوتتىڭ ساياسي استارى بولعانى بەلگىلى. نازارباەۆ ءوز قارسىلاستارىنا سولاي كۇيە جاعىپ تاستايتىن. سول سوتتىڭ ۇكىمىن جويۋ كەرەك. وعان نازارباەۆ مۇراسىنان قۇتىلا الماي وتىرعان قازىرگى جاڭا قازاقستان قۇرۋشىلار بارا الماي وتىر.

ەكىنشىدەن، قازاقستان ەكونوميكاسى 90-جىلدارى جەكەشەلەندىرىلدى. ول پروتسەستىڭ بار قۇپياسى مەن قۇيتىرقىسىن بۇگە-شىگەسىنە دەيىن بىلەتىن ەكى ادام بولسا، ءبىرى - كاجىگەلدين. ياعني، بۇگىنگى وليگارحتاردىڭ قالاي بايىعانىن بىلەتىن ەكس-پرەمەردىڭ ەلگە قايتىپ كەلگەنىن سول كلاندار مەن توپتار قالامايدى.

ۇشىنشىدەن، جاڭا قازاقستان كادرلارىنىڭ شىنايى قۇنىن كورىپ وتىرمىز: ءومىر بويى شەتەلدە رەسمي پرەزەنتاتسيا جاساپ داعدىلانعان ديپلوماتتار ەل باسقارۋعا كەلىپ جاتىر. ەلشى بولۋ ءبىر نارسە، الۋان-ءتۇرلى، سىرت كوزگە كورىنبەيتىن ىشكى يىرىمدەرى بار قازاق قوعامىن باسقارۋ مۇلدەم بولەك دۇنيە ەمەس پە؟! توقاەۆتىڭ جەكە تاڭداۋىنىڭ ارقاسىندا باعى جانعان سول جاڭا ەليتاسىماق قاجىگەلدين سياقتى اسا كۇردەلى تۇلعانىڭ ەلگە ورالعانىن قالامايتىنى، ءتىپتى ونىڭ ءبىلىمى، بىلىكتىلىگىنەن، مىنەزى مەن تەگەۋرىنىنەن قورقاتىنى ايتپاسا دا تۇسىنىكتى.

ەلگە ورالۋدىڭ ءوز شارتتارى بولاتىن شىعار، ەڭ الدىمەن، توقاەۆتىڭ وزىمەن ءوزارا كەلىسىم بولۋى كەرەك.

بىراق، مەن بىلەتىن قاجىگەلدين ءبارىبىر ۇندەمەي وتىرا المايدى. ونى اقوردا بىلەدى.

ەكونوميكانىڭ تۇرىسى اناۋ، ۇكىمەتتىڭ ءجۇرىسى مىناۋ.

ەڭ ابزالى، توقاەۆ ءوزى جەكەدارا، نازارباەۆ پەن ەسكىقازاقستاندىق بايشىكەشتەردەن تاۋەلسىز شەشىم قابىلداپ، وزىندىك وي-پىكىرى بار اكەجان قاجىگەلدين سەكىلدى شەتەلدەگى جانە ەل ىشىندەگى ازاماتتاردى (ەسكى قازاقستان تۇسىندا بيلىك سىرتقا تەپكەن بىلىكتى ازاماتتار بارشىلىق جانە ولاردىڭ اتتارىن ەل بىلەدى!) مەملەكەتتىك شەشىم قابىلداۋعا تارتسا، نۇر ۇستىنە نۇر بولار ەدى...

بىراق، قايدام...

ءامىرجان قوسان

Abai.kz