قازاقستاننىڭ سىرتقى ىستەر مينيسترلىگى رەسەيدىڭ كۋرسك ايماعىنداعى جاعدايعا بايلانىستى مالىمدەمە جاسادى.

« بۇگىندە بۇكىل الەم رەسەي فەدەراتسياسىنىڭ كۋرسك وبلىسىنىڭ جەكەلەگەن اۋداندارىنداعى جاعدايدى ۇلكەن الاڭداۋشىلىقپەن باقىلاپ وتىر. قازاقستان مەملەكەتتەردىڭ اۋماقتىق تۇتاستىعى قاعيداتىن ناقتى بەلگىلەيتىن بۇۇ جارعىسىن بارلىق ەلدەردىڭ ساقتاۋى قاجەتتىگىن ارقاشان اتاپ كەلەدى»، - دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

قازاقستان مەملەكەتتەر اراسىنداعى بارلىق قاقتىعىستاردى ساياسي جانە ديپلوماتيالىق قۇرالداردى كەڭىنەن قولدانۋ ارقىلى تەك بەيبىت جولمەن شەشۋدى دايەكتى تۇردە جاقتايدى، دەپ ەسەپتەيدى سىرتقى ىستەر مينيسترلىگى.

بۇل رەتتە حالىقارالىق قاۋىمداستىقتىڭ ءوزارا قولايلى شەشىمدەردى كونسترۋكتيۆتى ىزدەۋگە باعىتتالعان كەز كەلگەن كۇش-جىگەرى قۇپتالادى.

رەسەي مەن ۋكراينا اراسىنداعى سوعىستىڭ 902-ءشى كۇنى. 6 تامىزدا ۋكراينا قارۋلى كۇشتەرىنىڭ رەسەيدىڭ كۋرسك وبلىسىنا كىرگەنى بەلگىلى بولدى.

رەسەيلىك باسىلىمنىڭ حابارلاۋىنشا، ۋكراينا قارۋلى كۇشتەرىنىڭ كۋرسك وبلىسىنداعى شابۋىلى توقتاتىلدى، بىراق 2 مىڭ تۇرعىننىڭ تاعدىرى ناقتى بەلگىسىز.

Abai.kz