قر ونەركاسىپ جانە قۇرىلىس مينيسترلىگى 2024-2025 جىلعى جىلۋ بەرۋ ماۋسىمىنا حالىق پەن كوممۋنالدى-تۇرمىستىق سەكتوردى كومىرمەن قامتاماسىز ەتۋ بويىنشا بەلسەندى شارالار قابىلداۋدا. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن پرەسس-كونفەرەنتسيا بارىسىندا ونەركاسىپ كوميتەتى توراعاسىنىڭ ورىنباسارى تۇرار جولماعامبەتوۆ مالىمدەدى.

قىسقى كەزەڭگە دايىندىق اياسىندا، اعىمداعى جىلدىڭ ناۋرىز ايىنان باستاپ مينيسترلىك كومىرمەن قامتاماسىز ەتۋ بويىنشا ۇيىمداستىرۋ جۇمىستارىن جۇرگىزىپ كەلەدى. جەرگىلىكتى اتقارۋ ورگاندارى، كومىر ءوندىرۋشى كاسىپورىندار جانە «قتج» اق-نىڭ قاتىسۋىمەن بىرنەشە جينالىستار ءوتتى. جول كارتاسى ازىرلەنىپ، وڭىرلەرگە جىبەرىلدى، وندا كومىردى ساتىپ الۋ جانە جيناقتاۋ بويىنشا ءىس-شارالار كورسەتىلگەن.

بيىلعى العاشقى جەتى ايدا 58,1 ملن توننا كومىر ءوندىرىلدى، بۇل 2023 جىلدىڭ سايكەس كەزەڭىمەن سالىستىرعاندا 7,6%-عا از. ىشكى نارىققا ەنەرگەتيكاعا 32,3 ملن توننا، كوممۋنالدى-تۇرمىستىق سەكتورعا 2,5 ملن توننا كومىر جونەلتىلدى. كومىر ەكسپورتى دا 13,6%-عا تومەندەپ، 15,8 ملن توننانى قۇرادى.

مينيسترلىك «قتج» جانە كومىر ءوندىرۋشى كاسىپورىندارمەن بىرلەسە وڭىرلەردى كومىرمەن قامتاماسىز ەتۋدى مونيتورينگتەۋدى جالعاستىرۋدا. 15 تامىزداعى جاعداي بويىنشا، كومىرمەن قامتاماسىز ەتۋ جىلدىق جوسپاردىڭ 13%-ىن قۇرادى. ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ماقساتىندا كومىر ەكسپورتىنا ليتسەنزيا بەرۋ ەنگىزىلدى، بۇل وتكەن جىلۋ بەرۋ ماۋسىمىندا جاعدايدى تۇراقتاندىرۋعا مۇمكىندىك بەردى.

نەگىزگى كومىر كولەمى تاۋار بيرجالارى ارقىلى ساتىلادى، بۇل كومىرگە قول جەتكىزۋدى تەڭ دارەجەدە قامتاماسىز ەتۋگە جانە دەلدالداردى جويۋعا مۇمكىندىك بەرەدى. جىلۋ بەرۋ ماۋسىمىنا دايىندىق جوسپارعا سايكەس جۇرگىزىلۋدە، وڭىرلەردى كومىرمەن قامتاماسىز ەتۋ ماسەلەلەرى مينيسترلىكتىڭ ەرەكشە باقىلاۋىندا.

Abai.kz