قازاقستان پرەزيدەنتىنىڭ تاپسىرماسى بويىنشا سۋ رەسۋرستارى جانە يرريگاتسيا مينيسترلىگى جانىنان ۇلتتىق گيدروگەولوگيا قىزمەتى قۇرىلدى. بۇل تۋرالى قر ۇكىمەتىنىڭ ءباسپاسوز قىزمەتى جازدى.

«ەلىمىز ءۇشىن سۋدىڭ ماڭىزى مۇناي، گاز نەمەسە مەتالدان كەم ەمەس. سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت دەپ سانايمىن. سوندىقتان سۋ رەسۋرستارى جانە يرريگاتسيا مينيسترلىگى قۇرىلادى. مينيسترلىكتىڭ اياسىندا ۇلتتىق گيدروگەولوگيا قىزمەتى قايتا جۇمىس ىستەيتىن بولادى»، — دەدى مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا.

قازىرگى ۋاقىتتا اتالعان قىزمەتتى قايتا قۇرۋ ماسەلەسىمەن اينالىساتىن ەكى باسقارماسى بار دەپارتامەنت قۇرىلدى. قر ۇكىمەتىنىڭ قاراۋىنا ۇسىنىلاتىن ۇيىمداستىرۋ قۇرىلىمى مەن جارعىلىق قۇجاتتار ازىرلەندى.

سۋ رەسۋرستارى جانە يرريگاتسيا مينيسترلىگىنىڭ ۇسىنىسىنا سايكەس، ۇلتتىق گيدروگەولوگيا قىزمەتى جەر استى سۋلارىن باسقارۋ، ىزدەۋ-بارلاۋ جۇمىستارى جانە ولاردىڭ مەملەكەتتىك مونيتورينگى سالاسىندا مەملەكەتتىك ساياساتتى جۇرگىزۋ ءۇشىن ۇيىمداستىرۋشىلىق جانە باسقا دا قاجەتتى وكىلەتتىكتەرگە يە بولادى. جەر استى سۋلارىن ۇتىمدى پايدالانۋ ماسەلەلەرى ەرەكشە باقىلاۋدا بولادى.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بولجام بويىنشا قازاقستانداعى جەر استى سۋلارىنىڭ قورى شامامەن 40 تەكشە كيلومەتردى قۇرايتىنىن، ونىڭ 15 تەكشە كيلومەترى قازىرگى تاڭدا پايدالانۋعا دايىن ەكەنىن اتاپ ءوتتى. بۇگىندە ەل ەكونوميكاسىندا بۇل رەسۋرستاردىڭ 7-10%-ى عانا قولدانىلادى. مينيسترلىكتىڭ جوسپارىندا – اۋىزسۋمەن قامتاماسىز ەتۋ، اۋىل شارۋاشىلىعى جەرلەرىن سۋارۋ جانە جايىلىمدىق مال شارۋاشىلىعىن قولداۋ ءۇشىن جەر استى سۋلارىن بەلسەندى تۇردە پايدالانۋ، بۇل رەتتە قورلاردىڭ سارقىلۋىنا جانە لاستانۋىنا جول بەرمەۋ ءۇشىن قاتاڭ باقىلاۋ قامتاماسىز ەتىلەتىن بولادى.

پرەزيدەنتتىڭ باستاماسى قازاقستاننىڭ ورنىقتى دامۋى ءۇشىن سۋ رەسۋرستارىن باسقارۋدىڭ ستراتەگيالىق ماڭىزىن كورسەتەدى، بۇل ەلىمىزدىڭ ىشكى قاجەتتىلىكتەرىنە جانە جاھاندىق ەكولوگيالىق سىن-تەگەۋرىندەرگە سايكەس كەلەدى.

Abai.kz