«كۋرسكىدە نە بولىپ جاتىر» دەگەن اعايىن ءۇشىن: ۋكراينانىڭ كۋرسكى وبلىسىنداعى وپەراتسياسى بىرسىدىرعى جالعاسۋدا. ايتارلىقتاي وزگەرىستەر بايقالمايدى. ەڭ باستىسى – ۋكراينا شەگىنگەن جوق!

قىزۋ شايقاستار ءجۇرىپ جاتقان نۇكتەلەر (4 تامىزداعى احۋال):

1)سۋدجا-رىلسكى اراسىندا كورەنەۆو مەن ولگوۆكا جاقتا قويان-قولتىق ۇرىستار ءجۇرىپ جاتىر.

2)سۋدجا مەن گلۋشكوۆو ورتاسىندا كوماروۆكادا دا شايقاس قىزا ءتۇستى.

3)سۋدجا-لگوۆ اراسىنداعى ورتا جولدا مالايا لوكنيا مەن پوگرەبكي ەلدىمەكەندەرى قىزىل نۇكتە بولىپ تۇر.

شايقاستار سونداي-اق، اپاناسوۆكا، سناگوست، ليۋبيموۆكا، مالايا لوكنيا، بوركي، ۆيشنەۆكا، ۆيكتوروۆكا، گوردەەۆكا، كراسنووكتيابرسكوە، كنياجي پەرۆىي، كۋباتكين، مارتىنوۆكا، نوۆويۆانوۆكا، ورلوۆكا، وبۋحوۆكا جانە ۋسپەنوۆكا ەلدىمەكەندەرىندە ءجۇرىپ جاتىر. وسىنداعى ليۋبيموۆكا، وبۋحوۆكا دەگەن جەرلەرگە قاراساڭىز، ۋكراينا اسكەرى ەداۋىر تەرەڭدەپ كەتكەنىن بايقايسىز...

ۋكراينا اسكەرى كۋرسكى وبلىسىنىڭ شەكارالىق اۋداندارىندا اتوي سالىپ ءجۇرىپ، شەكارا سىرتىنان شەكارا سىزىپ جاتقانىن وسىعان دەيىن جازدىق قوي. وعان دالەل – سۋدجا الىنعاننان كەيىن، نەگىزگى ەكپىندى ورتا جولداعى لگوۆقا ەمەس، نەمەسە كۋرسكىگە توتە تارتاتىن 200-ءىنشى جولدى بويلاي ۇرىس سالۋعا ەمەس، سول قاناتتاعى رىلسكى باعىتىنا بۇرىپ، گلۋشكوۆودا قورشاۋ سالعانى.

ەندى قىزىقتى قاراڭىز: ءبىرازدان بەرى بەلسەندى ۇرىستار سايابىرسىعان بوركي بۇرق ەتە قالدى. ۋكراينا اسكەرى سپالنوە مەن بوركيدە ۇرىس سالدى، بۇگىن.

ۋكراينا سۋدجانىڭ قوس بۇيىرىنەن قوس بۋفەرلىك اۋدان جاساماق پا؟

ۋكارينا شەكارا سىرتىنان بۋفەرلىك اۋماق قالىپتاستىرۋ ماقساتىنان اينىماعان بولسا، لوگيكا بويىنشا ەندى وسى بوركيدەن بۇرىلىپ، پسەل وزەنىن كەشىپ ءوتىپ، سۋدجا-بوركي-پلەحوۆا اۆتوجولىنىڭ ىزىمەن ۋلانوكقا جەتسە، ءارى قاراي بىرنەشە باعىتتا قوزعالۋى مۇمكىن. نە سۋدجانىڭ وزىنە تىكەلەي كەسەدى نەمەسە سۋدجا اەرودرومىنا بارىپ، قورشاۋدى سوننان جابادى.

بىلايشا ايتقاندا، «گلۋشكوۆو 2.0» ستسەناري ىسكە اسسا، سپالنوە مەن سۋدجانىڭ ورتاسىندا +20 شاقتى اۋىل ۋكراينانىكى بولماق.

ۋكراينا اسكەرى بۇل باعىتتاردا «Caesar» ساۋ-لارىن، «HIMARS» جانە «M270 MLRS» سەكىلدى تەحنيكالاردى قولدانۋدا. ودان بولەك ۋكراينا اسكەريلەرى «Dragon» دەيتىن وت بۇركەتىن، تەرميتپەن ورتەپ جىبەرەتىن درونداردى پايدالانا باستادى. تەمىر وكسيدى مەن ءاليۋمينيدىڭ جانىپ تۇرعان تۇيىرشىكتەرىنىڭ قوسپاسى تيگەن جەرىن شىجعىرىپ جاتىر.

Abai.kz