قازاقستاننىڭ نەگىزگى زاڭ شىعارۋشى ورگانى – ءماجىلىستىڭ جازدىق دەمالىستان ورالىپ، قىزۋ جۇمىسقا كىرىسكەنى كەشە عانا. پارلامەنتتىڭ قوس پالاتاسى بىرگە جينالىپ، پرەزيدەنت جولداۋ جولدادى. ءسويتىپ، ەلىمىزدەگى جاڭا ساياسي ماۋسىم از-كەم ۇزىلىستەن سوڭ قايتا قايناي باستادى.

الايدا، سول قايناۋدى ءماجىلىستىڭ ەكس-دەپۋتاتى اسقار سادىقوۆتىڭ شۋى مەزگىلىنەن بۇرىن باستاپ جىبەرگەندەي.

سۋرەت election.gov.kz سكرينى.

ءماجىلىس جۇمىسقا ورالاردان از عانا بۇرىن (28 تامىز كۇنى) قر ورتالىق سايلاۋ كوميسسياسى اسقار سادىقوۆتىڭ دەپۋتاتتىق مانداتىنان ايىرۋ تۋرالى شەشىمدى جاريالادى. قر وسك توراعاسى نۇرلان ءابدىروۆتىڭ اتى مورلەنگەن شەشىم سول وسك سايتىندا جاريالاندى. وندا: «سادىقوۆتى مانداتىنان ايىرۋ – «اق جول» دەمپارتياسىنىڭ ۇلتتىق كەڭەسىنىڭ شەشىمىنە سايكەس ورىندالدى»، - دەپ كوتسەلىگەن.

حوش، بۇل اقپاراتتى پارتيا توراعاسى ازات پەرۋاشەۆ تا راستادى. ءوزىنىڭ «Telegram» ارناسىندا ءھام پارتيانىڭ رەسمي سايتىندا قىسقاشا عانا اقپارات تاراتتى.

سۋرەت akzhol.kz سكرينى.

سادىقوۆ نە ءۇشىن پارتيادان قۋىلدى؟

«قر وسك «اق جول» دەمپارتياسىنىڭ ۇسىنىمى بويىنشا ءماجىلىس دەپۋتاتى اسقار سادىقوۆتى دەپۋتاتتىق مانداتىنان ايىردى. بۇل شەشىمگە ا. سادىقوۆتىڭ دەپۋتاتتىڭ مارتەبەسىنە ساي كەلمەيتىن ارەكەتتەرگە بارعانى نەگىز بولدى.

اتالمىش فاكتىنى پارتيالىق ورگاندار ءوز بەتىنشە انىقتاعان جانە قدپ پلەنۋمىندا قارالعان سوڭ، ا. سادىقوۆ پارتيادان شىعارىلدى، سوعان بايلانىستى ول دەپۋتاتتىق مانداتىنان ايىرىلدى»، - دەپ توقتادى.

كەزىندە پارتيا تۇرماق، مەملەكەتتىڭ رەسمي پوزيتسياسىن پىسقىرماي، رەسەيشىلدىك پوزيتسيادان ءسوز سويلەپ، پارتيا مەن ماجىلىستەن قۋىلعان ابىلداەۆ ىسىنەن ساباق العان «اق جول» وسى جولى ماسەلەنى ايقاي-شۋسىز اياقتاعىسى كەلسە كەرەك، ايتەۋىر وسىلايشا سىرعىتپا مالىمدەمەمەن تىيىلعان ەدى. دەپۋتاتقا لايىق ەمەس دەيتىن ول قانداي ءىس؟ ەشكىم ەشتەڭەنى اشىپ ايتپاعان. دەسە دە، استانانىڭ قوس جاعالاۋىنان شىققان گۋ-گۋ سوزدەر، قازاقستاننىڭ باتىسى مەن شىعىسىن تۇگەل شارلادى. باسقالارىن ايتپاعاندا، ماجىلىستەگى وزگە پارتيانىڭ دەپۋتاتتارى دا: «سادىقوۆتىڭ ءىسى جايلى بارىنە تەز تارادى. ول ءوز كارەراسىن ءوزى قۇرتتى»، - دەپ سىبىرلاسىپ ءجۇردى.

وسىدان سوڭ، «اق جول» رەسمي تۇسىنىكتەمە جاساپ، اسقار سادىقوۆتىڭ پارتيادان قۋىلۋى جانە مانداتىنان ايىرىلۋى سەبەبىن ءتسۇىندىردى. پارتيا جەتەكشىسى ازات پەرۋاشەۆ «سادىقوۆتى پارتيادان شىعارۋعا وعان قاتىستى «لاۋازىم وكiلەتىن اسىرا پايدالانۋ» جانە «ەتيكا نورمالارىن بۇزۋ» جايلى شاعىمدار سەبەپ بولدى» دەدى. سادىقوۆتىڭ ۇستىنەن «حارراسمەنت» تۋرالى ارىز تۇسكەنىن ايتتى. ءتىپتى، سادىقوۆتىڭ ينتيمدىك سيپاتتاعى حاتتارى مەن ونىڭ ۇستىنەن تۇسكەن شاعىمنىڭ سكريندەرى دە جاريا بولدى.

سۋرەت ۆيدەو سكرينى.

سادىقوۆتىڭ جاۋابى: ەكس-دەپۋتات ءۇشىن كەشەگى «باسشى»، بۇگىن جاۋ ما؟

ال سادىقوۆ بەينە ۇندەۋ جاريالاپ، ازات پەرۋاشەۆتى «لاس ويىندارىڭىزعا مەنى ارالاستىرماڭىز» دەپ ايىپتادى. «ەگەر مەنى پارتيادان شىعارعىڭىز كەلسە باسقا دالەلدەر كەلتىرسەڭىز بولار ەدى، بىراق سىزدە ول دا جوق. مەنەن ءالى كۇنگە دەيىن تۇسىنىكتەمە الىنعان جوق.  ەكىنشىدەن، پارتيا باسشىلىعى بۇل جايت تۋرالى ماعان ەسكەرتپەدى. ۇشىنشىدەن، بۇل ماسەلە ءماجىلىستىڭ تارتىپتىك كەڭەسىندە تالقىلانعان جوق. ءسىزدىڭ مالىمدەمەڭىزدى وقىپ تاڭعالىپ وتىرمىن. بىراق ءسىزدىڭ بۇعان دەيىنگى جالعان مالىمدەمەلەرىڭىز باق-تىڭ ەسىنە تۇسەدى دەپ ويلايمىن. ازات پەرۋاشەۆ وسى اقپارات ارقىلى ءوزىنىڭ ورىنباسارى، ۇلتتىق ۇلان گەنەرالى جەمقور دەگەن اقپاراتتى جاسىرىپ قالعىسى كەلگەن بولار. مەنىڭ ويىمشا، ازات پەرۋاشەۆ، ءسىز ماقساتىڭىزعا جەتتىڭىز»، - دەدى.

سۋرەت Hola News سكرينى.

«اق جول» تۇسىنىكتەمەسى: سادىقوۆ پارتيادان «تەندەر» ءۇشىن قۋىلعان با؟

بۇعان قاتىستى بۇگىن «اق جول» پارتياسى تاعى دا تۇسىنىكتەمە جاساپ، سادىقوۆتىڭ پارتيادان قۋىلۋىنىڭ سەبەپتەرىن اشىپ ايتتى.

«ا.سادىقوۆ پارتيا توراعاسى كەلتىرگەن دەرەكتەردەن باسقا ءوزىن پارتيا قاتارىنان شىعارۋعا نەگىز بولارلىق ەش دايەكتىڭ جوقتىعىن العا تارتىپتى. ول ءتىپتى، حارراسمەنت فاكتىلەرىن جوققا شىعارىپ تا وتىرعان جوق. سونىڭ ءوزى عانا ونى پارتيا قاتارىنان شىعارۋعا جەتىپ جاتىر»، - دەيدى «اق جول».

«اق جول» بۇگىنگى تۇسىنىكتەمەسىندە ەكس-دەپۋتاتتىڭ ءۇشىنشى تۇلعالاردىڭ پايداسى ءۇشىن ءوز وكىلەتتىلىگىن اسىرا پايدالانعانىن ايتادى.

«الايدا، پارتيا توراعاسى سادىقوۆقا تاعىلعان ايىپتار ەتيكالىق نورمالاردىڭ بۇزىلۋى عانا ەمەس، وزگە دە سالماعى اۋىر  جايتتارعا قاتىستى ەكەندىگىن تىلگە تيەك ەتكەنى بەكەر ەمەس. مىسالى، ا. سادىقوۆتىڭ ءۇشىنشى تۇلعالاردىڭ پايداسى ءۇشىن ءوز وكىلەتتىلىگىن اسىرا پايدالانۋ ارەكەتى انىقتالدى.

مۇندايدا ەتيكالىق نورمالاردى بۇزۋ ازاماتتىق قۇقىقتىق سالاعا كوبىرەك قاتىستى بولسا، لاۋازىمدىق وكىلەتتىكتى اسىرا پايدالانۋ قۇقىق قورعاۋ ورگاندارىنىڭ قۇزىرەتىنە جاتاتىن قۇقىقتىق قىلمىس بولىپ تابىلادى، سوندىقتان پارتيا توراعاسىنىڭ مالىمدەۋىندە بۇل فاكتىلەر كورسەتىلگەن جوق ەدى»، - دەيدى پارتيا مالىمدەمەسىندە.

سۋرەت akzhol.kz سكرينى.

ايماق اكىمدەرىنىڭ ءبىرى سادىقوۆتىڭ ۇستىنەن شاعىمدانعان!

«بىراق، ونىڭ بارلىعى دا پلەنۋمدا تالقىلانىپ، سادىقوۆتىڭ ارەكەتتەرى پارتيا بەدەلىنە نۇقسان كەلتىرۋى مۇمكىن دەگەن قورىتىندى شىعارىلدى. ماسەلە ا.سادىقوۆتىڭ دەپۋتات رەتىندە مەملەكەتتىك ساتىپ الۋ پروتسەدۋراسىنا ارالاسۋى جانە ءوز تانىستارىنىڭ تەندەرلەردە جەڭىسكە جەتۋىن قامتاماسىز ەتۋ تالاپتارى تۋرالى بولىپ وتىر (اكىمدەردىڭ ءبىرىنىڭ ا.سادىقوۆتىڭ مەملەكەتتىك ساتىپ الۋ ناتيجەلەرىنە ىقپال ەتۋگە تىرىسقانى جونىندە رەسمي حاتتارى قولىمىزدا بار).

ادال بيزنەس پەن شىنايى باسەكەلەستىكتى قولدايتىن «اق جول» دەمپارتياسى وسى جاعدايدى ساراپتاي كەلە مۇنداي ارەكەتتەر پارتيانىڭ جارعىسى مەن باعدارلاماسىنا قايشى كەلەدى دەپ ەسەپتەيدى. سونىمەن قاتار، ا.سادىقوۆتىڭ ارەكەتى سىبايلاس جەمقورلىق قىلمىستارىن جاساۋ تاۋەكەلدەرىن تۋدىرادى.

تالقىلاۋعا قاتىسقان ا.سادىقوۆ ارىپتەستەرىنىڭ پىكىرىنە ءمان بەرمەي، دەپۋتات رەتىندە قانداي دا ءبىر ارەكەت جاساۋعا قۇقىلى ەكەنىن ايتىپ، ءوز قاتەلىگىن مويىنداۋدان باس تارتتى.

وسىعان بايلانىستى پلەنۋم ونى پارتيادان شىعارۋ تۋرالى شەشىم قابىلدادى. پلەنۋمنىڭ وكىلەتتىكتەرىن جانە قابىلدانعان شەشىمنىڭ زاڭدىلىعىن قازاقستان رەسپۋبليكاسىنىڭ ورتالىق سايلاۋ كوميسسياسى قابىلداپ، ناتيجەسىندە ا.سادىقوۆ دەپۋتاتتىق مانداتىنان ايىرىلدى.

وسىلايشا، ا.سادىقوۆتىڭ وزىنە قاتىستى شەشىمنىڭ نەگىزسىز ەكەندىگى تۋرالى اڭگىمەلەرى ەش دايەككە سۇيەنبەگەن بوس سوزدەر عانا»، - دەدى «اق جول» پارتياسى.

ءتۇيىن: وسىلايشا، كەشەلى-بەرى الەۋمەتتىك جەلىدە ەكس-دەپۋتات اسقار سادىقوۆتىڭ توڭىرەگىندە ايقاي-شۋ توقتاماي وتىر. وعان سادىقوۆتىڭ ءوزىنىڭ وتقا ماي قۇيعانداي ءورشىتىپ وتىرعانى سەبەپ.

ەكس-دەپۋتاتقا بايلانىستى تولاسىز ساۋالدارعا بايلانىستى پارتيا جەتەكشىسى ازات پەرۋاشەۆ ەكى كەزەك جاۋاپ بەردى. وندا سادىقوۆتىڭ بىرقاتار دەپۋتات ەتيكاسىنا ساي كەلمەيتىن ارەكەت جاساعان، ءتىپتى قىلمىس بەلگىسى بار ارەكەتتەرى ايتىلىپ، ءبىر عانا مىسال (حارراسمەنت) كەلتىرىلگەن.

«قالعان ماسەلەلەر قىلمىستىق بەلگىسى بار بولعاندىقتان، ءارى قۇقىق قورعاۋ ورگاندارى ءالى ءىس قوزعاماعاندىقتان ايتىلعان جوق ەدى. وكىنىشكە قاراي اسقار سادىقوۆ بايبالامىن ءالى توقتاتپاي الەۋمەتتىك جەلى ارقىلى پارتيامىزعا كۇيە جاعىپ جاتىر. سوندىقتان ءبىز «اق جول» دەموكراتيالىق پارتياسىنىڭ ۇلتتىق كەڭەسىنىڭ ا.سادىقوۆقا قاتىستى حاتتاماسىنان دالەل كەلتىرە وتىرىپ، بۇل ماسەلەنىن نۇكتەسىن قويۋدى ۇيعاردىق»، - دەيدى پارتيا.

«اق جول» مالىمدەمەلەرىنەن تۇيگەنىمىز: ايماق اكىمدەرىنىڭ ءبىرى «اق جول» پارتياسىنا حات جولداپ، سادىقوۆتىڭ تەندەردى ءوز پايداسىنا شەشىپ بەرۋدى تالاپ ەتكەنى انىقتالعان. وعان جىنىستىق سي پاتتاعى حاتتاردىڭ شۋى قوسىلىپ، اقىرى سادىقوۆ پارتيادان شىعارىلعان. ءارى قارايعىسى قۇقىق قورعاۋ ورگاندارىنىڭ جۇمىسى.

Abai.kz