«سىزدەردىڭ قاراۋلارىڭىزعا ەلدىڭ 2025-2029 جىلدارعا ارنالعان الەۋمەتتىك-ەكونوميكالىق دامۋ بولجامى جانە „قازاقستان رەسپۋبليكاسىنىڭ ۇلتتىق قورىنان 2025 — 2027 جىلدارعا ارنالعان كەپىلدەندىرىلگەن ترانسفەرت تۋرالى“ زاڭنىڭ جوباسى ەنگىزىلەدى. بولجامدى قالىپتاستىرۋدىڭ نەگىزىنە مۇنايدىڭ باعاسى باررەلىنە 75 اقش دوللارى جانە دوللاردىڭ ەسەپتىك باعامى 470 تەڭگە بولعانداعى بازالىق ستسەناريى الىندى. بولجام بويىنشا 2025 جىلى جالپى ىشكى ءونىمنىڭ ناقتى ءوسۋى — 5,6 پايىزدى، 5 جىل ىشىندە جالپى ىشكى ءونىمنىڭ ورتاشا جىلدىق ءوسۋى 5,4 پايىزدى قۇرايدى. اتاۋلى جالپى ىشكى ءونىم 2025 جىلعى 150,8 ترلن تەڭگەدەن 2029 جىلى 234,2 ترلن تەڭگەگە دەيىن وسەدى»، — دەدى ۆيتسە-مينيستر.

ونىڭ اتاپ وتۋىنشە، ەكونوميكانىڭ بارلىق سالاسىندا ءوسىم كۇتىلەدى.

ماسەلەن، ونەركاسىپتەگى ورتاشا جىلدىق ءوسۋ قارقىنى — 4,1 پايىز، ونىڭ ىشىندە وڭدەۋ ونەركاسىبىندە — 5,8 پايىزدى، تاۋ-كەن ءوندىرۋ ونەركاسىبىندە 2,9 پايىزدى قۇرايدى.

اۋىل شارۋاشىلىعىنداعى ورتاشا جىلدىق ءوسىم — 5,3 پايىز، قۇرىلىستا — 9,3 پايىز، كولىك قىزمەتتەرىندە — 8,2 پايىز جانە ساۋدادا 7,1 پايىز بولادى.

«مۇناي ءوندىرۋ كولەمى 2025 جىلى 97,2 ملن توننادان 2029 جىلى 104,8 ملن تونناعا دەيىن ۇلعايادى. تاۋارلاردىڭ ەكسپورتى 2025 جىلى 82,3 ميلليارد اقش دوللاردان 2029 جىلى 90,0 ميلليارد اقش دوللارعا دەيىن وسەدى دەپ بولجانادى. يمپورت 61,3 ميلليارد اقش دوللاردان 67,5 ميلليارد اقش دوللارعا دەيىن وسەدى. ينفلياتسيا دەڭگەيى 2025 جىلى 5,5 جانە 7,5 پايىز، 2026 جىلى 5 جانە 6 پايىز ارالىعىندا ايقىندالدى، كەيىننەن 2027-2029 جىلدارى 5 پايىزعا دەيىن تومەندەۋى كۇتىلەدى»، — دەدى ازامات ءامرين.

Abai.kz