مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعاليدى قابىلدادى. بۇل تۋرالى اقوردا حابارلادى. 

اسحات جۇماعالي ءوز بايانداماسىندا بىلاي دەدى: 

* ەلىمىزدەگى سىبايلاس جەمقورلىققا قارسى ءىس-قيمىل شارالارى تۋرالى ەسەبىن تىڭدادى: – جوعارى لاۋازىمدى تۇلعالاردىڭ قاتىسى بار قىلمىستاردىڭ جولىن كەسۋ جۇمىستارى جالعاسىپ جاتىر;

* ۆەدومستۆو 2022 جىلدان باستاپ مەملەكەت پەن كۆازيمەملەكەتتىك سەكتور سۋبەكتىلەرىنە 1 تريلليون 90 ميلليارد تەڭگە سوماسىندا مۇلىكتىك اكتيۆتەر مەن قاراجاتتىڭ قايتارىلۋىن قامتاماسىز ەتكەنىن ايتتى. ءبىلىم بەرۋ ينفراقۇرىلىمىن قولداۋ قورىنا 153,3 ميلليارد تەڭگە اۋدارىلعان. وسى قارجىعا قازىردىڭ وزىندە 50-دەن استام مەكتەپ اشىلعان. سونداي-اق تاعى 30 ءبىلىم وشاعىن سالۋ جوسپارلانعان;

* بۇعان دەيىن بەرگەن تاپسىرمالاردىڭ ورىندالۋ بارىسى تۋرالى باياندادى: – اگەنتتىك ۇلتتىق بانكپەن جانە قارجى مينيسترلىگىمەن بىرلەسىپ، «تسيفرلىق تەڭگە» پلاتفورماسى ارقىلى جۇزەگە اسىراتىن «اقشانى بوياۋ» جوباسىن ىسكە قوسقان; – پرەزيدەنت جولداۋىندا جۇكتەگەن مىندەتتەرگە ساي جول قۇرىلىسى مەن اۋىل شارۋاشىلىعى سالالارىندا سىبايلاس جەمقورلىقتى جويۋ جۇمىستارى جۇرگىزىلىپ جاتىر;

* «جايلى مەكتەپ» ۇلتتىق جوباسىنا مونيتورينگ جاسالىپ جاتقانىن جەتكىزدى. تەكسەرۋ بارىسىندا قاراجاتتى ءتيىمسىز پايدالانۋعا جانە نىسانداردى تاپسىرۋ ۋاقىتىن كەشىكتىرۋگە سەبەپ بولاتىن سىبايلاس جەمقورلىق تاۋەكەلدەرى تالدانادى;

* پەداگوگتەردىڭ ەڭبەكاقى قورىنان ميللياردتاعان قارجى جىمقىرۋعا جول بەرگەن سىبايلاس جەمقورلىق فاكتورلارىن جويۋ شارالارى تۋرالى ايتتى: – بيىل اگەنتتىكتىڭ باستاماسىمەن بيۋدجەت پروتسەستەرىن اۆتوماتتاندىرۋعا، قازىناشىلىقتى ءبىلىم بەرۋ مەكەمەلەرىنىڭ ەسەپ جۇيەلەرىمەن ينتەگراتسيالاۋعا، تولەم قۇجاتتارىنا قول قويۋ كەزىندە بيومەتريانى پايدالانۋعا باعىتتالعان تسيفرلىق شەشىمدەر ەنگىزىلگەن;

* حالىقارالىق قاتىناستار، كادر ساياساتى، نورماتيۆتىك-قۇقىقتىق اكتىلەر ازىرلەۋ پروتسەسى سەكىلدى ۆەدومستۆونىڭ باسقا دا باستى باعىتتارى بويىنشا اتقارىلعان جۇمىستار تۋرالى اقپارات بەردى.

مەملەكەت باسشىسى ەلىمىزدەگى سىبايلاس جەمقورلىقپەن كۇرەستى كۇشەيتۋ جونىندە بىرقاتار تاپسىرما بەردى.

Abai.kz