ءازىربايجان مەن رەسەي اراسى سۋىسا باستادى. قاراڭىز:

اۋەلى رەسەي بيلىگى ماسكەۋدەگى ءازىربايجان دياسپوراسىنىڭ باسشىسى باحتيار گاسانوۆتى رەسەيدەن دەپورتاتسيالادى...

ماسكەۋدەگى ءازىربايجان ۇلتتىق-مادەني ورتالىعىنىڭ توراعاسى گاسانوۆتى بۇعان دەيىن رەسەي ازاماتتىعىنان ايىرىعان بولاتىن.

ماۋسىم ايىنان بەرى گاسانوۆ شەتەل ازاماتتارىن ۋاقىتشا ۇستاۋ ورتالىعىندا بولعان.

بۇعان ءازىربايجانناڭ جاۋابى كوپ كۇتتىرمەدى...

ءازىربايجان ءبىر دەگەندە ءۇش بىردەي رەسەيلىككە حالىقارالىق ىزدەۋ جاريالادى.

اتاپ ايتقاندا: باكۋ رف كولىك ءمينيسترىنىڭ كەڭەسشىسى الەكسەي چاداەۆ، "موسكۆا 24" تەلەارناسىنىڭ جۇرگىزۋشىسى يۆان كنيازەۆ جانە ساياسي كونسۋلتانت سەمەن ۋرالوۆقا حالىقارالىق ىزدەۋ جاريالادى.

ءازىربايجان باس پروكۋراتۋراسى ولارعا "تەرروريزمگە شاقىرۋ", "ەلدىڭ اۋماقتىق تۇتاستىعىن بۇزۋ" جانە "ۇلتتىق ارازدىقتى قوزدىرۋ" ايىپتارىن تاعىپ وتىر.

ولارعا سىرتتاي قاماۋعا الۋ تۇرىندەگى بۇلتارتپاۋ شاراسى تاڭدالدى.

قازىر رەسەي مەن ءازىربايجان اراسى شىنىمەن دە كۇردەلى داعدارىسقا تاپ بولعان.

بۇل داۋدىڭ باسى — ۇشاق اپاتىنان باستالادى. ء"ازىربايجان اۋەجولدارىنا" تيەسىلى "Embraer E190" ۇشاعىنا گروزنىي اسپانىندا رەسەيدىڭ وعى ءتيىپ، اقتاۋدىڭ ءدال تۇبىنە جەتەر-جەتپەي قۇلاعاننان سوڭ، باكۋ ماسكەۋدى قاتاڭ ايىپتادى. ارنايى كوميسسيا قۇرىلدى. اپاتتان ادامدار قازا تاپتى. اقىرى ءپۋتيننىڭ ءوزى ايىپتى مويىنداۋعا ءماجبۇر بولدى.

بۇعان قوسا، 2020 جىلعى قاراباق سوعىسىنداعى جەڭىستەن سوڭ باكۋدىڭ ماسكەۋدىڭ بالەلى-جالالى ارەكەتتەرىنە قارسى باتىل مالىمدەمەلەرى كوبەيگەنى جانە فاكت.

وسىدان باستاپ ەكى ەلدىڭ كۇشتىك قۇرىلىمدارى مەن ديپلوماتتارىنىڭ ءوزارا سوزقاعىستارى جيىلەدى...

ەكەۋدىڭ اراسىن سۋىتقان تاعى ءبىر وقيعا - ءازىربايجان ارنايى قىزمەتى باكۋدە ورنالاسقان رەسەيدىڭ باقىلاۋىنداعى "Sputnik ءازىربايجان" رەداكتسياسى مەن كەڭسەسىنە جۇرگىزىلگەن ءتىنتۋ بولدى.

اقىرىندا رەسەيدىڭ پروپاگاندالىق اگەنتتىگىنىڭ قىزمەتكەرلەرى "تىڭشىلىقپەن اينالىستى" دەپ ۇستالدى.

ال رەسەي ورالداعى ءازىربايجان دياسپوراسىنىڭ باسشىسى شاحين شيحلينسكيدى تۇتقىندادى (2025 جىل).

رەسەي كۇشتىك قۇرىلىمدارى شيحلينسكيدى ماسكەۋدە ارنايى وپەراتسيا جاساپ ۇستاعان. كەيىن ەكاتەرينبۋرگ سوتى (كيروۆ اۋداندىق سوتى) وعان "اسا اۋىر قىلمىستار جاسادى" دەگەن ايىپپەن ۇكىم شىعارىپ، ءارتۇرلى ەپيزودتار بويىنشا قاتاڭ رەجيمدەگى كولونياعا جىبەرىپ، 24 جىل جازا كەستى.

اليەۆتىڭ كۇتپەگەن سوققىسى...

ەكىارا وسىلاي ۋشىعىپ تۇرعان-دى. وتكەندە ءازىربايجان پرەزيدەنتى يلحام اليەۆ كەزەكتى رەت ماسكەۋگە ۇنامايتىن مالىمدەمەلەر جاسادى. كەڭەس وداعى ءداۋىرىن اشىق سىنعا الدى. كسرو بيلىگىن "وتارشى" دەپ اتادى. ءازىربايجاننىڭ كسرو قۇرامىندا بولعان كەزەڭىن رەسمي تۇردە "وتارشىلىق" دەپ اتادى. ونىمەن قويماي، ماسكەۋدىڭ ەركىن وي، ازات پىكىردەن ولەردەي قورقاتىنىن ايتىپ، ءاجۋا ەتتى...

تاعى ءبىر فاكتى...

سوڭعى جىلدارى ءازىربايجان اقش پەن باتىسقا قاراي باتىل قادامدار جاساي باستادى. بۇل وزكەزەگىندە رەسەيدىڭ وڭتۇستىك قاپقازداعى ىقپالىنىڭ ايتارلىقتاي السىرەي باستاعانىن اڭعارتادى.

مىسالى، 2025 جىلعى 7-8 تامىزدا اليەۆ ۋاشينگتونعا رەسمي ساپارمەن باردى. وندا اقش ليدەرى ترامپ پەن ارمەنيا پرەمەرى پاشينيان جانە ءازىربايجان ليدەرى اليەۆ اراسىندا تاريحي ۇشجاقتى كەزدەسۋ ءوتتى. تۇپكىلىكتى بىتىمگە قول قويىلدى.

وسىلايشا ارمەنيا مەن ءازىربايجاننىڭ دەمارشى - رەسەيدىڭ وڭتۇستىك قاپقازداعى ىقپالىن ايتارلىقتاي السىرەتۋدە...

Abai.kz