قازاق ءتىلىنىڭ مەملەكەتتىك ءتىل رەتىندەگى ءرولىن كۇشەيتۋگە اگەنتتىك تاراپىنان اسا نازار اۋدارىلادى. بۇل تۋرالى انتيكور-دىڭ ءباسپاسوز قىزمەتى حابارلادى. 

بۇل باعىتتا ءتيىستى جوسپار شەڭبەرىندە كەشەندى جۇمىس اتقارىلىپ كەلەدى. اتاپ ايتقاندا، ازىرلەنەتىن قۇجاتتارعا مونيتورينگ جۇرگىزۋ، «قازتەست» جۇيەسىندە دياگنوستيكالىق تەستىلەۋدەن ءوتۋ، تىلدىك ورتانى دامىتۋ مەن وزەكتى پروبلەمالارى جونىندەگى جانە ءتىل مادەنيەتىن جەتىلدىرۋگە قاتىستى ءىس-شارالاردى وتكىزۋ كوزدەلگەن.

سولاردىڭ ءبىرى بولىپ اعىمداعى جىلى 4 قازاندا وتكەن «مەملەكەتتىك تىلدە سويلەۋ مادەنيەتى» اتتى ءىس-شاراسى.

ماقساتى – اگەنتتىك قىزمەتكەرلەرىنىڭ مەملەكەتتىك تىلدە سويلەۋ مادەنيەتىن ارتتىرۋ. اتالعان ءىس-شارادا قر پرەزيدەنتى جانىنداعى مەملەكەتتىك باسقارۋ اكادەمياسىنىڭ ديپلوماتيا ينستيتۋتى تىلدىك قۇزىرەتتىلىكتى دامىتۋ كابينەتىنىڭ مەڭگەرۋشىسى، پ.ع.ك.، قاۋىمداستىرىلعان پروفەسسور ن.ت تولەنبەرگەنوۆا، اگەنتتىك توراعاسى حاتشىلىعىنىڭ باسشىسى ق.ب. مىرزاعالي باياندامامەن ءسوز سويلەدى.

ءىس-شارا كەزىندە سويلەۋ مادەنيەتى، ءتىلدى وقىتۋ تۇرعىسىنان، قازاقشا تەست تاپسىرۋ بويىنشا تانىستىرىلىمدار كورسەتىلىپ، قىزمەتكەرلەردىڭ پىكىر الماسۋ كەزەڭىنە جالعاستى.

«ديالوگ قۇرۋ: ءتىلدى شۇبارلاماي تازا سويلەيىك!»، «تەز ويلا، ءسوز ويلا» ويىنى، «سوزگە ءازىل ارالاستىرىپ سويلەۋ ورىندى/ورىنسىز»، اقىنداردىڭ ولەڭدەرىن وقۋ بويىنشا سايىس كەزەڭدەرى ءوتتى. ءىس-شارا سوڭىندا ۇزدىك ونەر كورسەتكەن قىزمەتكەرلەر اگەنتتىك توراعاسىنىڭ ديپلومدارمەن، قاتىسۋشىلار ەسكەرتكىش سىيلىقتارمەن ماراپاتتالدى.

اگەنتتىكتىڭ نورماشىعارماشىلىق جانە حالىقارالىق ىنتىماقتاستىق دەپارتامەنتى حالىقارالىق ىنتىماقتاستىق دەپارتامەنتىنىڭ باس ساراپشىسى ە.ت. ايدارحان 1-ورىندى; پرەۆەنتسيا قىزمەتى سىبايلاس جەمقورلىقققا قارسى مادەنيەتتى قالىپتاستىرۋ باسقارماسىنىڭ اسا ماڭىزدى ىستەر جونىندەگى وفيتسەرى ج.ج. جىلقىشيەۆا 2-ورىندى; نورماشىعارماشىلىق جانە حالىقارالىق ىنتىماقتاستىق دەپارتامەنتى نورماشىعارماشىلىق باسقارماسىنىڭ باس كونسۋلتانتى ءا.ق. تۇرانقۇلوۆا 3-ورىندى يەلەندى.

اگەنتتىكتە قازاق ءتىلىنىڭ مەملەكەتتىك ءتىل رەتىندەگى تولىققاندى قىزمەتىن قامتاماسىز ەتۋ، ءتىل مادەنيەتىن ودان ءارى ارتتىرۋ جانە تىلدىك كاپيتالدى دامىتۋعا باعىتتالعان ءىس-شارالار الداعى ۋاقىتتا جالعاسىن تاباتىن بولادى.

Abai.kz