ءماجىلىس دەپۋتاتى ەرلان سايروۆ ترامپ بيلىگى قازاقستانعا قالاي اسەر ەتەتىنىن ايتتى.

ترامپتىڭ بيلىككە كەلۋى – دۇنيەجۇزىلىك ساۋدا فورماتىن وزگەرتەدى. ويتكەنى ونىڭ بيلىككە كەلۋىندەگى نەگىزگى ۇران – اقش-تىڭ ەكونوميكاسىن ءوسىرىپ، ءوندىرىسىن ارتتىرۋ جانە امەريكالىقتاردى جۇمىسپەن قامتۋ. ەڭ الدىمەن، اقش پەن قىتايدىڭ اراسىندا ساۋدا سوعىسى بولۋى مۇمكىن. سەبەبى بۇگىنگى تاڭدا ەكى ەل اراسىنداعى تاۋار اينالىمى 380 ملرد دوللارعا جەتىپ وتىر. سونىڭ 280 ملرد دوللارى قىتايدىڭ امەريكاعا ەنگەن تاۋارلارى، ال 90 ملرد دوللارى، كەرىسىنشە اقش-تىڭ قىتايعا جىبەرگەن تاۋارلارى. ەندى قىتاي تاۋارلارىنىڭ امەركاعا لەگىن توقتاتۋ ءۇشىن ترامپ باج سالىعىن 60 پايىزعا وسىرمەك. سالدارىنان قىتاي ەكونوميكاسىنىڭ ىشىندەگى ماسەلەلەرى كۇردەلەنەدى. ويتكەنى كورشى ەلدە جاستاردىڭ اراسىنداعى جۇمىسسىزدىق جانە تاعى باسقا اۋقىمدى ماسەلەلەر بار، - دەيدى ماجىلىسمەن.

دەپۋتاتتىڭ بۇل ەكونوميكالىق ساياسي شيەلەنىستى قازاقستان ۇتىمدى پايدالانۋعا ءتيىس ەكەنىن ايتادى. سوزىنشە، قازاقستان ساۋدا حابىن جاساۋعا ۇمتىلۋى كەرەك.

ەلىمىز ءۇشىن ەڭ قولايسىز ماسەلەنىڭ ءبىرى ترامپ مۇنايدىڭ باعاسىن 40-50 دوللارعا ءتۇسىرۋدى كوزدەپ وتىر. بۇل، ارينە ەلىمىز ءۇشىن اۋىر سوققى بولادى. سەبەبى ەل ەكونوميكاسى مۇناي جانە باسقا دا مينەرالدى رەسۋرستاردى ساتۋعا باعىتتالعان. ءبىزدىڭ بيۋدجەتىمىز تىكەلەي مۇنايعا بايلانىستى ەكەنى انىق. سوندىقتان قازىردەن باستاپ مۇنايسىز ءومىر سۇرۋگە، سونىمەن بىرگە ەكونوميكامىزدى ارتاراپتاندىرۋعا جىلدام دايىندالۋىمىز قاجەت. جاقىن ارادا ەنەرگيانىڭ بالاما كوزدەرى پايدا بولاتىن بولسا، وندا مۇنايعا دەگەن ۇسىنىس ازايادى. سوندىقتان ءبىز قازىر مۇنايدان باسقا وڭدەلگەن ونىمدەردى جاساۋعا ۇيرەنىپ، داعدىلانۋىمىز كەرەك، - دەدى ەرلان سايروۆ.

Abai.kz