بۇگىن سەناتتىڭ جالپى وتىرىسىنان كەيىن تىلشىلەر «ق. بيشىمباەۆتىڭ شىنىمەن دە جازاسىن وتەپ جاتقانى تۋرالى فوتوسۋرەتى نەمەسە بەينەماتەريالدار نەگە جاريالانبادى؟» دەگەن سۇراق قويدى.

«بيشىمباەۆتىڭ قاي جەردە قاماۋدا وتىرعانى قۇپيا ەمەس. بىزدەگى كولونيالار ءارتۇرلى كاتەگوريالارعا بولىنگەن، ياعني جەڭىلدەتىلگەن، ورتاشا جانە قاۋىپسىزدىك دەڭگەيى جوعارى دەپ ايقىندالعان. ول كىسى بارىنشا جوعارى قاۋىپسىزدىك تالابى قاراستىرىلعان ستەپنوگورداعى كولونيادا ءوز جازاسىن وتەپ جاتىر»، - دەدى م. قوجاەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ پايىمىنشا، ق. بيشىمباەۆتىڭ قاماۋدا وتىرعان ورنىنا قاتىستى دۇربەلەڭگە تىلشىلەردىڭ تەكسەرىلمەگەن مالىمەتتەردى تاراتىپ جىبەرۋى سەبەپ بولدى. ەگەر سوتتى بولعان ادام ءوزىن كوپشىلىككە كورسەتكىسى كەلمەسە، ونى ەشكىم ماجبۇرلەي المايدى.

«ءتيىستى كولونيادا جازاسىن وتەپ جاتقانى ناقتىلاندى. سوتتالعان ادامنىڭ قۇقىعى بار عوي؟ ول جەر زووپارك ەمەس. قىلمىستىق-اتقارۋ جۇيەسى كوميتەتىنىڭ وكىلدەرى سول جەردە بيشىمباەۆ وتىر دەپ ەكسكۋرسيا جاساي المايدى»، - دەدى سەناتور.

Abai.kz