قازاقستان ورتالىق ازياداعى ەڭ ءىرى ەكونوميكا رەتىندەگى پوزيتسياسىن ساقتاپ كەلەدى: 2025 جىلدىڭ قورىتىندىسى بويىنشا ەلدىڭ ءجىو 159,6 ترلن تەڭگەگە نەمەسە شامامەن 306 ملرد اقش دوللارىنا جەتتى.

قازاقستانعا ءوڭىردىڭ جيىنتىق ءجىو-ءنىڭ شامامەن 54%-ى تيەسىلى. بۇل تۋرالى «ەكونوميكالىق زەرتتەۋلەر ينستيتۋتى» اق باسقارما توراعاسىنىڭ ورىنباسارى داستان اكەباەۆ استانادا وتكەن National Think Tank Forum «بولاشاق پروەكتسياسى: ناتيجەلەردى پايىمداۋدان جاڭا كۇن تارتىبىنە دەيىن» فورۋمىندا مالىمدەدى.

ونىڭ ايتۋىنشا، سوڭعى بەس جىلدا قازاقستان ەكونوميكاسىنىڭ ناقتى ءوسىمى 21,3%-دى قۇرادى. بۇل رەتتە ەكونوميكا اۋقىمىنىڭ ۇلعايۋى بىرتىندەپ ءجۇرىپ جاتقان قۇرىلىمدىق وزگەرىستەرمەن قاتار جۇرۋدە – وڭدەۋ ونەركاسىبىنىڭ، كاسىپكەرلىكتىڭ، ينۆەستيتسيالار مەن ىشكى نارىقتىڭ ءرولى ارتىپ كەلەدى.

2025 جىلى وڭدەۋ ونەركاسىبىندەگى ءوندىرىس كولەمى 30,7 ترلن تەڭگەگە جەتتى. 2021 جىلمەن سالىستىرعاندا اتالعان سەكتورداعى ونەركاسىپتىك ءوندىرىس يندەكسى 23,4%-عا ءوستى.

جان باسىنا شاققانداعى ءجىو كورسەتكىشىندە دە وڭ ديناميكا بايقالادى. 2025 جىلى بۇل كورسەتكىش 7,8 ملن تەڭگەنى نەمەسە 15 مىڭ اقش دوللارىنان استام سومانى قۇرادى. 2021 جىلمەن سالىستىرعاندا كورسەتكىش تەڭگەمەن ەسەپتەگەندە 77,2%-عا، ال دوللارلىق ماندە 44,7%-عا ءوستى.

ەكونوميكا اۋقىمىنىڭ ۇلعايۋى بىرتىندەپ ءجۇرىپ جاتقان قۇرىلىمدىق وزگەرىستەرمەن قاتار جۇرۋدە – وڭدەۋ ونەركاسىبىنىڭ، كاسىپكەرلىكتىڭ، ينۆەستيتسيالار مەن ىشكى نارىقتىڭ ءرولى ارتىپ كەلەدى، – دەپ اتاپ ءوتتى ءبىرجان باتكەەۆ.

ينۆەستيتسيالىق بەلسەندىلىك ەكونوميكالىق ءوسۋدىڭ نەگىزگى فاكتورلارىنىڭ ءبىرى بولىپ قالا بەرەدى. 2025 جىلى نەگىزگى كاپيتالعا سالىنعان ينۆەستيتسيالار 23,5 تريلليون تەڭگەگە جەتتى، بۇل 2021 جىلمەن سالىستىرعاندا 53%-عا وسكەنىن كورسەتەدى.

سونىمەن قاتار، شاعىن جانە ورتا بيزنەستىڭ ورنى نىعايىپ كەلەدى، بۇل سەكتوردا 4,53 ميلليون ادام جۇمىسپەن قامتىلعان – بەس جىل ىشىندە جۇمىسپەن قامتىلعاندار سانى 28,9%-عا ءوستى. ەلدىڭ ءجىو-دەگى شاعىن جانە ورتا بيزنەستىڭ ۇلەسى 40,9%-عا جەتتى، بۇل 2021 جىلمەن سالىستىرعاندا 7,4% وسكەنىن كورسەتەدى.

جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 2,18 ملن-عا جەتتى.

وسىلايشا، سوڭعى جىلدارداعى ەكونوميكالىق ديناميكاسى تەك ءجىو-ءنىڭ وسۋىمەن عانا ەمەس، سونىمەن قاتار ونىڭ قۇرىلىمىنىڭ بىرتىندەپ وزگەرۋىمەن، ينۆەستيتسيالىق بەلسەندىلىكتىڭ ارتۋىمەن جانە جەكە كاسىپكەرلىكتىڭ ءرولىنىڭ كەڭەيۋىمەن سيپاتتالادى.

دەرەككوزى: baq.kz

Abai.kz