قاراشا ايىنىڭ قورىتىندىسى بويىنشا تەڭگە باعامى 5%-عا السىرەپ، 1 اقش دوللارى 512,52 تەڭگەگە دەيىن باردى.

قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى ءبىر ايدا 278 ملن-نان 262 ملن اقش دوللارىنا دەيىن تومەندەدى. ساۋدا-ساتتىقتىڭ جالپى كولەمى 5,5 ملرد اقش دوللارى بولدى.

- رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن قاراشا ايىندا ۇلتتىق قوردان 1 260 ملن اقش دوللارىنا ۆاليۋتا ساتىلدى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 23%-ىن جانە كۇنىنە 60 ملن اقش دوللارىنان اسپايتىن مولشەردى قۇرادى. ۇلتتىق بانك ۇلتتىق قوردىڭ قاراجاتىمەن وپەراتسيالار جۇرگىزۋ كەزىندە نارىقتىڭ بەيتاراپ قاعيداتىن ساقتايدى. بۇل شەتەل ۆاليۋتاسىن ۇدايى جانە بىركەلكى ساتۋدى بىلدىرەدى، - دەلىنگەن حابارلامادا.

ۇكىمەتتىڭ الدىن الا بولجامدى وتىنىمدەرى بويىنشا رەسپۋبليكالىق بيۋدجەتكە ترانسفەرت بولۋگە 2024 جىلعى جەلتوقساندا ۇلتتىق بانك ۇلتتىق قوردان 800 ملن-نان 900 ملن اقش دوللارىنا دەيىنگى مولشەردە ۆاليۋتا ساتىلادى دەپ كۇتەدى.

- بجزق ۆاليۋتالىق اكتيۆتەرىنىڭ ۇلەسى وسىعان دەيىنگى جوسپارعا سايكەس شامامەن 40% ەكەنىن ەسكەرە وتىرىپ، ۇلتتىق بانك قاراشادا زەينەتاقى اكتيۆتەرىنىڭ ينۆەستيتسيالىق پورتفەلىنە اقش دوللارىن ساتىپ العان جوق. جەلتوقساندا دا ۆاليۋتا ساتىپ الۋ جوسپارلانبايدى، - دەلىنگەن ۇلتتىق بانك حابارلاماسىندا.

ۆاليۋتا نارىعىندا تەپە-تەڭدىكتى ارتتىرۋ ءۇشىن 2024 جىلعى 19 قاراشادا ۇكىمەت قاۋلىسىنا سايكەس كۆازيمەملەكەتتىك سەكتور سۋبەكتىلەرىندەگى ۆاليۋتالىق ءتۇسىمنىڭ 50%-ىن مىندەتتى تۇردە ساتۋى تۋرالى نورما قايتا كۇشىنە ەندى. كۆازيمەملەكەتتىك سەكتور كومپانيالارى ۆاليۋتا نارىعىندا ەكىنشى دەڭگەيلى بانكتەر ارقىلى دەربەس ساتادى.

ۇلتتىق بانك شىلدەدە ۇكىمەتتىڭ ۇلتتىق قورعا «قازاتومونەركاسىپ» اق-نىڭ اكتسيالارىن ساتىپ الۋ تۋرالى شەشىمىن ىسكە اسىرۋ اياسىندا ۇلتتىق قورداعى ۆاليۋتالىق اكتيۆتەردىڭ ءبىر بولىگىن ساتۋ ارقىلى ۇلتتىق بانكتىڭ التىن-ۆاليۋتا رەزەرۆتەرىنە كونۆەرتاتسيالادى. نارىقتىق بەيتاراپتىقتى ساقتاۋ ءۇشىن جانە وسى وپەراتسيانى ۆاليۋتا نارىعىنا شىعارۋ ءۇشىن ۇلتتىق بانك شىلدەنىڭ ورتاسىنان باستاپ ساتىپ الىنعان كولەمدى بىركەلكى ساتۋعا كىرىستى.

- ۇلتتىق بانك ترانسپارەنتتىلىك قاعيداتى اياسىندا ۆاليۋتا نارىعىندا جۇرگىزىلەتىن بارلىق وپەراتسيا تۋرالى اقپاراتتى تولىق اشىپ كورسەتۋدى جالعاستىرادى. قىسقامەرزىمدى پەرسپەكتيۆادا تەڭگەنىڭ ديناميكاسى نارىققا قاتىسۋشىلاردىڭ كۇتۋلەرىنە، توقساندىق سالىق تولەمدەرىنە، الەمدىك نارىقتارداعى احۋالعا جانە گەوساياسي جاعدايدىڭ وزگەرۋىنە بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانا بەرەدى، - دەلىنگەن حابارلامادا.

Abai.kz