الماتىدا وتباسىلىق قۇندىلىقتاردى دارىپتەپ، ونەگەلى شاڭىراقتاردى كوپشىلىككە ۇلگى ەتۋگە باعىتتالعان «مەرەيلى وتباسى» بايقاۋىنىڭ قالالىق كەزەڭى اياقتالدى.  بيىل الماتى قالاسى اتالعان ۇلتتىق كونكۋرسقا 12-رەت قاتىسىپ وتىر.

جەڭىمپازداردى ماراپاتتاۋ سالتاناتىنا قالانىڭ سەگىز اۋدانىندا وتكەن ىرىكتەۋ كەزەڭدەرىنىڭ جەڭىمپازدارى قاتىسىپ، ەستەلىك جانە اقشالاي سىيلىقتارمەن ماراپاتتالدى. الماتى قالاسىنىڭ جەڭىمپازى بيليال وتباسى بولدى. ەندى ولار استانا قالاسىندا وتەتىن رەسپۋبليكالىق بايقاۋدىڭ جەڭىمپازدارىن ماراپاتتاۋ راسىمىنە قاتىسادى.

بيىلعى بايقاۋدا ءادىل قازىلار قۇرامىندا بولعان الماتى قالالىق قوعامدىق كەڭەسىنىڭ مۇشەسى مارات قاليمولدين ىرىكتەۋ اسا جوعارى دەڭگەيدە وتكەنىن ايتتى:

–  جالپى 262 ءوتىنىم ءتۇستى. اۋدانداردا ءبىرىنشى كەزەڭ ءوتىپ، قالالىق كەزەڭگە ءار اۋداننان ەكى وتباسى قاتىستى. «مەرەيلى وتباسى» – ەلىمىزدەگى اسا ماڭىزدى، قوعام ءۇشىن كوكەيكەستى ماسەلەلەردىڭ ءبىرىن كوتەرەتىن ەرەكشە بايقاۋ. وتباسىلىق قۇندىلىقتاردى ساقتاۋ مەن دارىپتەۋدە مۇنداي شارالاردىڭ ورنى بولەك. ءتالىمى مەن تاربيەسى مول، ونەگەلى وتباسىلاردىڭ جەڭىسكە جەتىپ، حالىققا ۇلگى بولۋى – بايقاۋدىڭ باستى ماڭىزى، – دەدى ول.

«مەرەيلى وتباسى» بايقاۋىنىڭ مۇنداي يگى باستامالارى بەرەكەلى شاڭىراقتاردىڭ ونەگەسىن ناسيحاتتاپ قانا قويماي، جاس ۇرپاققا وتباسىنىڭ قادىرىن ۇعىندىرۋعا جانە قوعامداعى وتباسىلىق قۇندىلىقتاردى ودان ءارى نىعايتۋعا ىقپال ەتەدى.

Abai.kz