بىرىككەن ۇلتتار ۇيىمىنىڭ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسى ايماقتاعى 2024 جىلعا ارنالعان ينۆەستيتسيا تۋرالى ەسەبىن جاريالادى. ەسەپكە سايكەس، قازاقستان جاڭا جوبالارعا 15,7 ملرد دوللار تارتىپ، سولتۇستىك جانە ورتالىق ازيا ايماعىنداعى ينۆەستيتسيا تارتۋ بويىنشا كوشباسشى اتاندى.

2024 جىلدىڭ قورىتىندىسى بويىنشا قازاقستانعا ينۆەستيتسيانىڭ ءوسىمى 2023 جىلمەن سالىستىرعاندا 88 پايىزدى قۇرادى. وبلىسقا تارتىلعان بارلىق ينۆەستيتسيانىڭ 63 پايىزى ءبىزدىڭ ەلگە تيەسىلى. ودان كەيىنگى ورىنداردا كەلەسى مەملەكەتتەر ورنالاستى:

وزبەكستان – $4 ملرد (-49%)

قىرعىزستان – $2,1 ملرد (+310%)

ءازىربايجان – $1,2 ملرد (+1%)

تۇركىمەنستان – $339 ملن

گرۋزيا – $126 ملن

ارمەنيا – $67 ملن

باياندامادا ايماقتىڭ ينۆەستيتسيالىق احۋالى حالىقارالىق كومپانيالاردىڭ ءوز ستراتەگيالارىن ارتاراپتاندىرۋعا جانە جاسىل ەنەرگيا، تسيفرلاندىرۋ جانە تەحنولوگيالىق يننوۆاتسيالار سياقتى نەگىزگى سالالارداعى جوبالاردى قولداۋعا دەگەن ىنتالىلىعىن كورسەتەتىنى اتاپ وتىلگەن.

«بۇل تۇرعىدا ينۆەستيتسيالىق اگەنتتىكتەر مەن مۇددەلى مينيسترلىكتەردىڭ بەلسەندى جۇمىسى ەرەكشە ماڭىزدى. جاڭا باعىتتاردىڭ تابىستى بولۋى تەك قولايلى ساياساتتى قۇرۋعا عانا ەمەس، سونىمەن قاتار ينۆەستورلاردى بارلىق كەزەڭدەردەگى قولداۋعا، سونىڭ ىشىندە ينۆەستيتسيادان كەيىنگى قولداۋعا دا بايلانىستى»، - دەپ باياندامادا ەسكەرتىلدى.

جاھاندىق سىن-قاتەرلەرگە قاراماستان، قازاقستان تۇراقتى ءوسۋ مەن جاڭا مۇمكىندىكتەر الاڭىنا اينالىپ، ءىرى شەتەلدىك ينۆەستورلاردىڭ نازارىن اۋدارۋدى جالعاستىرۋدا. بيىل ەلدە ءىرى ينۆەستيتسيالىق ءىس-شارالار – شەتەلدىك ينۆەستورلار كەڭەسى جانە جاھاندىق ينۆەستيتسيالار جونىندەگى قازاقستاندىق دوڭگەلەك ۇستەل - 2024 ءوتتى، بۇل قازاقستاننىڭ وڭىردەگى نەگىزگى ينۆەستيتسيالىق حاب رەتىندەگى ۇستانىمىن نىعايتتى.

Abai.kz