كاتاردا كەزدەسكەن ەكى تاراپ وكىلدەرى 15 ايدان اسقان قىرعىن سوعىستى توقتاتۋ تۋرالى كەلىسىمگە كەلگەن. بۇل حاباردى الەمدىك باق-قا سارسەنبى كۇنى يزرايل بيلىگى جەتكىزگەن.

كاتار پرەمەر-ءمينيسترى مۇحاممەد بەن ابدۋلراحمان ءال تاني كەلىسىمنىڭ كەپىلگە الىنعاندار مەن تۇتقىنداردى بوساتىپ، «تۇراقتى تىنىشتىقتى» قالپىنا كەلتىرەتىنىن ايتتى.

كەلىسىمگە سايكەس، اتىستى توقتاتۋ الداعى جەكسەنبى، 19 قاڭتاردا باستالادى. ول سونداي-اق ەكى جاقتىڭ كەيبىر لوگيستيكالىق ماسەلەلەردى شەشۋ ءۇشىن ءالى دە جۇمىس ىستەپ جاتقانىن قوسا كەتتى.

كەلىسىمگە نە كىرەدى؟

اتىستى توقتاتۋدىڭ ءبىرىنشى كەزەڭى التى اپتاعا سوزىلادى جانە يزرايل اسكەرلەرى حالىق تىعىز ورنالاسقان اۋدانداردان الىس گازانىڭ شىعىسىنا شىعارىلادى. كەلىسىمنىڭ قۇپيالىعىنا بايلانىستى اتى-ءجونىن اتاماۋدى وتىنگەن شەنەۋنىكتەردىڭ ايتۋىنشا، كەپىلگە الىنعاندار وسى كەزەڭدە بوساتىلا باستايدى.

اقش پرەزيدەنتى بايدەن كەلىسىمنىڭ ءبىرىنشى كەزەڭىندە پالەستينالىقتاردىڭ گازانىڭ بارلىق اۋداندارىنداعى (كوپ بولىگى جەرمەن-جەكسەن بولعان) تۇراقتارىنا قايتا ورالىپ، گۋمانيتارلىق جۇكتەردىڭ كوپ مولشەرىن الاتىنىن ايتتى.

كىمدەر بوساتىلادى؟

اتىستى توقتاتۋ كەلىسىمى ورىندالسا، گازادا تۇتقىنعا الىنعان يزرايلدىكتەر مەن يزرايلدەگى پالەستينالىق تۇتقىندار بوساتىلادى. گازادا 100-گە جۋىق كەپىلگە الىنعاندار قالدى دەپ بولجانۋدا، بىراق يزرايل بيلىگى ولاردىڭ 35-كە جۋىعى ءولدى دەپ ەسەپتەيدى.

حاماس جەتەكشىلەرى يزرايلدە ۇستالعان پالەستينالىق تۇتقىنداردىڭ بوساتىلۋىن قالايدى.

ءال-تاني 42 كۇندىك كەلىسىم بارىسىندا 33-كە جۋىق يزرايلدىك كەپىلدەن بوساتىلاتىنىن ايتتى، بىراق قانشا پالەستينالىق تۇتقىن بوساتىلاتىنىن ناقتى ايتپادى.

ءيزرايلدىڭ ەكى جوعارى لاۋازىمدى شەنەۋنىگى كەلىسىم يزرايل ۇكىمەتىنىڭ رەسمي ماقۇلداۋىن قاجەت ەتەتىنىن جەتكىزگەن.

يزرايل پرەمەر-ءمينيسترى بينيامين نەتانياحۋ كەڭسەسى مالىمدەمە جاساپ، كەلىسىمنىڭ كەيبىر باپتارىنىڭ ءالى شەشىمىن تاپپاعانىن، بىراق ولار سارسەنبى كۇنى كەشكە قاراي شەشىلەدى دەپ وتىرعاندارىن جاريالادى.

كەلىسىم شارتتارىن يزرايل تارابى راتيفيكاتسيالىق داۋىس بەرۋگە سالادى. ۇكىمەتتىڭ بىرلىگىنە جاڭا سىناق بولۋى مۇمكىن، ويتكەنى كەم دەگەندە ەكى قاتال فراكتسيا حاماس-پەن كەلىسىمگە كەلۋگە قارسى ەكەندەرىن مالىمدەدى.

يزرايل ليۆاننىڭ حەزبوللا قارۋلى توبىمەن اتىستى توقتاتۋ تۋرالى بولەك كەلىسىمگە كەلگەننەن كەيىن كەلىسسوزدەر دە قارقىن الدى. بۇل حاماس-تى وقشاۋلاۋعا كومەكتەستى.

كەيبىر شەنەۋنىكتەردىڭ پايىمداۋىنشا، اقش-تا كەلەسى دۇيسەنبى، قاڭتاردىڭ 20-سى بولاتىن بيلىكتىڭ اۋىسۋى يزرايل مەن حاماس-قا شەشىم قابىلداۋ پروتسەسىن تەزدەتۋگە سەبەپ بولدى.

اقش-تىڭ جاڭا پرەزيدەنتى دونالد ترامپ حاماس-قا ول بيلىككە كىرىسكەنگە دەيىن يزرايلدىك كەپىلگە الىنعانداردى بوساتپاسا، سالدارى اۋىر بولاتىنىن ەسكەرتكەن ەدى. ونىڭ تاياۋ شىعىستاعى وكىلى ستيۆ ۆيتكوفف كاتار مەن يزرايلگە دە باردى.

سارسەنبى كۇنى ترامپ الەۋمەتتىك جەلىدە: «ءبىز تاياۋ شىعىستاعى كەپىلگە الىنعاندار ءۇشىن كەلىسىم جاسادىق. ولار جاقىن ارادا بوساتىلادى. راحمەت!»، - دەپ جازدى.

ءباسپاسوز ءماسليحاتى كەزىندە پرەزيدەنت بايدەن ءوز اكىمشىلىگىنىڭ ترامپ اكىمشىلىگىمەن ىنتىماقتاستىعىن مويىنداعانداي بولدى. كەلىسىم ءوز اكىمشىلىگىندە ازىرلەنىپ، كەلىسسوزدەر جۇرگىزىلسە دە، ونىڭ كوپتەگەن ەرەجەلەرىن كەلەسى اكىمشىلىك جۇزەگە اسىراتىنىن اتاپ ءوتتى. «سوڭعى بىرنەشە كۇندە ءبىز ءبىر كوماندا بولىپ جۇمىس ىستەپ جاتىرمىز»، - دەدى ول.

Abai.kz